SAAM LABU 78
Pathian le A Mihingte
1 Maw ka mihingte ka zilhmi thu
hi ngai un,
ka thuzilhmi hi na benghek hih un
2 Nangmu nelah thu hilh tung:
A bosa mi kum le hun a,
thulamdangte hilh tung.Ref 78:2 Mt 13:35;
3 A beng uh i zaksa mi le
a lungmu uh i theihsa mi,
A pu le pa tei hilhsa mi thute hi.
4 Mah thu cu a cano tei lakah
im ngawlin, Topa i
huham le a thawmngeng i bawlmi
nalamdangte cu khangleh tei lakah vang
son tuk hung hi.
5 Israel tei nelah daan pia in,
Jakob i casuan tei nelah daan pia hi.
A ca tei nelah hilh tukin
a pu le pa tei lakah
thukham pia hi.
6 A ca haw ten amu ca tei nelah
hilh haw in mah a ca haw ten
amuh tei nelah hilh sawlawn
pepel tukin piak hi.
7 Hitih bangin amuhte vangin
Pathian muang haw tuk a,
nalamdang a bawl mite
phawkngil ngawlin
a thukhamte zui leleng haw tuk hi.
8 Amuhte cu Pathian awnkam
ngai ngawlin,
mi langpang thei a pu le a pa bang
hi haw ma hi,
A pu le pate cu ituk mahten
Pathian muangkho ngawltu le,
Pathian i muantakin
a um awng ngawl hi haw hi.
9 Thal le thalcang tuah ngal
a dotu Efraim mite cu
ngaldo hun a hen ngangai ten
taikek khawng haw hi.
10 Pathian tuah thu a tep haw mi
zui haw ma hi.
A daan hei zui haw ma hi.
11 A bawlsate le a mu hum a,
nalamdang a bawl mite
phawkngil zo haw hi.
12 Izipt ngamsung Zoan
munlawn a,
Pathian nalamdang a bawlmi cu
a pu le pa ten mu haw hi.Ref 78:12 Suah 7:8-12:32;
13 Pathian in tuipi cu khenin,
tuite cu pang bangin dingtik hi.
Mahlai pen lamhuai hi.Ref 78:13 Suah 14:21-22;
14 Sunah meingo pi tuah lamhuai in,
zanah mei alh pi tuah
lamhuai hi.Ref 78:14 Suah 13:21-22;
15 Phillawn ngamkhing a
suangtum ngengpite cu
kehtikin, a in haw tuk lei thukpi a,
tui cu puttik hi.Ref 78:15-16 Suah 17:1-7; Mipum 20:2-13
16 Suangpi sung pen tui puttikin
tui cu lui bangin luangtik hi.
17 Mahnaven Pathian humah
sual leleng haw hi.
Cungnungbel Topa dodalin,
phillawn ngamkhingah
ngal tho leng haw hi.
18 Pathian cu khingkhai him haw in,Ref 78:18-31 Suah 16:2-15; Mipum 11:4-23, 31-35;
a deihmi an ngen him haw hi.
19 Pathian cu sonsia in,
“Phillawn ngamkhingah
Pathian in cabuai tuah
an pia thei ngai ni maw?
20 Suangpi cu vatin tui cu
put hehu hi;
Mahnaven cangho pia thei
ngai ni maw?
A mihing tei ca in,
cik pia thei ngai ni maw?”
tin dong haw laih hi.
21 Topa in, a ot haw
a zak ten thinukin a miphunte cu
mei tuah bawlsia in, a thinuknak cu
a miphun tei humah nase dedeuh hi.
22 Topa cu a thinukin,
a mihingte mei tuah bawlsia hi.
Amuh cu Topa muang ngawlin le
Topa in nunpan thei tuk hi tin,
muang haw ngawlin
a thinuk pulhang sesem hi.
23 Mahnaven humlam van cu
thu hilhin, a kongkate
hong tukin thupia hi.
24 Van pen an pia in,
a eih haw tuk manna
caksuktik hi.Ref 78:24 Jn 6:31;
25 Hitih bangin vancungmi tei
an ei haw in,
Pathian in, a eih theih haw zahin
pia hi.
26 Mahceng ten nisuahnak lam
huihtheutik hi;
Hanglam huih cu a huham tuah
thotikin,
27 Amuh tei lakah vano cu
leivul zahin hah hi.
Tuipi el a philnel zah haw hi.
28 A ngiahnak haw laizang,
a puanbuk elah ahon ahonin
caak menmun haw hi.
29 Deih le val ei in,
a lungkimzet haw hi,
Pathian in, a kinmi haw hempoh
pia hi.
30 Mahnaven a eih laihtak haw in,
a khenkhat cu tai zetin,
a eih man lai haw ngawlin hi.
31 Pathian cu amuh tei humah
a thinukin amu sung pen
Mi ngilbel Israel mi lak pen
32 Mahtibang nalamdang tampi bawl naven
a mihingte sual leng haw hi.
A Pathian haw cu muang haw ma hi.
33 Mah hangin a damsung haw
ni khua cu haihawh bang comtikin,
A nunnak haw upmawh khak ngawlin
siatsuahnak tawk haw hi.
34 Mi khenkhatte a thihtik ceng ten
a dangte cu a nelah kikleh haw hi.
A sualnak haw sik lehin
lungmu tak tuah
ama lakah thungen haw hi.
35 Pathian cu amuh huptu hi tih
theileh haw in,
Cungnungbel cu amuh pantu hi
tihmi phawkleh haw hi.
36 Mahnaven a kam haw tuah
pak hemin, a otmi haw
hempoh cu zolthu ngeh hi.
Thungai imah umma hi.
37 A lakah muantakin um haw ma hi.
Amah tuah a thutepmi
kimtik haw ma hi.Ref 78:37 Nung 8:21;
38 Mahnaven Pathian cu
a mihingte hehpihzet hi.
A sualnak haw ngaidamin,
siatsuah ma hi.
Vei tampi thinuknakte supin,
pholhsuah zezen ma hi.
39 A mihingte cu mi thawthong hi haw a,
huih bang theu in,
a thamleh thongmi bang haw hi,
tih cu cing leleng hi.
40 Vei izah him phillawn ngamah
Pathian langpang tukin
ngal a thawh uh!
Vei izong thasiatik uh cim?
41 Atu le tu Pathian cu
khingkhai haw in
Israel tei a thiangtho
Pathian cu a thinuktik haw hi.
42 A huham ngeng dan cu
phawkngil haw hi!
A ngal tei khut sung pen
a humhimnak huhamte
theileh haw ma toh hi.
43 Izipt ngamsung Zoan lawnlai a,
thasiahhuai nalamdang
a bawl mite phawkleh
haw ma toh hi.
44 A lui haw hempoh thisanin
cangtik khawng hi.
Izipt mite cu a lui haw pen,
tui ngah theileh haw ma toh hi.Ref 78:44 Suah 7:17-21;
45 Amuh tei lakah tho hahin
susia hi.
Simphuk vang hahin,
a lo haw siatsuah khawng hi.Ref 78:45 Suah 8:1-6, 20-24;
46 A lo ante ei khawng tukin le
a lo haw siatsuah tukin
khaau hah hi.Ref 78:46 Suah 10:12-15;
47 A sabit kung haw cu
nialin khiak khawngin,
a theikung haw cu vukin
thitik khawng hi.Ref 78:47-48 Suah 9:22-25;
48 A khui haw cu ngialin thatin,
a tuu haw cu kekin
khiak khawng hi.
49 A nase zetmi a thinuk
pulhangnak le a thinuk
so tawtok cu a hum hawah
leihsuk hi.
Mi thattu vancungmi lakah hah hi.
50 A thinuknak hei supma;
a nunnak haw hei khawih ngawlin
pulhnatin thitik khawng hi.
51 Izipt mi innkua hempoh tei
ca upabelte that khawng hi.Ref 78:51 Suah 12:29;
52 Tuucing bangin a mihingte
cu phillawn ngamkhing
tawnin lamhuai hi.Ref 78:52 Suah 13:17-22;
53 Lungmuangzet lamhuai in,
imah lau haw ma hi.
A ngalte saw cu tuipi in khuhin
thi khawng haw hi.Ref 78:53 Suah 14:26-28;
54 A mihingte cu
a ngam thiangtho ah hihen,
A thiangthomi mualah hihen
hawhpih hi.Ref 78:54 Suah 15:17; Josh 3:14-17;
55 A mihingte mailamah
a not pepel haw ten
mah ngam a um mihingte cu
hawlvawk haw hi.
Ngam cu Israel hinnam tei lakah
semin amu khua le
amu inntekah umtik hi.Ref 78:55 Josh 11:16-23;
56 Mahnaven amuh ten
Cungnungbel Pathian cu
khingkhai in do in ngal tho haw hi.
A thukhamte zui haw ma hi.Ref 78:56 Thuk 2:11-15;
57 A pu le pate bangin ngal tho haw in,
Thal pen kah tulmi a kawi kawkawi
thalcang bang haw hi.
58 Na pathiannote biaknak mun tulmia bawl haw hangin
Pathian thinuktik haw hi.
A milim haw hangin
a thinuktik sesem haw hi.
59 Mahti bangte amuh ten
Pathian cu a thinuk so tawtokin,
a mihingte lawl hi.
60 Mihing tei lak a um meknak inn,
Shiloh a puanbuk cu zamsan hi.Ref 78:60 Josh 18:1; Jer 7:12-14; 26:6;
61 A huham le sunloih a langnak
thukham kuang cu a ngal longtik hi.Ref 78:61 1Sam 4:4-22;
62 A mihing tei humah
a thinukin, a ngalte thattik khawng hi.
63 Ngaldonakah tangval hempoh
thi khawngin,
khanglai tei ca pasal tuk hei
umleh ma toh hi.
64 Thiampite vang ngalnam
hangin thi haw hi.
A zite hei in kah thei haw ma hi.
65 Dawltabel ten Topa cu
a hihbuhnak pen
a khangto bangin hihen,
Sabittui tha tuah a thatho zetmi
mi ngil pa bangin hihen thoto hi.
66 A ngalte cu a nunglam hawah
nawt pepel hi;
A zahcak haw tuk tian nehin
tho theileh haw ma toh hi.
67 Mahnaven Josef i tu le
cate cu lawlin,
Efraim hinnamte tengleh ma zo hi.
68 Amu ai-in Judah hinnam le
a deihzet mi Zion mual teng hi.
69 Mahlai ah vancung
a umnak inn bangin
a Biakinn cu sa hi.
Leipi bangin khotikin,
70 A sila David teng hi;
Tuu a khalhnak pen leRef 78:70 1Sam 16:11-12; 2Sam 7:8; 1Khang 17:7;
71 Tuunote a cinkhawinak pen samin,
Pathian in, a mite
tuu bangin cingtu tukin
Israel kumpi ah bawl hi.
72 A lungmu venghawng tuah
pha zetin cingkhawi hi.
Thiamting zetin lamhuai hi.