18
Absalom Thihnak
1 David Kumpi in, a ngalkapte cu hulawmin, a thawng le a za tin khenin, hotu bawi koih pepel hi.
2 Ngaldo tukin hon thumin, hawhtik a, hon khatnak cu Joab in ho hi; hon nihnak cu Joab i nau Abishai in ho a, hon thumnak cu Gath khua mi Ittai in ho hi. Kumpipa in, “Keimah vang hawh bok tung,” ti hi.
3 Amuh ten, “Ka lak uhah hawh bok pahsun, kohte cu tai khawngin maw, ahimata a khenkhat a that khawng haw hei in, a ngalkap tei ca in imah dang cuang tukma hi. Nang pa khat cu keimuh tei ca in thawng sawm tuah bangten tuk hi. Hi khua ah umin bawmtu na kuat thei tale pha saw tuk hi,” tin ti haw hi.
4 “A phabel na tih uhmi cu bawl tung hi,” tin kumpipa in ti hi. Kongka elah dingin, a ngalkapte a thawng, a zain, a hawh haw cu zo hi.
5 Ngalkap hotu Joab, Abishai le Ittai lakah, “Keima ca na ngaihsutnak uhin Absalom cu liamsuah zal pahsuh un hi,” ti hi. Ngalkap hotu tei lakah David i thupiakmi cu ngalkap hempoh ten za khawng haw hi.
6 David i ngalkap ten Israel ngalkapte do tukin hawh haw a, Efraim Tupi sung pen dodun tawtok haw hi.
7 Israel ngalkapte cu David ngalkap ten neh haw a, mah ni-in ngalkap thawng sawm nih thi haw hi.
8 Muntihkim le ngam tihkim pen dodunin, hiamnamin, a thi mi sangin tuipi sungah a pai thongmi tam saw haw hi.
9 Phawhkhak ngawlin David ngalkapte le Absalom cu tawkdun lok haw hi. Absalom cu laak hum khungin, a laak cu sasua kungpi nuai pen tai in, thingkakin Absalom cu a lu pen awk hi. A laak cu tai suakin, Absalom cu a ke lei tong kha ngawlin thinghumah khai leng hi.
10 David i ngalkap pa khatin Absalom amuh ten, “Bawipa, sasua kung humah Absalom khai lengin mu ing,” tin Joab cu hilh hi.
11 Joab in, “Amah mu ngen, ita mah lai pen thatcih ma nge cim? Na thatta ahin keimah hihimin tangka cang sawm le taikhap pa khat pia tuk naveng,” ti hi.
12 Mahnaven mahpa in, “Tangka thawng khat na pia hei in kumpipa i capa cu ka khut mikawk hei in tawngkha tuk mang hi. Kumpipa in, keima ca ngaisungin Absalom cu liamsuah zal pahsuh un, tin nangmah le Abishai le Ittai lakah a thupiakmi cu za khawng ing.
13 Mah thu zui ngawlin Absalom cu ka that ahin kumpipa in theileh leleng tuk hi, mahten nangin, pan ngam tukin um mang,” ti hi.
14 Joab in, “Nang tuah otpihdun hi hun bo thong ei,” ti in, ceipi pa thum la in, sasua kungpi humah a nunglai in, a khai lengmi Absalom i thin pen sun hi.
15 Joab i ngalkap sawm khat ten Absalom cu kilin, that haw hi.
16 Joab in, a ngaldo haw cawl tukin pengkul tumin, a ngalkapte cu Israel mite a hilnak haw pen kik khawng haw hi.
17 Absalom i luang cu la in tukhaangpi sung a khuk thukpi sungah vawkin, a humah suang vun letlutin, vuk haw hi. Israel ngalkapte cu tai in, amu inn tenah pin haw hi.
18 Absalom cu a minsia dawntu tukin capa a neih ngawl hangin a nunlaihin kumpi Munlawn tihmi munah suangphut hi. Mah suangphut cu ama min la in minsa haw a, tusun tianin Absalom Suangphut tin sam vawk haw hi.
Absalom Thih Thu David Hilh Haw
19 Zadok i capa Ahimaaz in, “ Topa Pathian in kumpipa cu a ngal tei khut sung pen a hup hangin tai nang inna, mah thuthang pha cu hilh tung hi,” tin Joab lakah ti hi.
20 Joab in, “Hi ma hi, tuni in thuthang imah hilh pahsun. Na than nuam tale ni dangah than lehin hi; itahim titale kumpipa i capa a thih hangin tuni in hilh hih pahsun,” ti hi.
21 Ethiopia mi sal pa khat pa i lakah, “Hawh inna, na muhmi cu kumpipa hilhin hi,” tin Joab intik hi. Joab i mai ah upatnak pia in, a lu a kun nungten manlang zetin tai hi.
22 Ahimaaz in, “Itih bang tin, a cang hei in hi thu cu hilh leleng tung,” ti hi. Joab in, “Ita mah thuthan tuk cu nuam nge cim? Mah thu na that hangin laksawng ngah cuang tukma ci,” ti hi.
23 “Ilam banglam ahi vangin hawh leng tung,” tin Ahimaaz in ti hi. Joab in, “Mah ahi tale hawh pah ni ci,” ti in Ahimaaz cu hawh hi. Ahimaaz cu Jordan Munlawn lampi ah tai in, Joab i hahmi salpa makhelh hi.
24 David cu khuapi kongka pa nih laklawhah khung hi. Ngalviltu pa cu khuapi kulhtian humah kaito in, kongkhah zawnkekah ding hi. Khua a cuan ten mi pa khat tai li mu hi.
25 Kumpipa cu samin hilh hi. Thupuaktu pa cu nai dedeuh hi.
26 Mahten ngalviltu pa in midang pa khat tai li mu leleu hi. Kongkhah cingtu pa samin, “Zo hemin, midang pa khat tai li hi,” tin hilh hi.
Kumpipa in, “Amah vang thuthang pha hunpih hei!” tin ti hi.
27 Ngalviltu pa in, “Amasa pa i tai dan ka zoh ten Ahimaaz bang kek,” ti hi.
Kumpipa in, “Ahimaaz cu mipha hi, mah hangin thuthang pha puak hei,” ti hi.
28 Ahimaaz in kumpipa i lakah, “Thupha hi,” tin au hi. A mai ah bokin, “Kumpipa, nangmah a dodaltu hempoh humah nehnak a piatu Topa na Pathian thangphatin um hen,” ti hi.
29 Kumpipa in, “Absalom dam laih maw?” tin dong hi.
Ahimaaz in, “Bawipa, na ngalbawi Joab in keimah a hah laihin thubuai leita in i cang him tih ngangai cu thei mang hi,” ti hi.
30 “Hilai ah khin ding hihin hi,” tin kumpipa in ti in, Ahimaaz cu khawla thimah ding hi.
31 Ethiopia mi pa cu hengbokin kumpipa cu, “Maw kumpi pa, thuthang pha puak ing. Nangmah a dodaltu tei humah Topa Pathian in tuni in nehnak na humah pia zo,” ti hi.
32 “Absalom dam maw?” tin kumpipa in dong hi.
Ethiopia pa in, “Maw bawipa, Absalom bangin na ngalte le nangmah a dodaltu hempoh hi haw zal tahen,” ti hi.
33 Kumpi David cu a thasia zetin kongkhah hum a, khanah kaito in, “Maw ka capa Absalom, Absalom ka capa! Nangmah ai-in keimah saw ka thi saw ahin maw, ka capa! Maw Absalom, ka capa!” tin kap hi.