26
Judah Kumpi Uzziah
(2Kum 14:21; 15:1-7)
1 Judah ten Amaziah capa, kum sawm le kum lukmi, Uzziah cu a pa ai-awhin kumpi dek tukin teng haw hi.
2 (A pa Amaziah thih nungten Uzziah in Elath khua la lehin, khuapi cu sakikleh hi.)
3 Uzziah cu kum sawm le kum luk a kim ten kumpi dekin, Jerusalem pen kum sawm nga le kum nih sung uk hi. A nu cu Jerusalem khua mi Jekoliah hi.
4 A pa i nundan zui in, Topa i mai ah thilpha bawlin Topa lungdamtik hi.
5 Uzziah cu Zekhariah in Topa kihca le upat tuk zilhin, Zekhariah i dam sung cu Topa i na kom zetin dek hi. Mah hangin Topa in muicu pia hi.
6 Uzziah in Filistin ngam hawhin do hi. Gath, Jamnia le Ashdod khua kulhtiante siatsuah khawngin, Ashdod elkim le Filistin ngam mun dadangah kulhtian khua siatsuah khawng hi.
7 Pathian bopnakin Filistin mi, Gurbaal a um mi, Arab mi le Meun mite neh hi.
8 Ammon miten Uzziah lakah siah pia haw hi. Uzziah cu thunei zetin Izipt ngam tian a minthang hi.
9 Uzziah in Jerusalem upnak kulhtian cu kho dedeuhin bawl hi, khua ning kongka, munlawn kongka le kulhtian a ning hempoh ah ngalvilnak innkua pih sa hi.
10 Ngamlak hei ah kulhtian tuah upmi ngalvilnak tausangpi sa hi. Ngan tampi a neih hangin nitumnak lam mualbul le munlawnah tuikhuk tampi co hi. Lobun lam a deih hangin mualhum ngamah le ngampha mun tihkimah sabit dum bawl tuk le lo bawl tukin mipite sosuah hi.
11 Ngaldo zilsa ngalkap tamzet nei hi. Ngalkap mipum cazin cu kumpi khutnuai a, ngalbawi pa khat Hananiah in ho a, kumpipa i sungta pa nih Jeiel le Maaseiah ten len haw hi.
12 A ngalkapte uktu tukin ngalbawi thawng nih le za luk um haw hi.
13 A khutnuai ah ngalkap thawng za thum le thawng salih le za ngate, kumpipa i ngal dotu tukin tuangtim sa lelengin um haw hi.
14 Uzziah in, a ngalkapte cu lumphaw ceipi thik lukhu, thik angki, thalcangte le kaihbu tihmi suangkapnak saili le a kapnak tuk suangpim tian pia hi.
15 Jerusalem khua ngalvilnak innkua le kulhtian a ning tihkimah thang hi. Pathian bopnak nase zetin, a ngah hangin a huham neizet hi.
A Uangthuan Hangin Dantat
16 Mahnaven kumpi Uzziah cu huham neizet a hih ten mi uangkho thei zetin suak, mah a ultunnakin, amah cu dok vawk hi. Topa a Pathian a langpang hangin Biakinn sungah hawhin, namtui halnak biaklandawhah namtui haal hi.
17 Thiampi Azariah le mi ngilzet le ngalphazet thiampi sawm liat ten,
18 kham tukin kumpipa cu zui haw hi. Thiampi ten, “Uzziah, nangin Topa i lakah namtui haal theihnak thunei ma ci. Aaron casuan thiampite bekin hi nadeh dek tukin thianthohtikmi haw hi. Hi mun thiangtho pen tai in hi. Topa Pathian cu a thinuktik na hih hangin muicu pialeh tukma toh hi,” tin ti haw hi.Ref 26:18 Suah 30:7-8; Mipum 3:10;
19 Uzziah cu Biakinn sung namtui halnak biaklandawh elah dingin namtui halnak kuang cu cawi leleng hi. Thiampi tei humah thinukin, mahbek ten a calah phaaknat suaktul hi.
20 Azariah le thiampi dang ten mulcangsuakin, kumpipa i cal cu zo leleng haw, mah nungten Biakinn pen tai tukin hawlvawk haw hi. Pathian in, a bawlsiat hangin amah vang amthongin pualamah tul hi.
21 A nun sung hempoh a phaaknat hangin kumpi Uzziah cu mi thiangtho ngawlin suak. Biakinn sungah tum thei ngawltohin, a innsung bekah umin, a nadeh hempoh cu dawn haw in, a capa Jotham in ngam uk hi.
22 Kumpi Uzziah in ngam a uk sungin a nadehmi dangte cu Amoz i capa profet Isaiah in laisungah ngan khawng hi.
23 Uzziah cu thi in, kumpi tei khanmualah vui haw hi. Mahnaven a natnak hangin kumpite a vui meknak haw khanah vui haw ma hi. A capa Jotham in kumpi dek hi.Ref 26:23 Isa 6:1;