30
Thutepdunnak Daan
1 Moses in, a nuailam a daan cu Israel hinnam tek hotu tei lakah pia hi.
2 Mi pa khatin Topa i lakah na pa khat pia tukin thu a tep ten hihen, ahimata thil pa khat bawl tuk ngawlin thutiam a bawl ten hihen, a thutepmi cu khelleh pahsuh hen. Bawl tung a tihmi cu cangkimno in bawl khawng tuk hi.Ref 30:2 Daan 23:21-23; Mt 5:33;
3 Khanglai pa khatin, a pa i inn a umlaihin, Topa i lakah pa kha khat pia tukin thutiam, ahimata pa kha khat bawl tuk ngawlin thutepnak a bawl ten,
4 mah a thutepmi cu a pa in, a theih ten lungkim ngawlnak a neih tih sialngawl a thutepmi bangin zui khawng tuk hi.
5 Mahnaven a thutepmi cu a pa in thei in, a kham tale, a zui kul tukma hi. A thutepmi bangin bawl tuk cu a pa in, a kham hangin Topa in ngaidam tuk hi.
6 Pasal nei laih ngawl numei pa khatin tuptahnak nasezet nei lo in maw, ahimata tuptahnak nei sap ngawlin thil pa kha khat bawl viang tuk ngawlin thu a tep ceng ten pasal nei in,
7 mah thu cu a pasalin, a theih ten lungkim ngawlin a kham tih sial ngawl a thutepmi bangin zui khawng tuk hi.
8 Mahnaven a thutepmi cu a pasalin thei in, a kham tale, a zui kul tukma hi. Topa in ngai dam tuk hi.
9 Meivong hihen, lengleh hihen, bawl tukin thu a tepmi ahimata bawl tuk ngawlin thu a tepmi cu zui khawng tuk hi.
10 Pasal nei numei in thil pa kha khat bawl tuk ngawlin a tepmi cu,
11 a pasalin, a theih ten lungkim ngawlin, a kham tih sial ngawl a thutep bangin zui khawng tuk hi.
12 Mahnaven, a thutepmi cu a pasalin thei in, a kham tale, a zui kul tukma hi. A pasalin kham a hih hangin Topa in ngaidam tuk hi.
13 A pasalin, a thutepmi, ahimata a thutepmi khohtik tuk, ahimata phiahsak theihnak tukin thunei thei hi.
14 Mahnaven a zi i thutepmi a theih ni-in, lungkim ngawlnak a langtik ma tale a thutepmi bangin a zui kul hi. A theihbek ten a zi cu a kham ngawl hangin a lungkim pih suak hi.
15 Mahnaven a zi i thutepmi a theih nungten a siatsuah sak tale, a zi i mawhnak cu amah in thuak tuk ti hi.
16 Hih daan cu Topa in Moses lakah pasal nei numei hei in hihen, pasal nei laih ngawl a pa i inn a um laihmi khanglai hei in hihen thutepnak a bawl haw ten zui tukin a piakmi hi.