19
Phang Khau Wus jens
(Gyung 35:9-34; Yosh 20:1-9)
1 Yhensain, nah Mangso namoq lyis dyei dah mau mas nyeis dah dius jens lyis mhont tyamp thang lhyi, nvng nyamoq dah wus, yhen yoeus las houmha tsain nyeis lyis,
2-3 hauh maunyeis lyis somh boms khyoq las dvboms dvboms mas lwis lwis yoh duons loh dah wus dvkoeuq koeuq kuot toh das. Housoeh namoq hank laus eq dvyuk yuk lyis zangh sat soeu hau dvwus wus mas gos das xiklyis yoh phang luiq das.
4 Nah jeswus ma nghuot soeu dvyuk yuk lyis zangh sat lyis, nvng haih dvwus wus mas gis phang loh las jesluiq das.
5 Dang toeuq: nah aiq yuk dvgeh saiqyos mas saiq thoeuq loh. Saiq thoeuq yvmas dvyuk yuk dah wuzung gyot las gohtoeu dvyuk lyis loh zangh las nyang shei loh. Nvng gas hau somh wus mas dvwus wus mas phang wvng las jesluiq das.
6 Wus dvkoeuq kyingh dvnghuot lyis gas, cho nyo we las lvto phuk das yvwons bos, hau shei loh soeu dah boekyis nhaiqyo zis yah nvng lyis chank khat duons las sat das. Houka nyang lyis hoeng zis ma bos zangh sat zis dvnghuot las nvng ma gis shei.
7 Housoeh yvmvyah ngos nvng lyis wus somh wus toeuq toh chah oen zaudang khyoq.
8 Yhensain namoq Mangso ka nah phauh thyeih moq lyis taiq toh vgus nah maunyeis jyeq kat dyei las nyang dangthoengh toh mau dvnganh nvng lyis dyei lyis,
9 nvng somh wus khyen lhungh shih aq. (Khvnyhik ngos namoq lyis tying toh zis dvnganh chank kuot las, Yhensain, nah Mangso lhyi jyetdap zis yah, nyang jyauh khyvlyis kang dwis lyis nyang haih mau namoq lyis dyei das.)
10 Haih zis kuot aq, housoeh lyis yobos ma bos bang ma shei das. Yhensain nvng lyis dyei dah mau mas nvng yobos bos las sat zis ma xauh das.
11 Nghuot laus eq dvyuk yuk nyah yhenkyoh lyis hoeng zis yah lhom lha bat sat soeu ka dvwus wus mas phang khau laus eq,
12 nvnyang wus mas dah uhshe bang gas nvng lyis hou mhayah khi yoeus las lvto phuk das yvwons bos soeu, nah boekyis lyis dyei zis yah, nyang shei chah.
13 Nvng lyis nhaiqnyen cho ma gis chixoeuq. Israel jens masyah dius sat cho shang tyamp chah. Housoeh lyis dvnganhmoq nyeis gis das.
Yoskyoh Cauh
14 Yhensain, nah Mangso nvng lyis dyei dah vso maunyeis mas gohlhain yah jyih toh dah yhenkyoh khyam zains lyis vcheh.Ref 19.14: Lyi 27.17
Kanghjyoeng yah sen
15 Dius sat soeu dvyuk lyis yobos dyei das lyis, kanghjyoeng dvyuk kyingh yah ma tham. Dius dvyuk gas yobos bos ge nain thank kanghjyoeng aiq yuk somh yuk kyink dyei das zis yhaugyen.Ref 19.15: Gyu 35.30; Lyi 17.6; Mat 18.16; Yoh 8.17; 2Kr 13.1; 1Tm 5.19; Heb 10.28
16 Namoq mas dvyuk yuk gohtoeu dvyuk lyis ma jus khyvlyis kauq zis yah nos nhang lhyi,
17 aiq yuk yah paiq joqyos mas loh las hauh uhlyis muh wons nyeis dah phudyei bang yahge soetuon bang yah soetuon dyei das.
18 Soetuon bang gas hauh soe lhyi jeih jeih choq yoeuh das. Nvng ma jus dah kauq cho kuot lyis gas,
19 Nvng kauq soeu xauh das dah joeng cho nvng xauh kham das. Heisoeh khyvlyis nah dius nyau mas ma gis cho shang tyamp das.
20 Hau cha bweh zis yuk khanghmuh xauhgyo das. Nyamoq gyuk das las houteh ma gis cho hank khanhamp eq ma doms kuot lo das.
21 Housoeh teh soe mha nhaiqnyen cho ma chixoeuq. Hau joeng cho ka, kang xiklyis kang, nyoqjeih xiklyis nyoqjeih, zwis xiklyis zwis, loq xiklyis loq, khyei xiklyis khyei nghuot.Ref 19.21: Dyu 21.23-25; Lew 24.19-20; Mat 5.38