4
1 Mithi le a nungmi tei thukhentu Jesuh Khrih le Pathian mai ah, a nuailam a ka ngatmi na bawl tuk uh le na man tuk uhin, nase zetin sosuah ing. Itahim titale Khrih cu Kumpi bangin uk tukin hungleh tuk hi.
2 Mah hangin Thuthangpha phuangin, hun can lemcangah hei hihen, lemcang ngawl hei in hihen phuang loli in hi; a theihciang theih hawnak tukin hilh inna, liat a kul tale liat inna, sosuah a kul tale sosuahin; thinsau zetin hilhin hi.
3 A pha mi hilhdunnak khi zui nuam ngawlin amu deihnak saw zui nuamnak hun heng tuk hi. Mahten amu theih nuammi bek hilh tukin zilhtu tampi la haw tuk hi.
4 Thutak ngai nuamleh ngawltohin nunghekin, a man ngawlmi tangthu saw khi ngai nuam haw tuk hi.
5 Mahnaven nang cu ilai banglai munah hei hihen, ihun bang hunah hei hihen, thu saupi ngaisungin, mahleh mah ukdun thei tukin zuamin; haksatnakte thuak thei tukin zuam inna, Thuthangpha phuangtu tei nadeh khi dekin hi. Mahten Pathian nadektu na hih bang bokin, na nadeh ten a cangkimno in dekin hi.
6 Kei cu biakpiaknak tuk a piak haw bangin a man haw tuk can heng zo hi. Hi leihum nunnak ka zamsan tuk hun heng zo hi.
7 Tai zuamnakah a tawpnak tian tai zo ing. Ka upnak vang hah suah ngawlin khimzet len zo ing.
8 Atu-in ka Topa thudik khentu Topa in, mah ni khua ten a piak tukmi nehnak laksawng cu ka ca in, a koihsami cu ngak ing. Mah laksawng cu dikcangnak lukhu hi, keima ca bek kha ma hi; itnak tuah a lang tukmi amah a ngaktu hempoh tei ca hei in hi.
Bulpak Thucahnak
9 Ka lakah hung thei tukin zuamlo in hi.
10 Demas cu hi leihum a ih saw hangin taisanin, Thesalon khua ah hawh zo hi. Kresen cu Galati pengah hawhin, Titas cu Dalmatia pengah hawh hi.Ref 4:10 Kol 4:14; File 24; 2Kor 8:23; Gal 2:3; Tit 1:4
11 Luka bek ka lakah um hi. Marka vang zawm thah inna, ka lakah hunpihin hi; nadehnakah a bawm theitu hi tuk hi.Ref 4:11 Kol 4:10, 14; File 24; Nung 12:12, 25; 13:13; 15:37-39; Kol 4:10;
12 Taikhikas cu Efesa khua ah hawhtik ing.Ref 4:12 Nung 20:4; Efe 6:21-22; Kol 4:7-8;
13 Na hun ten Troas khua Karpas lakah ka zammi ka kawt angki cualpi khi pua sak thahleh aw maw. Laibute vang pua inna, saphaw tuah bawlmi laibute vang phawkngil pahsun.Ref 4:13 Nung 20:6;
14 Daal pumsutu Alexander in haksatnak tampi pia hi. Topa in, a bawlnak bangin lulleh tuk poh hi.Ref 4:14 1Tim 1:20; Saam 62:12; Rom 2:
15 Nangmah vang ngallingin, itahim titale amuhte cu a Thuthangpha uh thih ngam tianin, a eltu hi haw hi.
16 Thusonnakah ka hawh masakbel tumah kuamah in tanpih haw ma hi. A venghawngin taisan khawng haw hi. Amuhte cu Pathian in mawhsiat pahsuh hen.
17 Mahnaven Pathian cu ka lakah umin, thazaang pia hi. Mah hangin Thuthangpha cu cangcian zetin Gentail mi hempoh tei lakah hilh thei ing a, thihnak tawk ngawlin luat ing.
18 Topa in siatnak hempoh lak pen panin, a Vancung uknak sungah himdamno in luhpih tuk hi. Ama lakah sunloihnak cu kumkhua in um leleng tahen. Amen.
Thukhupnak le Nuksatnak
19 Priscilla, Aquila le Onesiforas tei innkuate vang nuksat ing.Ref 4:19 Nung 18:2; 2Tim 1:16-17;
20 Erastas cu Korin khua ah umin, Trofimus cu a nat hangin Miletas ah zam ing.Ref 4:20 Nung 19:22; Rom 16:23; Nung 20:4; 21:29;
21 Khawsik hun heng laih ngawlin a hung thei tukin zuamin hi. Eubulas, Pudens, Linas le Klaudias ten nuksat haw in, a dang thu umtute vangin nuksat bok haw hi.
22 Topa cu na hawvang humah um tahen.
Pathian hehpihnak cu nangmu venghawng humah um tahen.