9
Pathian le A Tenmi Miphunte
1 Ka hilhmi hi thuman hi. Khrih ta ka hih hangin zolthu son mang hi. A sia le a pha khenkhuai theihnak Hawvang Thiangtho i ukmi ka lungmu in zolthu ka son ngawlnak cu ciang zetin hilh hi.
2 Ka khawngai leita ing; ka thinnatnak cu bo ni nei awng tukma hi.
3 Ka thi le sa ka phunpih tei ca in! Amuhte hangin keimah saw hi Khrih pen khenkhekmi le Pathian i tamsiatnak nuai a ummi ka hi saw ahin nuam ing.
4 Amuhte cu Pathian i mihingte haw hi; Pathian in, a cate ah bawlin, a sunlawinak cu amu lakah langtik hi. Amuh tuah thutepnakte hei bawlin amu lakah Daan vang pia hi. A thumanmi biaknak cu nei in, Pathian i thutiamnak a cotu haw hi.Ref 9:4 Suah 9:4;
5 A muhte cu ka pu le pa uh Hebru mi minthangzet tei sung pen a tulmi haw hi; mahten mihing lam pen a ngaisung uh ahi tale Khrih vang cu a sangngam pih haw hi. Ihempoh a uk khawngtu Pathian cu kumkhua in thangphat hi tahen! Amen.
6 Pathian i thutepnak cu kimcang ma ka tihnak kha ma hi. Itahim titale Israel mi venghawngin Pathian i mihing hi khawng haw ma hi.
7 Abraham i casuante hei a venghawng haw in Pathian cate hi khawng sap haw ma hi. Pathian in Abraham lakah, “Casuante tin ka sam tuk mite cu Isaak sungsuakte hi haw tuk,” ti hi.Ref 9:7 Pian 21:12
8 A sullam cu: mihing hihnak daan in hinmi cate cu Pathian cate tihnak kha ma hi;a 9:8 Hi mi i a tih nuambel cu Abraham in Hagar tuah a hin haw mi ca Ishmael khi hi. Pathian i thutepnakin hinmi casuante bek khi casuan tatakin sial tukmi tihnak hi.Ref 9.8 Pian 3:22-23;
9 Itahim titale Pathian i thutepnak cu hitin um hi: “A hunkim ten hungleh tung a, Sarah in capa nei tuk,” ti hi.Ref 9:9 Pian 18:10;
10 Hi bek kha ma laih hi. Itahim titale Rebeka i capa pa nih ten pa nei haw a, amah cu keimuh cikhaihtu Isaak hi.
11-12 Mahnaven tenmi capa pa khatin Pathian i tuptahmi a kim theihnak tukin Pathian in Rebeka lakah, “A u in, a nau i na dek tuk,” ti hi. Pathian in hi thu hi amuh tei pian laih ngawlin hilh zo hi, a sia le pha a bawl haw laih ngawlin a hilhmi hi. Mah hangin Pathian in mi a tennak cu a bawl cangkimnak hangin hi saw ngawlin amah in, a sam hangin saw na hi.Ref 9:11-12 Pian 25:23;
13 Lai Thiangtho hei in, “Jakob cu it ing, Esau cu hua ing,” ti hi.Ref 9:13 Mal 1:2-3;
14 Mahti bang ahi tale Pathian cu lamcam ma hi tin tithei nung maw? Ti thei hihim tukma hung!
15 Itahim titale Moses lakah, “Ka hehpih nuammite hehpih tung a, ka patpih nuammi tei humah panpih tung,” ti hi.Ref 9:15 Suah 33:19;
16 Mah hangin ihempoh mihing tei deihnak le a bawlnak haw hang hi ngawlin Pathian i hehpihnak a um hangin hi saw hi.
17 Izipt ngam a, Faro kumpipa i thu ah Lai Thiangtho in, “Nangmah cu kumpi in bawl ing a, leihum hempoh ah ka huham langtik tukin le ka min na thantiknak tukin teng ing hi,” tin ti hi.Ref 9:17 Suah 9:16;
18 Mah hangin Pathian in, a nuammi hehpihin, thin a khohtik nuammi khohtik hi.
Pathian i Thinuknak le Hehpihnak
19 Mahnaven nangmu lak pen pa kha khatin ka lakah, “Hitih bang ahi ngangai ahin, itin kaw Pathian in mi a mawhsiat theih tuk? Pathian i deihmi le a tumtahmi cu akua in el thei tuk him?” tin dong tuk uh ci.
20 Mahnaven, ngualcam pa, mahtin Pathian a nial ngamtu akua uh cim? Beel in beel bawlpa i lakah, “Itakaw kei hi tin na bawl?” tin dong awng maw?Ref 9:20 Isa 29:16; 45:9;
21 Thungai ti ahin, beel bawlpa in beel lei khi ama deih bangin bawl theihnak thunei hi; a nuam tale beellei lom khat pen beel pa nih hei bawl thei; pa khat cu hun thupi ten man tuk, pa khat cu nisial man thong tukin bawl thei hi.
22 Mahti bang bok lengin Pathian i thil bawldanah hei in, hi bok hi. A thinuknak langtik tukin le a huham muhnak tuk khi deih hi. Mahnaven a thinuknak a thuaktu tuk le siatsuahnak a tawktu tuk tei humah a thinsau zetin hehpihzet sih hi.
23 a cangkimmi sunlawinak hei cu langtik nuamin, a cotu tukin teksa a hih uh hangin a hehpihnak a cotu ohtei humah a sunlawinak cu leihsuk hi.
24 Itahim titale ohte cu ama mihing a sammite hung hi; Judah tei sung pen sammi bek hi ngawlin Gentail tei sung pen sammite hung hi.
25 Pathian in Hosea laibu sungah,
“Ka mihing, ahi ngawlte khi,
‘Ka mihing,’ tin ti tung.
Ka deih ngawlmi hinnam vang,
‘Ka ihmi,’ tin sam tung.Ref 9:25 Hos 2:23;
26 ‘Nohte cu ka mihing
hi kha ma uh ci tin,’
a tihnak munah amuhte cu
a nungmi Pathian ca in,
tin sam hi haw tuk hi,”
tin ti hi.Ref 9:26 Hos 2:23;
27 Profet Isaiah in Israel tei thu ah, “Israel mite cu tuipi thuanthum mawk a, ngunphil zahin, a tam haw hei in mi dawmno bek nunpat hi haw tuk hi.
28 Itahim titale a ngeican um ngawlin hi leihum thu cu Pathian in khen tuk,” ti hi.Ref 9:27-28 Isa 10:22-23;
29 A laih ngawl deuhin Isaiah lelengin, “Cungnungbel Topa in casuan khenkhatte khawih ngawlin a umta ahin Sodom le Gomorah bangin hi zo tuk toh hung hi,” tin, a tih bangkek khin hi.Ref 9:29 Isa 1:9;
Paul In Israel Mitei Ca Thungen
30 Mah hangin, hitin hilh ung; Pathian tuah lemdunnak bawl awng ngawltu Gentail mite cu a upnak haw i hangin Pathian tuah lemdun zo haw hi.
31 Mahnaven Pathian i mihingte Pathian tuah lemdun nuamin daan a zei litute in mah lemnak cu tawk haw ma hi.
32 I hangin kaw? Upnak sangin a dehnak haw a muan saw haw hangin hi. “Lupbahnak suang,” humah lumin bah haw hi.
33 Mah sung thu ah Lai Thiangtho in:
“Zo in, Zion ah
suang pa khat koih ing,
mahmi hangin mi tampi bahin,
lum haw tuk hi,
Mah suangin mi lumtik tuk hi.
Mahnaven ama thu
a umtute cu mualpho
haw tukma,” ti hi.Ref 9:33 Isa 28:16;