ZEKHARIAH
Laibu
(The Book of Zechariah)
Thulamsial
Zekhariah laibu hi khen nihin khen theih hi.
(1) A ngeng 1-8 tiang: 520-518 BC laklawh sung Zekhariah hilhmi thu um hi. Hi thu hi muhnak bebek hi in, Jerusalem bawlphat lehnak tuk thu le Biakinn saklehnak tuk, Pathian in mihingte a thianthohnak le a heng tuk laihmi Messiah thu hi.
(2) A ngeng 9-14: sungah mahnung deuh a hilhmi thute um haw a, a muansan haw mi Messiah i dawltabel thukhen thu hi.
1
Topa In Mihingte Ama Lakah Pinkik Tukin Sam
1 Darias in Persia kumpi a dehnak kum nih kum, ha liat ha in, Iddo i tupa, Berekhiah i capa profet Zekhariah i lakah Topa i thu cu hi tin heng hi.Ref 1:1 Ezr 4:24-5:1; 6:14;
2 Cungnungbel Topa in Zekhariah cu Israel tei nelah hi bangin hilhtik hi. Keimah, na Topa uhin, na pu le pa tei humah ka thinukzet ing,
3 Mahnaven atu-in nangmu nelah hi bangin hilh ing. Ka nelah kikleh unna, nangmu nelah kikleh bok tung.
4 Na pu le pate bangin um pahsuh un. Ni dang laihin, profet ten sualnak bawl tuk ngawlin le thilpha ngawl bawl tuk ngawlin hilh haw hi. Mahnaven ka thu ngai nuam ngawlin a zui hei zui nuam haw ma hi.
5 Mah profet le na pu le pa uhte cu thi khawng zo haw hi.
6 Ka nadektu profet mangin, na pu le pa tei lakah thukham le ngallinnak pia ing. Mahnaven imah a simsial haw ngawl hangin haksatnak tampi tawk haw hi. Siklehin, a humah bawl tukin ka ngaihsutmi cu amu nungcang hum tawnin dantatnak a tawh haw ten Cungnungbel Topa ka hihlam phawkleh haw hi.
Profet In Cipuhte A Muhnak
7 Darias in kumpi a deh sawng kum nihnak kum, ha sawm le ha khat ha, ni sawm nih le ni li zanin, Topa in muhnak tuah thuhilh hi.
8 Topa i vancungmi pa khat cipuh san hum khungin mu ing. Luam sung a, lenmui kung lakah cawlin, a nunglamah cipuh dangte um haw hi. Cipuh san, cipuh caan le cipuh ngote hi.Ref 1:8 Mang 6:2-8;
9 “Bawipa aw, hih cipuh ka muhnak sullam cu dong ing.”
Vancungmi in, “A sullam hilh tung.
10 Leihum zo kawkawitu tukin Topa i hahmi tin,” ti hi.
11 Cipuh ten, “Vancungmi nelah, leihum khua hempoh ah heng khawng zo ung a, lei buppi cu bawmtu nei ngawlin le thinnau zetin um tih mu ung, tin hilh haw hi.”
12 Mahten vancungmi in, “Cungnungbel Topa, Jerusalem le Judah khuapi a dang tei humah kum sawm salih sung na thinuk zo ci. A hum hawah hehpihnak na neih theih laih ngawl sung, itih can tiang kaw a cim hih haw tuk?” tin dong haw hi.
13 Topa in vancungmi cu thapiaknak awnkamno tuah donlehin,
14 Cungnungbel Topa i awnkam cu tangau pih tukin vancungmi ten keimah hilh sawlawn haw hi. “Ka khuapi thiangtho Jerusalem ca in, itnak le deihsaknak tamzet nei ing a,
15 Lungnopnak le lemdaihnak a cotu miphun tei humah ka thin ka sup li hei in, mah miphun ten ka mihing tei thuaknak cu luai dedeuhtik haw hi.
16 Mah hangin Jerusalem khuapi humah ka hehpihnak langtik tukin hung kikleh ing. Ka Biak inn cu saleh tukin Jerusalem khuapi cu tundinleh hi tuk tin,” ti hi.
17 Vancungmi in ka nelah, “Cungnungbel Topa in ka khuapi cu khangtoleh tukin Jerusalem khuapi cu bawmleh tung a, kata hi tin samleh tung tin tangautik hi.”
Profet In Sakite A Muhnak
18 Muhnak pa khat umlehin, khuicang ki pa li mu ing.
19 Ka nelah awn litu in, vancungmi nelah, “Hi saki tei sullam cu i hum tin dong ing.”
Amah in, “Judah, Israel le Jerusalem miphun hempoh lakah a khen khektu miphun tei ai-awhtu haw,” ti hi.
20 Topa in, sobul tuah nadektu mihing pa li lak hi.
21 “Hite hi i bawl tukin hung haw kaw, tin dong ing.”
Amah in, “Hite cu Judah ngam sukehtu, a mihingte a khenkhektiktu tukin le siatsuah tukin hung haw tin don hi.”