6
Lyi Zainsmuh
1 Haih lyi dvnganh gas Yhensain, namoq dah Mangso namoq lyis jyauh das xiklyis ngos lyis tying toh. Namoq loh wvng nyeis das mau mas hauh lyi chank nyeis geh.
2 Namoq kang dwis nyeis dvchank nvng eq nah vnyau vshih eq Yhensain, nah Mangso lhyi nyoqnho ngelang dyei las ngos nvng lyis dyei nyeis dah nyah lyi dvnganh lyis chank nyeis lyis namoq hauh mau mas nyangh nyangh nyeis das.
3 Israel jens eh, hauh lyi gyo yoeus las chank kuot geh. Housoeh lyis namoq nyeisgis yaplhoq las dius nyau zainsmuh bweh los zis yah Yhensain, namoq dah Mangso namoq dah phauh thyeih moq lyis dangthoengh toh zis yah dvyhangteh, nyeis coeu bos las dis dah mau mas xauh nyeis das.
4 Israel jens eh, haih zis soh geh! Yhensain, Yhensain kyingh, yah Mangso nghuot.note 6.4 Yhensain ngamoq dah Mangso ka dvso kyingh dah Mangso nghuot.Ref 6.4: Mak 12.29
5 Nvng Yhensain, nah Mangso lhyi nah nhaiqlom dvnganh yah, nah dyos dvnganh yah, nah yom dvnganh yah jyetdap aq.Ref 6.5: Mat 22.37; Mak 12.30; Luk 10.27
6 Khvnyhik ngos namoq lyis dyei nyeis dah hai tyingtoh dang lyis khanhamp eq vtohnyhik goh.Ref 6.6-9: Lyi 11.18-20
7 Hauh zis namoq lo jens lyis jyauh aq: yhen mha nyeis uhlyis, thuq loh uhlyis, no nyeis uhlyis, muh zwi nyeis uhlyis doms taiq taiq kuot aq.
8 Hauh zis soh nyeis das xiklyis nah loqyom mas twih toh aq, ngelang mas tap toh aq.
9 Namoq dah yhen khomh bungs mas, khyam khomh mas lhaih toh geh.
Domsyos Ma gyo cho Zaih nhang
10 Yhensain, nah Mangso namoq dah phauh thyeih Abraham, Isak, Yakop moq lyis dangthoengh toh zis yah dvyhangteh, nvng ma kuot khyik, kuh las gis dah wus kuh yah dyingh dah mau nvng lyis dyei.Ref 6.10: Vpm 12.7, 26.3, 28.13
11 Nvng ma tyink khyik, gis dah vyhang yah dyingh dah yhen, houmha nvng ma doeu khyik dah jeisdwang tsain joq, nvng ma tsungh khyik dah zvbiq yahge tsanlun khyam tsain joq. Yhensain namoq lyis hauh mau mas shwih wvng lyis namoq zo mes zis dvnganh yoh uhlyis,
12 Egutu mas jons duot nyeis masyah namoq lyis khyuot shwih los dah Yhensain lhyi ma tohnyhik das zis zaih aq.
13 Yhensain, nah Mangso lhyi gyukwoms zis yah nyang lyis kyingh paiq aq. Nah dangthoengh nyah nyings mas kyingh toh aq.Ref 6.13: Mat 4.10; Luk 4.8
14 Nah vnvm mas nyeis bang dah mangso ge gohtoeu mangso lyis vpaiq.
15 Namoq gohtoeu mangso lhyi paiq lyis gas Yhensain dah nhaiqyo zis gas namoq jyank mas nyi teh jweh las namoq lyis shank shoq mhont tyamp das. Khasoeh ge lyis nvng yah nyeis dah Yhensain, nah Mangso ka nyang lyis xiq yvlyis ma jhen.
16 Namoq Masa mha kuot teh Yhensain, nah Mangso lhyi vshi yoeuh.Ref 6.16: Dyu 17.1-7; Mat 4.7; Luk 4.12
17 Yhensain, namoq dah Mangso namoq lyis dyei toh lyi dvnganh vlhomuh chank geh.
18 Nvng Yhensain dah nyoqlvtjvng mas jus las gis zis kuot aq. Housoeh lyis nvng nyeisgis yaplhoq das. Yhensain namoq dah phauh thyeih moq lyis dangthoengh toh dah nyeis coeu bos mau gis mas xauh wvng sain das.
19 Nyang dangthoengh toh vgus, nvng nah jeswus dvnganh lyis khat tyamp das.
20 Thang pheh nah lo jens nvng lyis, Yhensain, yah Mangso ka yang lyis hai lyi dvnganh chank aq, ge chamus tying toh au, ge nyei das.
21 Nvng nyamoq lyis taiq kyoh das. Ngamoq gas Egutu hwankti dah jons duot nyeis masyah Yhensain ka nyah kuhxing yomsoq yah khyuot kat.
22 Yhensain ka Egutu bang, nyamoq dah hwankti yahge nyah zau jens dvnganh lyis yomsoq muh yahge gyukphoh cho kuot yvlyis ngamoq nyang nyoqjeih yah nyvng goeus.
23 Nyang kuot das ge yah phauh thyeih moq lyis dangthoengh toh vgus, yang lyis Egutu masyah lhuiq las heimha shwih los zis yah yang lyis haih mau dyei.
24 Housoeh Yhensain, yah Mangso ka yang lyis haih lyi dvnganh chank las nyang lyis gyukwoms nyeis aq ge tying toh. Housoeh lyis nyang yah dius nyau lyis vjangh gomh dyei las nyeisgis los nhang das.
25 Yang lyis Mangso tying toh zis dvnganh lomluk luk chank nyeis lyis gas, nyang yang lyis nhaiqdoeus das.