11
David le Bathsheba
1 Khal hun hengin kumpi tei ngaldo hun a hen ten, David in Joab le a khutnuai bawite le Israel ngalkapte cu ngaldo tukin kuat hi. Ammon ngalkapte nehin, a khuapi haw Rabbah cu kim haw hi. Mahnaven David cu Jerusalem ah um hi.Ref 11:1 1Khang 20:1;
2 Ni khat cu, taklam deuhin David cu sun a colhnak pen tho in, a inn humah kai hi. Inn humah a vah laih takin numei pa khat tuibual li in mu hi. Mah nu cu diang ngangai hi.
3 Mah hangin akua him tih thei nuamin mi pa khat hahin, Eliam i canu Hit mi Uriah i zi Bathsheba hi tih thei hi.
4 Bathsheba pui tukin David in midang hah lehleu in, a lakah hunpih hi. David in zaupih hi. Bathsheba cu ha sial a neihmi numei daan thianthohnak bawl ceng sem hi. Mah nungten a innah pin hi.
5 naupai ing tih a theih ten David lakah kamcah hi.
6 David in, Joab lakah mi hahin, “Hit mi Uriah cu ka lakah hungtikin hi,” ti hi. Joab in Uriah cu David lakah hah hi.
7 Uriah a hen ten David in ngalkap tei thu le a ngaldonak haw thute dong hi.
8 Uriah lakah, “Innah pin inna, cawlhih in hi,” tin David in ti hi. Uriah cu pinin, a innah David in laksawngte kuat hi.
9 Mahnaven Uriah cu a innah heng ma hi. Kumpipa i inn kongkhah a, kumpipa cingtu tei lakah cam hi.
10 David in Uriah cu a innah pin ma hi tih a zak ten samin, “Hun ngeipi na um nungten pin vecin ita na innah pin ngawlin um nge cim?” tin dong hi.
11 Uriah in, “Israel le Judah ngalkapte cu ngam khawla pi ah ngaldo in, deu sungah um haw a, Thutiam Kuang vang a lak hawah um hi. Ka bawipa Joab le a khutnuai bawi dangte cu hampa lakah ngiak haw hi. Mahlai takin, itin kaw ei le in tukin le ka zi lakah zau tukin ka innah ka pin theih tuk? Mahtibang cu bawl hihim tuk mang hi tin lei le van samin, thukam ing hi,” ti hi.
12 David in, “Tu ni cu hilai ah um inna, zingten kuatleh tung,” ti hi. Mah hangin mah ni cu Jerusalem ah um hi.
13 A zingten Uriah cu David in takeih do in, zukham misil zetin pia hi. Mahnaven mah zan vang cu innah pin cuang ma hi. A ma puan silhin kumpi inncingtu tei lak lelengah ngiak hi.
14 A zingten David in Joab lakah laikuatin Uriah piatik hi.
15 A lai sungah, “Uriah hi ngal a nasebelnak mun, mai lambelah hawhtikin hi. Nunglamah kik san inna, ngal ten that haw tahen,” tin ngan hi.
16 Mah hangin Ammon mitei khuapi a kipnak haw ngal a nasebel munah Uriah cu Joab in hawhtik hi.
17 Ngalte cu khuasung pan tulin Joab i ngalkapte tuah dodun haw hi. David i ngalbawi khenkhatte cu that haw a, Uriah vang that haw hi.
18 A dodunnak thu cu Joab in David lakah than hi.
19 A hahmi pa i lakah, “A ngaldonak uh thu a venghawngin, na hilh ceng ten,
20 kumpipa cu a thinuk kha tuk hi. Mah hangin ama in, ‘Ita Ammon mite do tukin a khuapi haw nek zetin hawh uh cim?
21 Gideon i capa Ahimelek a thahnak haw phawkngil zo uh cim? Thebez khua ah numei pa khatin pang hum pen cangngawinak sung ngengpi a humah khia in, a thih khi! Ita pang nek leita in hawh uh cim?’ a titale, ‘Na ngalbawi, Hit mi Uriah vang that haw hi,’ ti in hi,” tin cah hi.Ref 11:21 Thuk 9:53;
22 A hahmi pa cu David lakah hawhin, Joab i thucahmi bangin hilh khawng hi.
23 David lakah, “Keimuh sangin ngalte cu cak deuh haw hi, a khuapi sung haw pen tulin khua pualamah dodun ung. Mahnaven a khua kongkhah tian hil kikleh ung hi.
24 a pannak haw pang hum pen thalcang tuah kap haw in, bawipa, na ngalbawi khenkhat thi haw, Uriah vang that haw,” ti hi.
25 David in mahpa i lakah hi bangin hilh hi, “Joab lakah hilh inna, a thinnau pahsuh hen, itahim titale ngaldonakah akua thi tuk tih son ham theih ma hi. Nase saw deuhin, a khuapi cu do henna, lak tum hen,” ti hi.
26 A pasal thi tih Bathsheba in, a zak ten mithi ngai in um hi.
27 A mithi ngaih a phat ten David in mi hahin kumpi innah pui haw hi. A zi in cang a, capa hing hi. Mahnaven David i bawlmi humah Topa cu lungkim ma hi.