14
Midang Sonsia Pahsun
1 Upnak lam pen a zawngkhalte khi komno in zo unna; ama bulpak upnak khi el li pahsuh un.Ref 14:1-6 Kol 2:16;
2 Mi pa khat i upnakah ihempoh eih theih hi, tin um hi; mahnaven upnak a niam laih mite cu anceh sawlbawkte bek ei hi.
3 Ihempoh a eitu in, a duh na poh a ei ngawltu pa khi nautat tuk kha ma hi, mahtih bangbok lengin anceh sawlbawk bek a eitu pa hei in ihempoh a eitu pa khi a sonsiat bok tuk ngawlmi hi; itahim titale amah cu Pathian i cosanmi hi bok hi.
4 Mi pa khat i umlawh thu ah i hangin kaw thukhentu na nadeh nuam lih uh? A umlawh cu lawhting maw tingsam kaw tih cu a Topa i thubek hi. Mahnaven a lawhtingmi hi tuk, itahim titale Topa in lawhtingin bawl thei hi.
5 Mi pa khatin, ni dang tampi lak pen ni khat cu thupi cuangin bawl hi; mahten midang pa khatin ni hempoh cu a bangten khawngin ngaisung hi. Amuh tekin, a lungmu sung hawah khencatnak nei cangcian tek haw tahen.
6 Mi pa khatin ni khat cu a sunglawi cuangin, a ngaisung tale mahmi cu Topa upatnakin, a bawlmi hi; ihempoh a ei theitu pa hei in Topa upatnakin, a bawlmi hi; Itahim titale a eihmi an hangin Pathian nelah a lungdamnak langtik hi. Ihempoh a ei ngawltu hei in, Topa upatnakin, a bawlmi hi a, Pathian nelah lungdamnakin langtik bok hi.
7 Kuamah in eimu ca bekin nungma hung hi; kuamah in eimu ca bekin thi ma hung hi.
8 A nung uh ahi tale Topa i ca in nung hungin; a thi uh ahi tale Topa i ca in thi hung hi. A nun uhah hihen, a thih uhah hihen Topa ta hung hi.
9 Itahim titale a nungmi le a thi mitei Topa hi tukin Khrih cu thi in nungleh zo hi.
10 Mah hangin noh anceh sawlbawk eitu ten na unaupih uhte, ita sonsia li uh cim? Noh ihempoh eitute, itakaw na unaupih uhte na nautat lih uh? A venghawng uhin Pathian mai ah ding tuk hung a, aman eimu thukhen tuk hi.Ref 14:10 2Kor 5:10;
11 Lai Thiangtho sungah,
“A nungmi Pathian keima mai ah,
mi hempoh ten khukdinin,
Pathian ka hihnak khi
phuang haw tuk hi, tin
Topa in ti hi,” tin um hi.Ref 14:11 Isa 45:23;
12 Mah hangin kuakua hei hihen a venghawng uhin, a nunnak uh le a dehnak uh cu Pathian mai ah a hilhciangleh ten tuk hung hi.
Na Unau Lumbahtik Pahsun
13 Mah hangin pa khat le pa khat sonsiat dunnakte cawl toh nung. Mah sangin sualnakah a lupbah tuk ngawlin ngaisung saw un hi.
14 An eih thiang ngawl tihmi imah umma tih khi Topa Jesuh tuah ka pehzopnak thawmin thei ing. Mahnaven an khenkhatte cu eih thiang ngawl haw hi tin mi pa khatin, a um tale mahtin a umtu pa i ca in mah an cu a thiang ngawlmi hi.
15 Pa kha khat na eihnak hangin na unaupih lung na siatik tale mahmi cu itdunnak i a langtikmi bawlnak hi lehma toh hi. An na eihmi in Khrih pih uh mi pa khat siatsuahnak tawktik pahsun hi.
16 Thilpha tin na ngaihsutmi khi minsiatnak cangtik pahsun.
17 Itahim titale Pathian Uknak cu ei le in hi saw ngawlin; Hawvang Thiangtho i piakmi dikcangnak, lemdaihnak le lungdamnakte hi saw hi.
18 Mahti bangin mi pa kha khatin Khrih i na a dek tale, mahmi pa in Pathian lungdamtikin, mihing tei lungkimpihnak vang co hi.
19 Mahtin a hih hangin, lemdaihnak a hengtiktu le pa khat le pa khat laklawhah cahnak a hengtiktu nate cu a zocik leleng tuk uhmite haw hi.
20 An hangin Pathian i bawlsami siatsuah pahsuh un. An hempoh cu eih pha khawng haw poh naven mi pa kha khat sualnakah a caktiktu an cu itih bang an hei hihen eih tuk kha ma hi.
21 Na u le nau tei lupbahnak a piangtiktu cu itih bang thil ahi hei in bawl ngawlin, sabittui in ngawlin le cik hei ei ngawlin um pha saw hi.
22 Hitih bang thu ah nangmahno na ngaihsutnak lungmu nei inna, nangmah le na Pathian i laklawh a thu in koihin hi. Man hi tin, a ngaihsutmi bawlsuakin, a sikleh ngawlmi cu mi lungdammi hi.
23 Mahnaven a eih ten lungmu aicannak tuah a ei tale Pathian in mawhsiat tuk hi. Itahim titale a bawlmi khi upnak tuah bawl ma hi. Upnak humah bulphuh ngawlin bawlmi hempoh cu sual hi.