10
1 Shei dah yvngkhungh gas xangh coeu thuk gonh lyis bop yoh nvm nhang; koh dah muhlo gas joeui zainsmuh lyis yoh thyuk tyamp.
2 Joeui bos bang xiklyis jus cho kuot das zis yahge koh bang xiklyis ma jus cho kuot das zis gas soenghchoenk nghuot.
3 Koh bang gas cho mha nyamoq yah xauhgoh dah ma seq goh bang lyis yangh dede chixoeuq. Nyamoq gas nyamoq koh cho yuk khanghmuh lyis seq nhang.
4 Nah guon soeu nvng lyis nhaiqyo lyis, nvng nah muh masyah vthuq loh. Nvng o mha gyoh nyeis lyis gvgis chah loh goeus zis eq khyuot dyei mvbeh.
5 Heika mungkvn mas ngos nyvng goeus dah lyi ma jus cho nghuot. Guon bang gvng mas bweh dah lyi ma jus cho nghuot.
6 Joeui ma bos bang gas toeuh bos dah vkeqnote 10.6 Vkeq ge zis vkhom vkeq nghuot dyei zis xauh las dis bang gas tyamp toh zis xauh.
7 Jons jens gas nyang ji las xamchangh jens gas jons jens teh khyei cho loh zis ngos nyvng goeus.
8 Nvng dwang doeu lyis, nvng houmha gyoh mvbeh. Ciank kyungh phank lyis lhangnyis chweh mvbeh.Ref 10.8: Chd 7.15; Sod 26.27
9 Lukdwang mas zwi lyis luk yah zangh nos. Thangh buk lyis eq thangh yah daq nos nhang.
10 Wuzung dom lyis ma swih lyis gas yom zes kat chah. Nghamhtoeuq cho toh zis gas joeui zes bos.
11 Nvng lhangnyis lyis shih chweh nhang lhyi ka, nvng lhangnyis lyis khasoeh yoeu nhang zis seq cho ka vkyuh ma bos.
12 Joeui bos bang taiq zis gas nyamoq mas nyoqnho ngelang she los. Nghuot laus eq koh bang gas nyamoq nyang dang yah mhont zis xauh.
13 Nyamoq gas koh dang taiq zis yah xi lha, lhung lha svsoh huonh dang yah vthang sau toh.
14 Koh soeu ka dang nyoshoq taiq.
Thang pheh cha bweh los das zis hank ma seq. Yang shei thang lhyi cha bweh los das zis yang lyis hank ma yoh taiq kyoh.
15 Yhen pheh loh das cho ma seq xo nyvng dah joeui ma bos soeu ka muh yah nyang gungs nyang lyis dvnyung daus nhang das.
16 Hwankti ka wotyamh nghuot las nyah uhshe bang gas nyens gonh pwe kuot dah mau gas mvtanhzoe nghuot.
17 Nghuot laus eq nyah ehnyet yah seq nghamh thyet dah hwankti yoh, nyah uhshe bang eq shishenh doeus doeus zo las vsainnyang gungs lyis joeu zis yah ma shuk yet dah mau gas kamh gis.
18 Nvng nah yhenkhung soq das zis nyo lan lyis mauyaus das, yhen eq lains das.
19 Pwe kuot zis gas nvng lyis pyo nhang, zvbiq gas nvng lyis diu nhang, nghuot laus eq ngwis gas ja khanghmuh lyis she los.
20 Hwankti lhyi ma gis zis tsoek yah yangh vtaiq. Dis soeu lhyi nah yhetyvp mas yangh ma gis zis vtaiq. Nghoq gas hauh loeus wons las nvng cha taiq zis nyamoq lyis taiq kyoh das.