11
David Cu Judah le Israel Kumpi Hi
(2Sam 5:1-10)
1 Israel mite cu a venghawngin, David umnak Hebron ah hung haw in, a lakah, “Kohte cu na thi le sa ung hi.
2 A bosa hun sungah Saul kumpi a hih laihin, Israel mite cu ngaldonakah pui in mahti bangin pui tukin le amuhte uktu tukin Topa na Pathian in thutiam zo hi,” tin ti haw hi.
3 Israel mi hotute cu David umnak Hebron ah hung khawng haw in, Topa i mitmuhin David tuah thutepnak bawl haw hi. Samuel lak pen Topa i thutepnak bangin David cu Israel kumpi tukin sathau thih haw hi.
4 Kumpi David le Israel mite cu hawh haw in, Jerusalem khuapi do haw hi. Jerusalem khuapi cu mahlai in Jebus ti haw hi; a um masabel Jebus mite cu mahlai ah um haw laih hi. Ref 11:4 Josh 15:63; Thuk 1:21;
5 Jebus miten David cu, “Ka khuapi sungah tum thei awng tukma ci,” ti haw hi. Mahnaven Zion a, a kulhtian haw cu David in la in, a khuapi haw cu, “David khuapi,” in suak hi.
6 David in, “Jebus mi a that masabeltu cu ka ngalkap hotu bawi hi tuk hi,” ti hi. Zeruiah capa Joab mapuinakin do haw a, amah cu ngalkap hotu bawi in suak ngangai hi.
7 Ngal kulhtian sunglamah David cu hawhin, a umcih nom hangin, “David khuapi,” tin sam hawta hi.
8 Mah ngal kulhtian i nisuahnak lam Millo a tihnak mun haw pepan khuapi kimkot kulhtian cu David in lemleh a, khuapi sung cu Joab in lemleh hi.
9 A lakah Cungnungbel Topa a um hangin David in ni khat nung ni khat cakin, khangto dedeuh hi.
David Ngalkap Minthangte
(2Sam 23:8-39)
10 David i ngalkap minthangte cu a nuailamte hihi. Amuh ten Israel midangte tuah David cu kumpi hi tukin bawm haw, Topa i thutepnak bangin a uknak cu kho dedeuhin bawl haw hi.
11 Ngalkap minthang masabel cu Hakmon hinnam Jashobeam hi, amah cu, “Ngalpha Pa thum” tei lak pen hotu hi. Jashobeam in, a ngal haw mihing za thum cu a ceipi tuah do in, that khawng hi.
12 Hi “Pa thum” tei lak pen a pa nihnak cu Ahoh hinnam Dode i capa Eleazar hi.
13 Pasdammin a tih haw mi munah Filistin ngalte cu David tuah do haw hi. Barli sangvut lo sungah sihsan khualin, Israel ngalkapte a taikeh lih haw laih takin,
14 Eleazar le a ngalkapte cu lo sungah panmun la in, Filistin mite cu do het haw hi. Topa in, a hum hawah nehnak nasezet pia hi.
15 Vei khat cu Filistin ngalte Refaim munlawnah a um haw laihin, a minthang zetmi Israel ngalbawi sawm thum sung pen pa thum cu Adullam suangbuk el a, suang lakah David a umlaihin, a lakah hawh haw hi.
16 David cu kulhtian mualhumah umin, Bethlehem cu Filistin miten la haw hi.
17 David cu innlam ngai zetin, “Aw, Bethlehem kongkhah el tuikhuk a, tui in tukin pa kha khatin, a pia haw ahin, deih sing!” tin ti li hi.
18 Mah hangin ngalkap minthang pa thumte cu hawh haw a, Filistin ngalkap tei umnak lakah nawkvawkin, mah tuikhuk a, tui cu cawi in David pia haw hi. David in, tui cu in ma hi; Topa i piakmi tui hi tin lei in,
19 “Itin kaw hi tui cu ka in theih tuk? A nunnak haw hei ngaisung ngawlin a cawi haw mi, tui a hih hangin, hi tui intuk cu a thisan haw in tuah bangten tuk hi,” ti hi. Mah hangin mah tui cu a in ngawlnak hi. Ngalkap minthang pa thum tei nadeh pha mi sung pen hi cu pa khat na hi, hi.
20 Joab unau Abishai cu, “Minthang Sawm thumte,” lak pen minthangbel hi.
21 Sawm thum Tei lak pen minthangbel a hih hangin a hotu haw in suak naven, “Pa thumte” bang ngai in minthang ma hi.
22 Kabzeel khua mi Jehoiada capa Benaiah cu ngalkap minthangzet hi. Ngalpha zetin, a nadehmi tampi um; Moab ngalbawi ngilzet pa nihte vang that hi. Vei khat cu vuk tamzet a cak ni-in, leihol sungah tumin kiosa that hi.
23 Mi ngengzet le mi sangzet, pi salih le lang sangin ceipi thiampheng tia a cawitu Izipt mipa vang that hi. Mahpa cu tembek tuah dawkin, Izipt pa i khut a, ceipi cu longin, mah ceipi cu amah thahnakin mang hi.
24 Jehoiada capa Benaiah i ngalpha zetin, a nadeh mite hi; “Sawm thumte” lak pen pa khat na hi bok hi.
25 “Sawm Thumte” lak pen minthang pa khat cu hi naven, “Pa thumte” cu bang ma hi. David in amah cingtu hotu in koih hi.
26-47 A nuailamte hi ngalkap minthang haw hi.
Joab unau Asahel,
Bethlehem pen Dode capa Elhanan
Harad pen Shammoth,
Pelet pen Helez,
Tekoa pen Ikkesh capa Ira,
Anathoth pen Abiezer,
Hushah pen Sibbekai,
Ahoh pen Ilai,
Netofah pen Maharai,
Netofah pen Baanah capa Heled
Benjamin ngam Gibeah pen Ribai capa Ithai,
Pirathon pen Benaiah,
Gaash el munlawn pen Hurai,
Arbah pen Abiel,
Bahuruim pen Azmaveth,
Shaalbon pen Eliahba,
Gizon pen Hashem,
Harar pen Shagee capa Jonathan,
Harar pen Sakhar capa Ahiam,
Ur capa Elifal,
Mekherah pen Hefer,
Pelon pen Ahijah,
Karmel pen Hezro,
Ezbai capa Naarai,
Nathan unau Joel,
Hagri capa Mibhar,
Ammon pen Zelek,
Beeroth pen Naharai. Naharai cu Joab hiamnam puatu hi.
Jattir pen Ira le Gareb,
Hit mi Uriah,
Ahlai capa Zabad
Shiza capa Adina. Adina cu Reuben hinnam sung pen minthang hi a, ngalkap sawm thum neitu hi.
Maakah capa Hanan,
Mithan pen Joshafat,
Ashterah pen Uzzia,
Aroer pen Hotham capa Shamma le Jeiel,
Tiz pen Shimri capa Jediael le Joha,
Mahavah pen Eliel,
Elnaam capa Jeribai le Joshoviah,
Moab pen Ithmah,
Zobah pen Eliel, Obed le Jaasiel.