SAAM LABU 71
Putek Thungetnak
1 Topa aw, nang cu
ka himnak ci.
Ituk mahten zakca in
umtik pahsun.
2 Na Dikcangnak tuah
bawm inna, hupin hi.
Ka kutnak ngai inna,
pan zalin!
3 Ka buk mi suangpi hi zal inna,
keimah huptu ngal kulhtian
khohzet hi zalin hi.
Nang cu ka himnak le
4 Maw ka Pathian, mipha ngawl tei
khut pen hupin;
Hehpihnak a nei ngawlmi le
mipha ngawl tei khut pen!
5 Topa aw,
ka muansannak cu
nangmah lakah um hi.
Ka neu laih pen nangmah
muang zo ing.
6 Ka nunsung hempoh
nangmah muang ing.
Ka hinsuk pepan nangmah in
hup zo ci.
Nangmah thangphat leleng tung.
7 Mi tampi tei ca in
ka nunnak hi zohteh tak hi.
Itahim titale nang cu
a khozetmi ka ngal kulhtian hi ci.
8 Thalengin nangmah thangphat tung.
Na sunloihnak thu than tung.
9 Miteek poh tin lawl pahsun,
nemcuam ma poh tin
nung hek zal pahsun.
10 Ka ngal ten that nuam haw;
Siamkhawmin kei suam haw hi.
11 A mun, “Pathian in nunghek zo,
Hil nung inna, man nung;
A huptu tuk kuamah um haw ma,”
tin ti haw hi.
12 Maw Pathian aw,
lam khawlapi ah umsan zal pahsun;
Maw ka Pathian,
manlangin bawmin hi.
13 Keimah a dotute cu
zakca in um haw henna,
siatsuah khawng hi haw tahen.
Liamsuah a tumtute cu
zakca le mualpho in um haw tahen.
14 Ka muansannak cu
na lakah koih leleng tung.
Nangmah cu thangphat dedeuh tung.
15 Na diknak hilh tung.
Na patnak cu ka theih celh ngawlmi
hi haw naven sun nilui in
son tung.
16 Maw Cungnungbel Topa,
na huham pahcawi tung.
Na diknak, nangma diknak bek
aupih tung.
17 Maw Pathian aw,
ka naupang laih pepan
nangmah in zilh zo ci;
Tutianin, na thil bawlmi
thasiahhuai cu son ing.
18 Maw Pathian aw, tekin,
a puakpak zo poh tin,
nunghek zal pahsun.
A heng tukmi san thak lakah
na huham le
na ngilnak ka aupih ten
ka lakah um zalin hi.
19 Maw Pathian aw,
na diknak cu van khong hi.
Thasiahhuai nate bawl zo ci;
Nangmah a bangtu
kuamah um haw ma hi.
20 Haksatnak le cimnak
ka humah hengtik ci.
Mahnaven ka tha dimtikleh tuk ci.
Khaan sung pen pantul tuk ci.
21 Masa laih sangin khaisang tuk ci.
Nangmah in hehnemleh tuk ci.
22 Phaidaak tuah nangmah thangphat
hihim tung.
Maw ka Pathian,
muantak na hihnak cu
thangphat tung.
Ka phaidaak tumthahin,
na lakah lasa tung;
Maw nang, Israel tei
mi thiangtho.
23 Nangma ca in phaidaak
a tum haw ten
lungdamin lasa tung;
Na pat zo hangin,
ka nunnak venghawngin
lasa tung.
24 Keimah siatsuah a tumtute cu
zakca le mualpho in,
a um zo haw toh hangin, sun nilui in,
na diknak thu hilh tung.