2
Khrih Jesuh Ca In Ngalkap Pha
1 Ka capa aw, nang cu Khrih Jesuh tuah a pehzomdun uhnak le a co uhmi hehpihnak hangin kho zetin umin hi.
2 Theihpihtu tampi mai ah ka phuanmi ka thuzilhnakte khi midangte vang hilh thei sawlawn bok tuk tin na muanmi mihingte khi komzetno hilhin hi.
3 Khrih Jesuh i muantak ngalkap na hih bangin na thuak tukmi covo khi thuak bokin hi.
4 Ngalkap a dektu in amah hotu bawi i deihnak zui a, ngalkap kha ngawl mi thawthong tei thu la sungah cokhel kha haw ma hi.
5 Tai zuamnak sungah a telmi in daan a zui nuam ma tale laksawng ngah thei tukma hi.
6 Nadeh haksabel a dektu lobungmi in ancop hun a hen ten anthak masabel a ngahtute haw hi.
7 Hi bangin ka hilhmite hi phazet ngaisungin hi, itahim titale Topa in, a hilhmi thute theih theihnak pia tuk hi.
8 Thuthangpha ka phuannak sungah a um bang bokin David casuan, thihnak pen a tholehtikmi Jesuh Khrih cu phawkngil him pahsun hi.
9 Thuthangpha ka phuan hangin haksatnak thuak ing, mi suaksual bangin thik taicin tuah khih tawk ing. Mahnaven Pathian thu cu thik taicin tuah khih theihmi kha ma hi.
10 Mah hangin Pathian i tenmi mihing ten Khrih Jesuh lak pen a hungmi nunpatnak ngahin, kumkhua sunloihnak a co theih hawnak tukin, haksatnak hempoh thuak ing,
11 Hi a nuailam thute hi a manmi awnkam hi.
“Amah tuah a thi cih uh tale,
a nun uh vang amah tuah
nung kawm tuk hung hi.
12 Haksatnak a thuak thei uh tale,
amah tuah uk kawm tuk hung hi.
Amah a nial uh tale,
amah vangin nialleh bok tuk hi.Ref 2:12 Mt 10:33; Lk 12:9;
13 Muantak ngawl ahi uh vangin,
amah cu muantak leleng hi.
Itahim titale amah le mah
eldun cop thei ma hi.”
Nadektu Pha
14 Awn kamcang humah thu eldun lih cu cawl un, tin Pathian mai pen na mihingte ngallinnak pia inna, phawkngil tuk ngawlin hilh lelengin hi. Hitih bang thu eldunnakin nemcuamnak imah piangtik ma hi: a ngaitute siatsuahtik saw hi.
15 A nadeh zahcakpih ngawltu le Pathian thuman Thuthangpha cu thuman zetin, a hilhciangtu hi tukin le Pathian lungkimpihnak ngah tukin zuamin hi.
16 Pathian kihcak ngawlnak awnkam le silhahzet awn eldunnakte cu pialin hi. Itahim titale mahtibang cu Pathian le mihing khawla duntik saw hi.
17 Mahtibang hilhdunnak cu a taksa uh thuk dedeuhin, a ei suktu meima siasuak bang hi. Mahtibang zilhtu cu Himenias le Filetas haw hi.
18 A pa nih haw in, a manmi lampi pen pial haw hi. Amuh ten, “Thawhlehtikmi hi zo ung” a tih haw hangin thu umtu khenkhat tei upnak vaivuantik haw hi.
19 Mahnaven Pathian sungah khim zetin, a mut ngah zomi a zung uh cu, hin theih ma hi. Mah a zung humah, “ Topa in, a ma mite cu akua zong haw him tih thei hi,” tih le “ Topa ta hi ing tih a theitu ten phat ngawlnak pen pial haw tuk hi,” tin nganmi um hi.Ref 2:19 Mipum 6:5;
20 Inn ngengpi sungah pakan le beel a phunkim um hi. A khen cu ngun tuah bawlmi hi a, a khen cu sui tuah bawlmi hi. A khen cu ni sunglawi hun ten man tuk hi in, a khen cu nisial man thawthong tuk hi.
21 Akua abang a pha ngawl hempoh zamin, a thiangthono in, a um tale nadeh sunglawi ca in man hi tuk hi. Itahim titale pum a pia mi hi in, na pha dek tukin tuangtim sa hilhialmi a hih hangin Topa i man tukin a takmi hi.
22 Khanno laih i tisa deihnak cu zam inna, lung thiangno in, Topa i bop tuk a ngentute tuah munkhatah thumannak, upnak, itnak le lemdaihnak ngah tukin nase zetin zuamin hi.
23 Silhahzet le imah thei ngawl thu eldunnakte pialin hi. Mahtibang eldunnakin hauhdunnak suaktik thei tih cu na theihmi hi.
24 Topa i na a dektu cu midangte tuah a haudun limi hi tukma hi. Mi hempoh lakah hehpih thiamtu, thinsau in mi hilhthiamtu le
25 amah a dodaltu nun a hilh ten thinnemno in mi a hilh theitu hi saw hen. Mahtin a bawl tale amuhte thinthekin thutak a theih hawnak tukin Pathian in huncan pha a pia hei hi thei hi.
26 Mahten a lungmu haw cipin, Satan in, a deihnak zui tukin bawlsiatnak thang sung pen luat tuk uh ci.