SAAM LABU
(The Book of Psalms)
Thulamsial
Saam labu hi Lai Thiangtho a, labu le thungetnak laibu hi. La phuahtu le Lai ngantu dadang ten kum tampi sung a phuah haw mi hi in, thu ngetnak le late cu Israel miten Pathian biaknakin mang haw hi. A dawllam ten a Lai Thiangtho sung hawah telhcih haw hi.
Hi biaknak lakamte hi phun tampi um hi. La tuah Pathian thangphat biakpiaknak, sualzah kutnak le ngalnehnak tukin thungetnakte hi. Hihi ngampi thungetnak le bulpak thungetnakte hi. A khenkhat cu bulpak ngaihsutnak thukzet tuah ngaihsut mi thute pholhsuahnak hi in, a khenkhat cu Pathian i mihing hempoh tei kul le sapnakte a langtiknak hi.
Saam Lai Thiangtho hi, Topa amah loli hei in mangin, Thutiam Thak ngantute hei in, mang bok haw hi. Khristian pawlpi a pianpat laihin, a sunsak haw mi biakpiaknak laibu pa khatin, na suak hi.
SAAM LABU 1
Bu Khatnak
Lungdamnak Ngangai
1 Mi ngilo tei ngaihsutnak piakmi
sang ngawlin,
misual tei ngamtat a zui ngawltu le
Pathian a zawnsaktu tei lakah
a tel ngawltu cu mi lungdam hi.
2 Topa i Daan thukham zui cu
a lungdamnak hi a,
mah Daan thukham cu a sun a zan,
ngaisungin bial hi.
3 Amah cu lui tui luang mawk a,
po mi thingkung,
a hunkim ten ngah a ngahmi le
a cehte a thim awng ngawlmi bang hi.
A dehmi hempoh ah pitung tuk hi.Ref 1:3 Jer 17:8;
4 Mahnaven mipha ngawlte cu
mahti bang hi haw ma;
Huih i muhvawkmi cangsi
bang haw hi.
5 Sualnak a bawltute cu sualman
thukhennak thuak haw tuk hi.
Misualte cu midik tei lakah
tel kha haw tukma hi.
6 Topa in, midik tei
hawhnak lampi cu cingkhawi leleng hi;
mahnaven mipha ngawlte cu
bothal haw tuk hi.