SAAM LABU 139
Pathian i Thil A Theihtheih Daan
1 Topa, nangmah in
kei cu zo cangcianin,
theicel khawng zo ci.
2 Ka thil bawlmi hempoh thei ci.
Lam khawlapi pen
ka lungmu cu thei khawng ci.
3 Na ka deh le ka colh hei mu ci.
Ka bawlmi hempoh thei khawng ci.
4 Ka ot laih ngawlin ka ot tukmi cu
thei khawng zo ci.
5 Ka elkimah nang um ci.
Na huham tuah hup ci.
6 Kei na theihtheih dan hi thasiahhuai hi.
Ka ca in thuk leita thei zo mang.
7 Na lak pen ilai ah kaw ka ngelh tuk?
Na mitmuh pen ilai ah him
ka tai cuang tuk hi.
8 Vancungah ka kai vangin
mahlai ah nang um ci.
Mithi tei ngamah ka zau vangin
mahlai ah nang um leleng ci.
9 Nisuahnak kalin ka leng ahin;
ahimata nitumnak
a khawlabel munah ka um vangin;
10 Mahlai pen na khut tuah
pui tuk ci;
Keimah bawm tukin um leleng tuk ci.
11 Khuathim cu “Kei hu selin,”
tin ti in, ka el a vaknak cu
“Khuathimin cang hen,”
tin ka ti li vangin
12 Nangma ca in thimnak cu thim ma hi;
Zan cu sun bangin vakin,
na ca in sun le zan cu bangten hi.
13 Ka sungngil tian a bawltu nang hi ci.
Ka nui pum sung pen
a piangtik cu nang hi ci.
14 Lauhuaizet hi ci a, thangphat ing.
Na bawlmi hempoh cu
nalamdang le thasiahhuai ngeh haw hi.
Mahmi cu ka lungmu venghawngin thei ing.
15 Ka nu i pum sungah ka thi le sate
ciangkai zetin, na bawl laih khin,
a thei khawngtu cu nangmah hi ci.
16 Ka suah laih ngawlin mu zo ci.
Ka ca in, na bawlmi kum le hunte cu;
ni khat hei a pat laih ngawlin
na laibu sungah khumsa
hi zo haw toh hi;
17 Maw Pathian aw,
na ngaihsutnakte cu,
ka ca in thukin theih haksazet hi.
Na ngaihsutnak a tamdante
hi ngaisung baan mang.
18 Ka sial vangin ngunphil sangin
tam saw tuk,
ka khanglo vangin
nangma lak lelengah um ing.
19 Maw Pathian aw, mipha ngawlte cu,
na that khawng ahin deih ing.
Thisan suah a deihtu ten,
kei a taisan khawng haw ahin,
deih ing.
20 Na thu cu mawi ngawl zetin hilh haw;
Na min cu ngaihtak ngawlin
son haw hi.
21 Topa aw, nang a huatute cu
izahta him ka huat?
Nangmah a ngaltute cu itih zahin him
ka mit a kem?
22 Amuhte cu huazet ing;
ka ngalin ka ngaihsutmi hi.
23 Maw Pathian aw, kei hi zo cel inna,
ka thin le lung hi thei in;
Khingkhai inna, ka ngaihsutnak hi
mu zalin hi.
24 Ka sungah phatnak a um le um ngawl
zo inna, kumkhua nunnak lampi ah
pui in hi.