SAAM LABU 18
David Nehnak La
(2Sam 22: 1-51)
1 Topa aw, Itih zahin kaw
nang ka deih hi!
Nang cu ka ngilnak hi ci.
2 Topa cu keimah pantu le
a khomi suangpi ka kulhtian hi.
Ka Pathian cu ka belhmi
suangpi hi;
Aman lumphol bangin
keimah cu khamsak hi.
Ama sungah him ing.
3 Topa cu sam ing a,
ka ngal tei khut sung pen
suakcatik hi.
Topa cu thangphat un.
4 Thihnak khauhualin vialin,
siatnak tuilunin kei khuh hi.
5 Thihnak khauhualin kei awkin,
khaanin thangsiah hi.
6 Haksatnak ka tawh laihin,
Topa cu sam ing.
Bop tuk deihin ka Pathian cu sam ing.
A biakinn pen ka aw cu thei hi;
Ka aunak aw cu
a beng sungah tum hi.
7 Pathian a thin a uk hangin,
leipi cu hingin can hi.
Mual hempoh tei khunnak bul
tawphah cu hingin can tawtok haw hi.
8 A naalkua pen meikhu tul lulutin,
a kam pen mei alh le
meithem tul zuazuak hi.
9 Van cu hongin tolhsuk hi.
Meingo sahzet a ke nuai ah um hi.
10 Cherubim humah khungin
leeng hi;
Huih i ha humah khungin
manlang zetin hung hi.
11 Khuathim tuah tuam cop hi;
Tui tuah a dim mi meingo
sahzet a elkimah um hi.
12 A mai a khuaphelep al sung pen,
Nial le meiling caak susuihin,
meingo sahzet cu nawkvawk hi.
13 Topa cu van pen
vanthum bangin thum dudum hi.
Cungnungbelin, a aw suah hi.
14 A thalcang cu kapin,
a ngalte lengkektik khawng hi;
A khuaphelepin taitik khawng hi.
15 Topa aw, na ngalte hupin,
na thinukin, na thup lih ten,
tuipi thuanthum tawdeng cu langin,
leipi i zungmutnakte lang khawng hi.
16 Topa in humlam pen
a khut saanin, keimah len hi;
Tui thukzet sung pen kei doksuah hi.
17 A ngilzetmi ka ngal tei
khut sung pen suah hi;
Kei a huatu le ka ca in, a ngilzetmi
khut sung pen,
18 Haksatnak ka tawh ni-in
amuh ten kei do haw hi.
Mahnaven Topa in kei pan hi.
19 Launak pen himnak mun zalpi ah
kei suah hi.
Ka humah a lungdam hangin
kei pan hi.
20 A dikmi ka bawl hangin
Topa in laksawng pia hi;
Sualnak ka neih ngawl hangin
thupha muicu pia hi.
21 Topa i lampi cu zui zo ing;
Ka Pathian lak pen sual zetin
taivawk awng mang
22 A daan hempoh ka mai ah langin,
A thupiakmi pa khat hei
zui ngawlin um awng mang.
23 A mai ah sualnak nei mang,
sualnak pen a dangno in um zo ing.
24 Topa i mai ah
ka diknak hangin laksawng pia hi.
A mitmuhin ka khut a thianthoh bangin
thupha pia hi.
25 Topa aw, mi muantak tei lakah
muantakin lang ci.
Mi Cangkim tei lakah cangkimin langin
zaangtha pha pia ci.Ref 18:25 2Sam 22:26;
26 Mi thiangtho tei lakah
thiangtho in lang ci,
Mahnaven mi siasuak tei ca in,
a ngal hi ci.
27 Mi niamkhiatte pan ci,
mahnaven mi pualthaute supeek ci.
28 Topa aw, nangmah in
vaknak pia ci:
Pathian in khuathim cu vaktik hi.
29 Ka ngalte do theihnak tuk le
kulhtiante tan vawk theihnak
zaangtha pia ci.
30 Hi Pathian i lampi hi a, cangkimmi hi.
Topa i thutepmi cu muantak hi;
A lakah belhnak a zeitu tei ca in,
Amah cu ngal lumphol bang hi.
31 Topa sial ngawl
Pathian dang akua um him?
A Pathian uh humah suangpi dang
um maw?
32 Amah cu ka tha ngiltiktu le
ka lampi himtik hi.
33 Sazuk bangin ka zuanzangtikin,
A sannak munah himno in umtik hi.Ref 18:33 Hab 3:19;
34 A khohbelmi thalcang tian
kau thei tukin, amah in
ngaldo dante hilh hi.
35 Topa aw, nangmah in,
na patnak lumphol kei pia ci.
Na taklam khut tuah kho zetin kei len ci.
Na nunnemnakin kei ngengtik ci.
36 Ka hawhnak lampi zaltik ci.
Bah awng mang hi.
37 Ka ngalte hil ing a pha ing hi;
Ka siatsuah khawng laklawh
kik mang hi.
38 Saat ing a, tholeh thei haw ma toh hi.
Ka kebulah lum haw hi.
39 Nangmah in hi ngaldonakah tha pia ci;
Ka ngalte cu ka nuailamah
lum khawng haw hi.
40 Ka lak pen ka ngalte cu taitik ci,
Kei a huatu hempoh cu
siatsuah khawng ing.
41 Bopnak ngenin au haw
mahnaven kuamah in luan ma hi.
Topa i lakah au haw naven
don ma hi.
42 Sepkeh khawng ing ama, huih i muhmi
leivul bangin suak haw hi.
Sikpek pepel ing a, lampi a,
cinciak bangin suak haw hi.
43 Mi langpang thei hinnam tei
lak pen kei panin,
minam tampi uktu in bawl ci.
Ka theih awng ngawlmite cu
ka nadektu in suak haw hi.
44 Ka thu le la a theih haw ten
ka thu cu zui haw hi;
Ngamdang mite vang ka mai ah
kuunin hung haw hi.
45 Amuhte cu a thinsu in,
a kulhtian haw sung pen
cantawtokin tul haw hi.
46 Topa cu nung hi.
Ka himnak suangpi cu thangphat hi tahen.
Pathian cu pantu hi.
A thawmngeng dan phuang nung.
47 Phu a laksaktu cu amah hi,
mi hempoh ka ke nuai ah koih hi.
48 Ka ngal tei khut pen kei pan hi.
Topa aw, ka ngal tei humah
khaisang ci;
Mi suaksual tei lak pen kei pan ci.
49 Maw Topa aw, hinnam tampi
tei lakah nang pahcawi tung;
Na min thangphatnak la in sa tung hi.Ref 18:49 Rom 15:9;
50 Pathian in, a kumpi lakah
nehnak ngengpi pia hi;
A tenmi le sathau a thih zo mi,
David le a casuan tei lakah
a kho mi a itnak cu langtik leleng hi.