6
Nazir Tei Daan
1 Topa in Moses lakah,
2 a nuailam a daan cu Israel tei zui tukin pia hi. Pano hihen, numei hihen, a dangno in pum a piatu Nazir hi tukin thutepnak bawlin, Topa i lakah a piakdun sung cu,
3 sabittui le beer zenkha viang pahsuh hen. Sabit ngah tuah bawlmi sabittui vangin tukma hi; sabit ngah cu a hingin hihen, a ko in hihen ei tukma hi.Ref 6:3 Lk 1:15;
4 Nazir a hih sung hempoh cu sabit kung pen ngahmi pawpoh, amu le a ngah, a hawng tianin ei tukma hi.
5 Nazir thutepnak nuai a, a um sung hempoh a sam met tukma, a mukmul le a kha mul vang met tukma hi. Topa i lak a, pumpiak thutepnakin, a let sung hempoh a sam le a khamul khawih tuk hi.
6 Mi luang elah hawh tukma hi.
7 A nu a pa a unau tei luang ahi hei in nek tukma hi. Miluang elah hawhin, amah le mah nawngkaitik cawm tukma hi. Topa i lak a, pumpiak sialsiahnak cu a sam le a mul hi.
8 Nazir a hih sung hempoh Topa i lakah thiangtho hi.
9 Mi pa khat upmawh khak ngawlpi in Nazir elno ah thi in, a sam a nawngkaitik tale ni salih sung a ngah nungten, a sam le a kha mul cu met tuk hi; mahten a nawngkainak pen thiang tuk hi.
10 Ni liat ni-in khulo pa nih, ahimata laileng pa nih, thiampi lakah Topa i umnak Puanbuk kongka ah hunpih tuk hi.
11 Thiampi in khulo pa khat cu sualhah biakpiaknakin mangin, adang pa khat cu halkang biakpiaknakin mang tuk hi. Mi luang a zenkhak sual hangin biakpiaknak cu thiampi in bawl tuk hi. Mah ni-in, a lu cu thiangtho lehtik tuk a,
12 Nazir hi tukin a pumpi cu Topa i lakah pialeh tuk hi. A thianthohtik sa mi a sam cu a nawngkaitik hangin mah laihngawl a, hun hempoh cu a thawnthongin suak hi. Kuanleh biakpiaknak tukin kum khat kim tuucangno pa khat hunpih tuk hi.
13 Nazir hihnak thutepmi hun a bo ten a nuailam a biakpiaknak bawl tuk hi. Puanbuk kongka ah hawhin,Ref 6:13 Nung 21:23-24;
14 sonbang ngawl ngan pa thum Topa i lakah pia tuk hi. Halkang biakpiaknak tukin kum khat kim tuucangno pa khat sualhah biakpiaknak tuk kum khat kim tuula pa khat le pawlkom biakpiaknak tukin tuucang pa khat pia tuk hi.
15 Mah hum pen naman hel ngawl cangho bawm khat, olif situi tuah cokhelin bawlmi cangho sahzet, a pano olif situi noihmi cangho le a kulmi an tuah biakpiaknak le intuk biakpiaknak bawl tuk hi.
16 Mahmi cu thiampi in, Topa i lakah hunpihin, sualhah biakpiaknak le halkang biakpiaknak bawl tuk hi.
17 Topa i lak a, lemnak biakpiaknak tukin tuucang pa khat le cangho bawm khat vang pia in, an tuah biakpiaknak le intuk biakpiaknak vang bawl tuk hi.
18 Nazir in Puanbuk kongka ah a sam cu met tuk a, pawlkom biakpiaknak a halnak haw mei ah a sam cu haal tuk hi.
19 Mahten, thiampi in, a huan haw mi tuucang i daak cu la in naman hel ngawl a sah zetmi cangho le bawm sung a, cangho pano tuah Nazir i khut sungah koih tuk hi.
20 Mahnung ten thiampi in, Topa i lakah pia tuk hi. Hi piakmi cu thiampi ca in laksawng thiangtho hi. Tuucang kawng le a awm tuah thiampi i co tuk hihim hi. Mah nungten Nazir in sabittui in thei tuk hi.
21 A hum a daan cu Nazir tei ca in hi, mahnaven Nazir pa kha khatin, a kulmi sangin tam saw pia tukin thu a tiam tale, a thutepmi bangin zui cikcek tuk hi.
Thiampi Muicu
22 Topa in Moses lakah,
23 Aaron le a capa ten, Israel mite muicu a piak haw ten a nuailam bangin tituk hi:
24 “ Topa in muicu pia in,
cingkhawi zal hen,
25 Topa cu na hum uhah
hehpihnak nei zal hen,
26 Topa in, a mitmai pha cu
na hum uhah umtikin,
lemdaihnak hu pia zal hen;
ti haw tuk hi.
27 Topa i lakah, “Israel tei ca thu a nget haw ten, keima minsal haw tuk a, muicu pia tung,” ti hi.