SAAM LABU 68
Ngampi La
1 Pathian cu tho henna, a ngalte
khenkhek khawng hen.
Amah a huatute cu taivawk
khawng haw tahen.
2 Meikhu cu huihin, a muhvawk bangin,
a man hawlvawk khawng tuk hi.
Khuainun cu mei ah
a zung khawng bangin,
Mipha ngawlte cu Pathian mai ah
paithong khawng haw tuk hi.
3 Mahnaven midikte cu
a mitmuhah,
lungdam zetin li au haw tuk hi.
4 Pathian nelah lasa un;
ama min cu Topa hi;
Meikhu hum a khungtu pa ca in
lamsial un.
A mai ah na lung uh dam un.
5 Pathian i Biakinn thiangtho
sungah a umtu in,
Nu le pa nei ngawl ca-ngahte
ngaihsakin, meivongte hup hi.
6 Lungleng khawngai in,
a ummite umnak tuk pia hi.
Thawngtate suahcaknakah
lungdamin huai hi.
Mahnaven ngalthotute cu
ngamko lakah tang haw tuk hi.
7 Maw Pathian aw, na mihingte
pui tulin,
phillawn tawnvawkin,
na hawhpih ten,
8 Sinai Pathian, Israel Pathian a hen ten
leipi hing dudumin van pen
nguah leihsuk hi.Ref 68:8 Suah 19:18;
9 Pathian in nguah tampi
a zuktik hangin,
leicul ngamkote hing lehtik ci.
10 Na mihing ten mahlai munah
panmun khual haw hi.
Na phat hangin mi ca-ngah cawm ci.
11 Topa in thukham pia in,
numei tampi ten
thuthang cu hawhpih haw;
12 “Kumpite le a ngalkapte cu
taivawk haw hi,” ti haw hi.
Inn a um numei ten
na lon uhmi cu sem haw hi.
13 Na lon uhte cu sui hade bang
mul neimi ngun tuah tuammi
khulo zukte hi.
(Itakaw mi khenkhat ngaldo ni-in
tuu inn sungah
tuute tuah na umthong uh?)
14 Cungnungbel Pathian in
Zalmon Mual humah
Kumpite a khenkhek khawng ten
15 Maw Bashan mual,
mualbawk tampi neitu mualpi,
16 Itakaw Pathian in
ama umnak tukin a tenmi
mual cu na mualbawk hum pen
nautatnak tuah na zoh?
Topa cu a tenmi mualah
kumkhua in um tuk hi.
17 A cak zetmi cipuh leeng
thawng tampi
tuah Topa cu Sinai Mual pen
mun thiangtho ah hung hi.
18 Topa cu muallekah kai hi.
A ngalmatmi tampi hawhpih hi.
Ngalthotu tei lak pen
laksawng tampi ngah hi.
Topa Pathian cu
mahlai ah um tuk hi.Ref 68:18 Efe 4:8;
19 Topa cu thangphat hi tahen.
A vanngit uh nisialin dawn hi;
Amah cu ohte pantu Pathian hi.
20 A Pathian uh cu
mi pantu Pathian hi.
Thihnak pen a pansuaktu Topa hi.
21 Pathian in amah a dodaltute le
a sualnak haw lampi
a zui lelengtu tei lu cu
sukeh khawng tuk hi.
22 Topa in, “Na ngalte uh cu
Bashan pen pui tung a,
tuipi thuanthum a thukbelnak
hei pen tulpih tung hi.
23 Na ngal tei thi luang menmunte
hei pen ke tuah hawh thei tuk uh ci.
Na uico uh hei in amuh tei thi cu a
duhzah haw in liak haw tuk,” ti hi.
24 Maw ka Pathian le
ka kumpipa, munthiangah
na hawh laih cu mi hempohin
mu haw hi.
25 Masabelin lasatu hawhin,
nunglamah la tumtute hawh haw hi.
A laklawh hawah khuang tumtu
26 “Pathian cu a mihing tei
tawhdun khawmnakah
thangphat un!
Israel casuan hempohin,
Topa thangphat un,” ti haw hi.
27 Masabelin, a nam sung haw pen
ca nautabel Benjamin hinnamte
hung haw in;
Mah sangtu ah Judah puitute,
amu puimite tuah hung haw hi.
Zebulun le Naftali puitu ten
zui haw hi.
28 Maw Pathian aw, na huham langtikin;
keimu lakah na man mi huham cu!
29 Kumpi ten laksawng a
piaknak haw
Jerusalem khua na Biakinn pen.
30 Phaikung lak a ummi ngamsa bang,
Izipt cu liat inna,
khuinote tuah a tami
khuicang honpi bang
miphunte cu hupin;
Na mai ah kunin, a ngun haw
a piak laklawh haw,
nun hilhin hi.
Ngaldo bebek a nuamtute cu
khenkhek khawngin hi.
31 Izipt ngam pen hahmi
kamtaite hung haw tuk;
Ethiopia miten Pathian nelah
thungenin, a baanzak haw tuk hi.
32 Maw leihum ngamte,
Pathian nelah lasa un.
Topa i lakah thangphatnak lasa un;
33 Kumkhua in, a kho mi van,
mah vante a khungtu lakah!
Nase zetin, a au mi aw cu ngai un.
34 Pathian i huham thangtik un.
A sunloihnak cu Israel humah um hi.
A ngilnak cu Vanhaang nuai
35 A mun thiangtho sungah Pathian cu
Itihzah tian lauhuai him?
Israel i Pathian cu! Ama mihing tei lakah
ngilnak le huham pia hi.
Pathian cu thangphatin um tahen!