27
Mangso dah Lyi luk mas lhaih
1 Hauh thang lhyi Israel uhshe bang yah dvgeh Moshe, dius jens lyis taiq, Khvnyhik ngos namoq lyis dyei nyeis dah taiq shet cho dvnganh lyis chank kuot geh.
2 Namoq Yodan lvng goeu las Yhensain, nah Mangso nvng lyis dyei dah mau mas jweh nyeih lyis lukzains kuh kuh toeutsung lha bilvt nyen shvhwih juot las,Ref 27.2-8: Yosh 8.30-32
3 hauh thoq mas haih lyi yahge jyauh cho dvnganh lhaih toh chah. Yhensain namoq phauh thyeih moq dah Mangso namoq lyis dangthoengh toh, gis las nyeis coeu bos dah mau mas wvng goeus ya,
4 namoq gas Yodan lvng thyitvp pheh Ebal boms mas khvnyhik ngos taiq shet khyvlyis haih lukzains cuk las bilvt yah nyen toh chah.
5 Houmha luk phon ci chah. Nvng hauh luk lyis thyeq kyonhkhyi yah ma gis tsan.Ref 27.5-6: Dyu 20.25
6 Khasoeh ge lyis Yhensain, nah Mangso xiklyis phon ci lhyi ma thyet ma khangh dah luk tyomh yah ci chah. Nvng houmha ngheq dyei, phudyei chah.
7 Houmha phudyei las Yhensain, nah Mangso xikkhonh mas nah nyenstap jyungshuk zo zis yah nhaiqshoqlang gausyis das.
8 Hauh bilvt nyen toh dah luk mas Mangso dah lyi khonh khanghmuh bvng bvng lhaih toh aq.
9 Tsai, Lewi phudyei bang yah dvgeh Moshe, Israel jens dvnganh lyis taiq, Israel jens eh, vlhomuh gyo geh. Khvnyhik namoq gas Yhensain namoq Mangso dah dius jens bweh los goeus.
10 Housoeh las khvnyhik ngos namoq lyis dyei nyeis dah nyah lyi chank las nyah domsyos gyo nyeis geh.
Domsyos Ma gyo lyis Nhoengh
11 Hauh thang lhyi Israel jens lyis Moshe taiq,
12 Namoq Yodan lvng goeu thang lhyi, dius jens lyis shvmanh dang taiq uhlyis o mha vkoq jens gas Gerizim boms mas yap das. Hauh bang gas, Simon, Lewi, Yuda, Isakha, Yosep yahge Benyamin nghuot.Ref 27.12: Lyi 11.29; Josh 8.33-35
13 Dius jens lyis nhoengh dang taiq uhlyis o mha vkoq jens gas Ebal boms mas yap das. Nyamoq gas Ruben, Gad, Asher, Zebulun, Dan yahge Napthali nghuot.
14 Hauh uhlyis Lewi jens gas thwe than yah haih dang taiq das.
15 Luk, saiq, nghuot yah ngwis xing yah phvra kuot las gauh paiq soeu hank thoq mas laus eq Mangso dah nhoengh zis xauh bas jungh. Yhensain ka phvra lyis hoeng, ge lyis,Ref 27.15: Dyu 20.4, 34.17; Lew 19.4, 26.1; Lyi 4.15-18, 5.8
dius jens dvnganh gas, Amen ge phuk taiq das.
16 Nyah ungwes uwus lyis ma phauh soeu hank thoq mas laus eq Mangso dah nhoengh zis xauh bas jungh ge lyis, Ref 27.16: Dyu 20.12; Lyi 5.16
dius jens dvnganh gas, Amen, ge phuk das.
17 Yhenkyoh dah khyamkyoh zains cheh soeu hank thoq mas laus eq Mangso dah nhoengh zis xauh bas jungh ge lyis,Ref 27.17: Lyi 19.14
dius jens dvnganh gas, Amen, ge phuk das.
18 Nyoqjet soeu lhyi ma jus yvpheh choshe loh soeu hank thoq mas laus eq Mangso dah nhoengh zis xauh bas jungh ge lyis,Ref 27.18: Lew 19.14
dius jens dvnganh gas, Amen, ge phuk das.
19 Lvbaus, chauhmuh chauhlo lyis nyamoq dah toeuh dyuk shoq kuot dyei soeu hank thoq mas laus eq Mangso dah nhoengh zis xauh bas jungh ge lyis,Ref 27.19: Dyu 22.21, 23.9; Lew 19.33-34; Lyi 24.17-18
dius jens dvnganh gas, Amen, ge phuk das.
20 Nyah uwus dah yhensain nyhiq dvyuk yuk yah yhetgoh zis yah nyah uwus lyis xoqphuh nhang soeu hank thoq mas laus eq Mangso dah nhoengh zis xauh bas jungh ge lyis,Ref 27.20: Lew 18.8, 20.11; Lyi 22.30
dius jens dvnganh gas, Amen, ge phuk das.
21 Gaunyhauq yah yhetgoh soeu hank thoq mas laus eq Mangso dah nhoengh zis xauh bas jungh ge lyis,Ref 27.21: Dyu 22.19; Lew 18.23, 20.15
dius jens dvnganh gas, Amen, ge phuk das.
22 Nyah nhamhmuh nghuot ya nhamhmuh doeus soeu yah yhetgoh soeu hank thoq mas laus eq Mangso dah nhoengh zis xauh bas jungh ge lyis,Ref 27.22: Lew 18.9, 20.17
dius jens dvnganh gas, Amen, ge phuk das.
23 Yuknyih yah yhetgoh soeu hank thoq mas laus eq Mangso dah nhoengh zis xauh bas jungh ge lyis,Ref 27.23: Lew 18.17, 20.14
dius jens dvnganh gas, Amen, ge phuk das.
24 Dius gauh sat soeu hank thoq mas laus eq Mangso dah nhoengh zis xauh bas jungh ge lyis,
dius jens dvnganh gas, Amen, ge phuk das.
25 Yobos ma bos soeu lhyi sat das xiklyis phauh yoeus zo soeu hank thoq mas laus eq Mangso dah nhoengh zis xauh bas jungh ge lyis,
dius jens dvnganh gas, Amen, ge phuk das.
26 Mangso dah lyi yahge jyauh cho dvnganh ma chank soeu hank thoq mas laus eq Mangso dah nhoengh zis xauh bas jungh ge lyis,Ref 27.26: Gal 3.10
dius jens dvnganh gas, Amen, ge phuk das.