2
Nebukhaneza Yhetmoq
1 Nebukhaneza hwankti guon dah aiq vzvn lyis nyang yhetmoq dvkoeuq moq. Hauh zis yah nyang lyis svsoh chiqh nhang lha nyang ma yoh yhet.
2 Housoeh las hwankti ka nyah yhetmoq pho das xiklyis, nyah botthyet bang, hweq kat bang, mandan muot bang, gyuis wvng bang lyis khi nhang. Nyamoq eq los las hwankti xikkhonh mas tsain yap joq lyis,Ref 2.2: Vpm 41.8
3 Hwankti nyamoq lyis taiq zis gas, Ngos yhetmoq moq goeus las hauh zis ngos lyis chiqh nhang nyeis. Ngos hauh vjyuk cha nghuot zis seq mes, ge.
4 Nyamoq gas hwankti lhyi Aramik nyingh yah toeuh, Nah Shoenkkhyi vjangh joq bas jungh. Ngamoq lyis nah yhetmoq taiq kyoh aq, ngamoq pho dyei bah, ge.note2:4 masyah 7:28 jweh shoq Aramik nyingh yah lhaih toh, Hebre nyingh ma nghuot.
5 Hwankti nyamoq lyis taiq, Ngos namoq hauh yhetmoq taiq las hauh vjyuk ngos lyis taiq chah oen nghamh thyet goeus. Namoq ma yoh taiq lyis gas ngos namoq lyis nyang doeus nyang tu lha namoq yhen lhyi eq khyomp boms kuot das.
6 Nghuot laus eq namoq hau yhetmoq yahge hauh vjyuk yoh taiq lyis gas, ngos namoq lyis jyungshuk yahge nyoqnho ngelang zainsmuh yah phauh shangh das. Housoeh las gvshih hau yhetmoq cha nghuot zis yahge hauh vjyuk cha nghuot zis taiq geh, ge.
7 Nyamoq hwankti lhyi doms toeuh zis gas, hau nah yhetmoq cha nghuot zis jenh taiq kyoh aq, ngamoq pho das, ge.
8 Hwankti phuk taiq zis gas, Namoq ngos nghamh zis yah dvyhangteh ngos haih zis nghamh thyet goeus zis seq yvmvyah shishenh lang mes nyeis.
9 Namoq ngos lyis hauh yhetmoq ma taiq lyis gas, namoq dvnganhmoq lyis dvyhangteh dah joeng cho dyei das. Namoq gas vkhoeuq cho jeis thaiq loh das ge nghamhloms yvmvyah ngos lyis hwah taiq das xiklyis namoq nyang changh xamgoh goeus. Ngah yhetmoq cha nghuot, taiq geh, housoeh lyis hauh vjyuk eq seq pho das yvlyis ngos seq das, ge.
10 Hau joeui dyei bang phuk taiq zis gas, Nyeisjvng thoq mas nvng hwankti seq mes cho yoh taiq zis hank ma bos. Khasoeh teh kuhxing thank, yomsoq bos thank hwankti yangh nyah botthyet bang, nyah hweq kat bang yahge gyuis wvng bang lyis housoeh teh zis ma nyei ku.
11 Nvng Hwankti nyei dah cho ka svsoh yau las mangso jens masyah lai las hank ma yoh kuot dyei. Hauh mangso jens gas dius mas ma nyeis.
12 Hauh dang gvng mas hwankti nhaiq gis yo las, Babilon mas dah hwankti dah joeui dyei bang dvnganh lyis sat das xiklyis zaudang khyoq.
13 Housoeh las Daniel yahge nyah loeuzomh jens bos dah joeui dyei bang dvnganh lyis sat das cho zau dang thuq los.
Yhetmoq vjyuk chixoeuq
14 Housoeh las Daniel gas, sat das zau dang lyis kuot das soeu hwankti gungs zungh soeu dah zau Ariok jyank mas loh zis yah nhaiqbos dang khyen lha,
15 nyang Ariok lyis nyei, Chamus hwankti ka hei iq than dah zaudang khyoq au, ge. Housoeh las Ariok gas Daniel lyis cha bweh cho taiq kyoh.
16 Lanhtan lhyi Daniel gas hwankti jyank mas loh las yhetmoq yoh pho das shishenh jyeq dyei das toeuh sang.
17 Hauh thang lhyi Daniel gas nyah yhen mha loh las nyah loeuzomh Hanania, Mishael yahge Azaria moq lyis cha bweh goeus cho taiq kyoh.
18 Nyang gas Babilon mas dah joeui dyei bang yah dvgeh nyamoq sat zis ma xauh shoq, maukhung Mangso ka nhaiqnyen zis yah hauh nghop toh cho nyamoq lyis phui dyei das xiklyis shvmanh dung geh ge nyamoq lyis taiq.
19 Hauh nyenh lyis nyoqnyvng masyah hau nghop toh cho Daniel lyis chixoeuq. Housoeh nyang maukhung Mangso lhyi chungh.
20 Mangso ka joeui bos, yomsoq bos soeu nghuot!
Nyang lyis vcaiq vto chungh geh.
21 Nyang gas shishenh yahge yoq lyis joeu nyeis:
hwankti jens lyis toqh las khyoq nyeis.
Nyang gas joeui yahge seqgyo cho dyei soeu nghuot.
22 Nyang gas noq thank cho yahge shung toh cho lhyi phank xoeuq:
nyang gas chuot yvmas cha shung toh zis lyis seq,
Nyang lyis bvng zis yah lhaink toh.
23 Ngah phauh thyeih moq dah Mangso eh, ngos nvng lyis chungh zis yah phauh nyang.
Nvng ngos lyis joeui yahge yombos cho dyei.
Nvng ngos dung dang lyis toeuh las
hwankti lhyi cha taiq das zis ngamoq lyis chixoeuq.
Daniel Yhetmoq Pho
24 Housoeh las Daniel gas hwankti dah joeui dyei bang lyis sat das zis tyingtoh zis xauh soeu Ariok jyank mas e lha taiq, Nyamoq lyis vsat. Ngos lyis hwankti jyank shwih e aq; ngos nyang lyis nyah yhetmoq vjyuk cha nghuot zis taiq das, ge.
25 Ariok gas Daniel lyis hwankti Nebukhaneza xikkhonh mas lvnyap shwih e lha hwankti lhyi taiq zis gas, Yuda jonsdoeus bang mas nvng hwankti lhyi yhetmoq yoh pho dyei soeu dvyuk nyvng, ge.
26 Hwankti ka Belteshaza ge lui dah Daniel lyis taiq zis gas, Nvng ngos moq dah yhetmoq yahge hauh vjyuk yoh pho dyei lah, ge.
27 Daniel phuk taiq, Hwankti eh, hauh yvlyis gyuiswvng bang, hweq svra jens, botthyet bang, nghuot ya kyi choq bang hank eq nvng lyis ma yoh taiq kyoh.
28 Nghuot laus eq nghop toh cho yoh chixoeuq soeu, maukhung Mangso nyeis. Nyang gas thang pheh bweh los das cho, nvng hwankti lhyi kyoh goeus. Nah yhetmoq, nvng yhet joq uhlyis nyvng dah nyoqnyvng gvshih ngos nvng lyis taiq kyoh bah.
29 Nvng hwankti yhet joq uhlyis thang pheh bweh das cho yhetmoq moq las hau nghop toh cho lhyi phant xoeuq dah Mangso ka bweh los das cho nvng lyis chixoeuq.
30 Gvshih hai nghop toh cho ka ngos lyis chixoeuq goeus. Houka ngos dvyuk yuk thoq lyis joeui zes bos las ma nghuot. Nvng hwankti ka nah yhetmoq vjyuk lyis xuq las nah jyank mas jweh los dah nghamh cho lhyi seqgyo bas jungh.
31 Hwankti eh, nvng nah nyoqnyvng mas svsoh kuh dah gungslho dvkoeuq nah xikkhonh mas yap joq yvlyis nyvng. Houka bvng las kyi kyi, yoeuh gyukphoh zis nghuot.
32 Hauh gungslho dah uhloms gas xing gyingh yah kuot toh. Sainhkhonh yahge loqyom gas ngwis yah tsain kuot toh. Hauh thyikdom yahge tanghbauh gas thunk,
33 khyeiyau gas thyeq, khyeiwu gas thyeq dvchink tsoh dvchink nghuot.
34 Nvng yoeuh nyeis lyis hank eq ma tanh lyis luktyoq masyah lukmuh dvlom zvn los las hau gungslho dah thyeq yahge tsoh khyei lhyi bat las thungh thyi tyamp.
35 Lanhtan lhyi hau thyeq, tsoh, thunk, ngwis yahge xing ka dyis tyamp las cungh lyis thanjang mas dah phvlhau teh bweh tyamp. Vyos eq ma dwvng lo shoq lyeis yah dvnganh muot tangh tyamp. Nghuot laus eq hauh lukzains gas boms teh kuh los las nyeisjvng gonh nghop tyamp.
36 Haih zis gas yhetmoq nghuot. Gvshih ngos hwankti lhyi yhetmoq pho dyei das.
37 Hwankti eh, nvng gas hwankti jens dvnganh mas kuh thank soeu nghuot. Maukhung Mangso ka nvng lyis hwankti zainsmuh kuot las, yomsoq, duot cho yahge nyoqnho ngelang dyei toh.
38 Nyang gas nvng lyis dius nyeis dyos dah nyeisjvng lyis guon soeu kuot goeus. Gaunyhauq jens dvnganh yahge nghoq jens thoq mas guon soeu kuot toh. Nvng gas xing uhloms nghuot.
39 Nah thang mha nvng iq ma kuhxing dah gohtoeu munghdan dvkoeuq thuq los das. Hauh thang lhyi somh vkoeuq thunk munghdan los las nyeisjvng gonh lyis guon das.
40 Hauh thang lhyi Munghdan nyei vkoeuq gas thyeq soeh yombos das. Thyeq gas vyhang dvnganh lyis khyauh sanh tyamp teh, hauh munghdan gas xik lyis dah munghdan dvnganh lyis dvyos dvsanh thungh thyi das.
41 Nvng khyei yahge khyeinyhauh gas dvchink gas tsoh nhih, dvchink thyeq nghuot zis eq nyvng. Hauh vjyuk gas gang lvn loh dah munghdan nghuot das. Thyeq yah tsoh nhih lhoeuq zis nghuot yvmvyah houka munghdan mas thyeq yom teh zis bos das.
42 Khyeinyhauh gas dvchink thyeq, dvchink tsoh nhih, vjyuk gas hauh munghdan dvchink yombos das, dvchink gas yomnhuk das.
43 Thyeq gas tsohnhih yah lhoeuq toh yvlyis eq nvng nyvng. Haih vjyuk gas, hau munghdan lyis guon bang nyi yoeus yhen loh zis yah nyamoq dah yhenbang xonh goh das zis yomkat. Nghuot laus eq thyeq gas tsohnhih yah ma yoh loeuh teh nyamoq ma yoh xonh, ma yoh dapgoh das.
44 Hai guon bang dah caiq lyis maukhung Mangso ka khanhamp eq ma thank lo dah munghdan kuot toh das. Haih munghdan lyis khanhamp eq ma yoh ung tyamp das. Hauh zis yah hau munghdan jens dvnganh lyis mhont tyamp thang lhyi hauh zis vcaiq vto goeng joq das.
45 Hauh luk gas hank ma tanh lyis luktyoq masyah khasoeh zvn los las thyeq, thunk, tsohnhih, ngwis yahge xing yah kuot toh dah gungslho lhyi khasoeh bat thyi yvlyis nvng nyvng. Kuhxing dah Mangso ka, thang pheh cha bweh das cho hwankti lhyi taiq kyoh. Ngos nvng moq dah yhetmoq lyis top taiq, hau jyoeng dah vjyuk eq dyei goeus.
Daniel lyis Phauh shangh
46 Hauh uhlyis hwankti Nebukhaneza gas Daniel xikkhonh mas nyeisjvng mas gop gyoh. Nyang lyis lomhxangh yahge jyungshuk kuot dyei das xiklyis zaudang khyoq.
47 Hwankti taiq, Nah Mangso ka mangso jens dvnganh mas kuhxing thank soeu nghuot. Hwankti jens thoq mas Yhensain, nghop toh cho lhyi phank xoeuq Soeu nghuot. Nvng hai nghop toh cho lhyi yoh phant goeus yvmvyah, ngos haih zis seq, ge.
48 Hauh thang lhyi nyang Daniel lyis vkhom nyhang zis dyei, khoek dah jyungshuk nyoshoq dyei, Babilon moeng lyis guon nhang, hwankti dah joeui dyei bang dvnganh dah uhjyung toh.
49 Daniel sang lha, hwankti ka Shadrak, Meshak, Abenego moq lyis Babilon moeng mas yhaugyen dah uhshe bang kuot nhang. Daniel gas hwankti yhen khyam mha nyeis.