7
Huaidunnak Pen Tehkipnak
1 U le naute, na venghawng uhin daan lam thutheitu na hih uh hangin, ka hilh tukmi vang theibel tuktoh uh ci.
2 Mihing hi nunsung bek daan in uk hi. Tehkipnakin, pasal nei numei pa khat cu a pasal i nun sung bek daan in uk hi; A pasal a thi tale, a pasal tuah a lenkhimtu daan pen luat hi.
3 Pasalte nungleng napi in pano dang tuah a um kawm haw tale nupa sualnak a bawltu hi; mahnaven a pasal a thi tale midang a pasal vangin nupa sualnak bawltu hi lehma toh hi.
4 U le naute, nangmu thu ah vang mahtih bang lelengin hi. Daan thu son ka hi tale, nohte cu Khrih pumpi i khenkhat na hih zo uh hangin a thi mi hi uh ci. Mahnaven atu-in Pathian i nadehnakah nemcuammi na hih theihnak tukin thihnak pen thawhlehtikmi pa ta hi zo uh ci.
5 Itahim titale mihing nundan in, a nunlaih uhin, a taksa uh i sualnuamnak cu Daan in, a taksa sung uhah na dektikin, a ngah a muh uhmi cu thihnak hi.
6 Mahnaven atu-in Daan pen luat zo hung hi; itahim titale sila in, a cangtiktu daanah mithi hi zo hung hi. Lai tuah ngatmi daan i lampi lun tuah hi ngawlin hawvang i piakmi lampi thak sungah Pathian i na dek hung hi.
Daan le Sualnak
7 Mahti bang ahi tale itin ti kam nung? Daan hihim hi sualnak hi, tituk hung maw? Ti hihim tukma! Mahnaven sualnak cu sualnak hi tin, a theitiktu cu Daan hi. Daan in, “Midang tei thil hawza pahsun,” a ti ma tale, midang tei thil hawzak cu i him tih thei tukma hung hi.Ref 7:7 Suah 20:17; Daan 5:21;
8 Mahnaven sualnakin mah thukham cu mangin ka pumpi sungah deihnak le nuamnak a phunkim suaktik hi. Daan um ngawlnakah sualnak cu a thi hi.
9 Keimah vang daan tel ngawlin a nungmi ing hi, mahnaven thu kham hangin sualnak cu nungin, kei cu thi ing.
10 Nunnak piatu tuk tihmi thukham cu kei ca in thihnak hi.
11 Sualnakin hunpha ngahin thukham cu a hiamnamah mangin, zolin kei cu that hi.Ref 7:11 Pian 3:13;
12 Daan amah ngangai cu thiangtho in thukham vang cu thiangtho hi, a dikmi hi in, a pha mi hi.
13 Mahtin ahi tale, a phami cu kei ca in, ka thihnakin cang lamsang ma maw? Mahti bang tuk kha ma! Thihnak a bawltu ngangai cu sualnak hi. Sualnakin sualnak ngangai i a hihdan langtik tukin phatnak mangin ka humah thihnak hengtik hi. Mah hangin thukhamin sualnak cu mullinghah sualnak a hihlam langtik hi.
Mihing Lungmu Sung Buainak
14 Daan cu hawvang lam thil hi tih khi thei hung hi; mahnaven kei cu tisa mi ing a, sualnak i sila tukin zuakmi ing.
15 Thil ka bawlmi hi a sullam thei mang, itahim titale ka bawl nuammi khi bawl ngawlin ka nuam ngawlmi saw khi bawl ing. Ref 7:15 Gal 5:17;
16 Bawl ka nuam ngawlmi ka bawl hangin Daan cu man hi tin ka lungkim pihnak lang hi.
17 Mah hangin hi tin, a bawl litu ngangai cu keimah hi kha mang hi; ka sung a ummi sualnak na hi saw hi.
18 Mihing ka hihnak sungah phatnak nei viang mang tih cu thei ing. Itahim titale a phami bawl nuamnak cu ka sungah a um vangin, a phami bawl thei hihim mang hi;
19 A pha bawl nuammi khi bawl mang hi; a pha ngawl, bawl tuk ka nuam ngawl saw bawl ing.
20 Ka bawl nuam ngawlmi ka bawlta ahin, a sullam cu a bawltu khi kei kha mang hi, ka sungah a nungmi sualnak hi saw hi.
21 Mah hangin ka sung a, thil a piang dan hi thei ing, a phami bawl tuk ka nuam ten, ka ten ngahmi cu a pha ngawlmi ngeh na hi saw hi.
22 Ka sungmu ngilin, Pathian i daanah lungdam hi.
23 Mahnaven ka taksa sungah daan dang nadek boktu um hi; mah daan cu ka lungmu sungin, pha a tihmi a dodaltu khi hi. Mahmi in ka taksa sungah a nadehmi sualnak daan nuai ah sila bangin tangtik hi.
24 Mi lungkham hi thong sing maw! Thihnak lamah a kholtu hi taksa pumpi pen akua in pan suak thei tuk him?
25 Pathian nelah thangphatnak um tahen; Pathian amah in, a Topa uh Jesuh Khrih i hangin pan suak hi. Ka hihdan ngangai cu hi bangin hi, keima bulin ka lungmu bekin Pathian i daan cu zui ing hi; mahnaven mihing ka hihnak tatakin sualnak daan zui hi.