KORINTHU
BANG LYIS AIQ VLHAIN HUON MAUSSAUH
(2 CORINTHIANS)
Haih maussauh dah cangxeih vdoeus mas, nyang gas phung mha bos dah phung dius dvyhamh nyang lyis tyi lha ma phauh gis taiq bang lyis nyang chamus dang than yah doms toeuh cho taiq phui kyoh thang lhyi, housoeh doms taiq gvng mas nyamoq ehnyet thaiq zis yah, nyang yah doms doeus goh los yvmvyah nyang svsoh gausyis cho lhaih kat.
Hauh thang lhyi nyang gas Yuda mau mas svsoh chah nyeis dah Khristan vmang vnoeuh moq nyhenshang vlu magons magoh dyei das xiklyis Korinthu phung lhyi dung kat. Thang thank vdoeus mas, nyang lyis lvgyo hwah nghuot, nyamoq kyingh lvgyo jyoeng tsain nghuot ge Korinthu phung dius dvyhamh taiq loeusmus cho lhyi taiq phui cho lhaih kat.
1
1 Mangso dah ehnyet yah dvyhangteh, Khristu Yesu dah lvgyo ngos Paulo yahge vmang vnoeuh Timothi gas —Ref 1.1: Lgy 18.1
Korinthu wus mas Mangso dah tsainhtoh phung yahge Akhaia mau gonh mas dah gyingshang bang dvnganhmoq lyis jeshuh kat.
2 Yah Uwus Mangso yahge Yhensain Yesu Khristu gas jyehjuh yahge nyenstap cho namoq lyis dyei bas jungh.
Nhaiqshoqlang Dang
3 Nhaiq seq nyen dah Uwus yahge pangh cho vja ja dah Mangso, yah Yhensain Yesu Khristu dah Uwus Mangso lhyi nhaiqshoqlang chungh goh.
4 Yang yaukyenh shanghsenh vja ja xauh uhlyis Mangso yang lyis pangh goeus. Housoeh las yang gas Mangso jyank masyah kham yoeus dah nhaiqtaink jyehjuh yah gohtoeu yaukyenh shanghsenh vja ja xauh nyeis bang lyis doms yoh pangh.
5 Yang gas Khristu khamzo dah shanghsenh nyoshoq lyis bos gvm kham zis yah dvyhangteh, Khristu mas Mangso dyei dah pangh cho jyehjuh zainsmuh lyis eq bos gvm kham yoeus nyeis.
6 Housoeh las ngamoq shanghsenh zis xauh lyis, houka namoq xiklyis nhaiqtaink jyehjuh yahge khyuot yoeus cho xauh yoeus das nyhenshang nghuot. Ngamoq nhaiqtaink jyehjuh xauh kham yoeus lyis gas, namoq eq ngamoq yah dvyhangteh hauh jyehjuh lyis xauh kham yoeus las ngamoq jhen dah shanghsenh yvlyis namoq ehnyet xing xing yah yoh jhen das yom xauh yoeus.
7 Ngamoq shanghsenh yvmas namoq bos zis yah dvyhangteh, ngamoq kham yoeus dah nhaiqtaink jyehjuh lyis eq namoq xauh kham yoeus nyeis yvmvyah, namoq mas ngamoq dah nghamhloms cho ma lop ma loeh goeng joq yvlyis ngamoq seq.
8 Boekyis eh, Asia mau mas ngamoq xauh goeus dah shanghsenh cho namoq lyis doms taiq kyingh mes. Ngamoq lyis nhiq dah shanghsenh ge dah yvwons s gas kuh las svsoh lyei yvmvyah ngamoq gas kang dwis das zis yangh ma nghamhloms lo shoq nghuot.Ref 1.8: 1Kr 15.32
9 Ngamoq gas shei das yobos dang thang thyet zis xauh bang nghuot oen vsainnyang gungs lyis nghamh goeus. Nghuot laus eq heisoeh bweh cho ka ngamoq gas vsainnyang gungs lyis ma nges, shei goeus bang lyis dwis toq nhang dah Mangso lhyi nges das xiklyis nghuot.
10-11 Nyang gas housoeh teh gyukphoh shei cho mhayah ngamoq lyis lhuiq kat goeus las lhuiq kat shih das. Namoq eq namoq dah vkyuh dung zis yah ngamoq lyis pangh nyeis yvmvyah nyang gas ngamoq lyis khyuot lhuiq kat shih das oen nghamhloms zis yah langh nyeis. Housoeh yvmvyah Mangso dah dius jens nyoshoq ngamoq xiklyis shvmanh dung dang lyis gyo dyei las ngamoq lyis shvmanh dyei das. Housoeh dius nyoshoq gas nyamoq dah thwe kat las ngamoq xiklyis Mangso lhyi nhaiqshoqlang ge tsain chungh das.
Paulo Nghamh cho Thaiq
12 Ngamoq ehnyet mha khwank das cho dvkoeuq bos. Houka haih mungkvn mas ngamoq kang dwis cho, zes las namoq yah zomh tsoq goh cho mha dius dah seq cho mha ma nges, Mangso dah jyehjuh yomsoq yah ngamoq gas Mangso dyei dah jyoeng lha lhoqshang dah ehnyet yah guon khyvlyis chank las muh wons wuq cho nghuot.
13-14 Gvshih ngamoq lhaih huon dah maussauh mas namoq nghap las seqgyo das cho kyingh dvlhaih kat. Nghuot laus eq gvshih namoq ngamoq taiq yvlyis dvkhamh dvseqgyo laus eq thang pheh namoq ngamoq taiq yvlyis dyinghjet shoq seqgyo das nyhenshang ngos nghamhloms. Housoeh Yhensain Yesu dah buisnyeis lyis ngamoq gas namoq gvng mas yoh khwank teh namoq eq ngamoq gvng mas yoh khwank das.
15 Haih cho jens lyis nghamhnywe zis yah namoq gas aiq vlhain jyehjuh xauh yoeus bas jungh, namoq jyank mas shih los jweh das oen nghamhtoeuq toh.
16 Khasoeh ge lyis ngos Makedoni mau pheh loh uhjyangh eq, hou mhayah tauh los uhlyis eq namoq jyank mas wvng las Yuda mau pheh loh das gyung cho xiklyis namoq jyank masyah pangh cho yoh bas jungh oen nghamh.Ref 1.16: Lgy 19.21
17 Gvshih ngos housoeh nghamh toeuq yvmas ngos gas phanh ehnyet bos soeu nghuot cho chixoeuq nyeis lhyeh? Ngos nghamh toeuq cho lhyi ngos nghamh thyet loh uhlyis vsainnyang vkyuh dvxo dah cvvq ehnyet yah kuot loh lhyeh? Dvshishenh lyis, Nghuot goeus ge las eq ma nghuot lo ge las eq aiq ja taiq nyeis lhyeh?
18 Jyoengh Mangso ka jyoeng yvlyis taiq nyeis zis yah dvyhangteh ngos ngamoq lyis dyei dah dangthoengh eq nghuot zis yahge ma nghuot lhoeuq dah dang aiq ja ma nghuot.
19 Khasoeh ge lyis ngos, Sila yahge Timothi taiq kyoh goeus Mangso dah Lo Yesu Khristu gas, Nghuot yahge ma nghuot mvlhuk lvjus soeu ma nghuot. Jyoengh oen lhyi nyang gas Mangso nhaiqdoeus cho lhyi, Nghuot ge taiq dah Yhensain nghuot.Ref 1.19: Lgy 18.5
20 Nyang mas Mangso dah dangthoengh dvnganh, Nghuot, ge dah phuk dang nghuot. Housoeh las ngamoq gas Mangso dah phunk hoeuh das xiklyis Yesu Khristu mas Amen oen sang.
21 Namoq yahge ngamoq dvgeh Khristu mas dvdain dvlom kang dwis nhang soeu ka, Mangso nyang nghuot.
22 Mangso nyang yang lyis lhyenwhei khyen yoeus zis yah nyah dius nyau nghuot cho kyihau tap las, jweh los das shishenh lyis yang kham yoeus das jyehjuh dvnganh xiklyis pauh toh khyvlyis yah nhaiqlom khau mha hau Gyingshang Dyos huot kat dyei toh goeus.
23 Ngos Korinthu pheh ma doms loh lo das oen nghamh thyet zis gas namoq lyis sunghhuq nhang mes las nghuot cho ngah ehnyet lyis seq dyei dah Mangso ka ngah kanghjyoeng nghuot goeus.
24 Ngamoq namoq lyis, cha lhyi lomsjingh chah oen ma taiq, namoq gas hau lomsjingh cho mha goeng goeng yap joq yvlyis ngamoq seq. Ngamoq gas namoq dah gausyis pyo ngon cho xiklyis namoq yah dvgeh muh dvwons wuq nyeis.