14
Mipite Phu Haw
1 Israel mipi cu thasia in zan khua kap haw hi.
2 Moses le Aaron tei humah phu in, “Izipt ngamah a thih saw tak tuk uh ven. Mah ahimata hampa lakah hin a thi saw uh ahin pha saw tuk naven!
3 Ita Topa in hi ngamah henpih ngelcel nen tim? A zi le canau uhte cu ngal ten man khawng haw tuk hi. Izipt ngamah kikleh ahin pha saw tukma maw?” tin ti haw hi.
4 Mah hangin pa khat le pa khat, “Izipt ngamah a pui kiklehtu tukin puitu teng nung,” tidun haw hi.
5 Moses le Aaron cu mipi tei maiah bok haw hi.
6 Kanaan ngam zo tukin a hah haw mi lak pen Nun i capa Joshua le Jefunneh i capa Kaleb tei pa nih cu thasia leita in, a puan haw botkekin,
7 Israel mipi tei lakah, “Ka zoh uhmi ngam cu ngam pha ngangai hi.
8 Topa cu a hum uhah, a lungdam ahi tale Amah in pui tuk a, ngampha le ngamnop mun cu henpihin ohte pia tuk hi.
9 Mah hangin Topa cu langpangin um pahsuh unna, mahlai ngam a, ummi vang lau pahsuh un. Baihno in neh tuk poh ung hi. Topa cu eimu lakah umin, amuhte huptu a pathian haw cu siatsuah khawng zo hi. Lau hihim pahsuh un,” tin ti haw hi.Ref 14:9 Heb 3:16;
10 Mahnaven Israel mipi ten amuh lehlam suang tuah seh hup tum haw hi. Mahnaven thakhat thu in, mipi ten Topa i huham vaknak cu Puanbuk humah langin, na mu haw hi.
Mipi Ca In Moses Thungen
11 Topa in Moses lakah, “Hi mihing ten i tuk tian kaw kei a zawnsak haw tuk? A lak hawah nalamdang tampi bawl zo naveng, keimah muang nuam ngawlin i tuk tian kaw a um haw tuk?
12 Zavaat ahimata pulhnat tungtik tung a, siatsuah khawng tung hi. Amuh sangin ngeng saw le ngil saw deuh hinnam pa khat umtik tung a, nangmuh cu a pa haw hi tuk uh ci,” tin ti hi.
13 Mahnaven Moses in Topa i lakah, “Nangma ngilnak huham tuah hi mite hi Izipt miten mu zo haw ven,Ref 14:13-19 Suah 32:11-14;
14 hi ngam a, ummi tei lakah hilh zo haw tuk hi. Topa nangmah cu ka lak uhah umin, na meingo cu ka hum uhah cawlin, langpang zetin keimuh na umpihnak hi ngam miten thei zo haw hi. Sunlamin meingo zial, zanlamin mei alh tom tuah na pui lelengmi hi, a theih khawng zo mi hi bok hi.
15 Atu-in, na mihing ten a that khawng ahi tale, na min a za tu hinnam hempohin,
16 a Pathian haw in, a mihingte cu a tepsa mi ngamah henpih thei ngawlin hampa lakah that khawng hi, tin ti sual haw tuk hi.
17-18 Atu-in, Topa nangma hehpih kun ing, ‘Thinuk baihmi hi mang, itnak neimi ing hi, muantak ing hi, sualnak le langpannak ngaidamtu ing, pu le pa tei sual hangin khang thum khang li tian a casuante pelh ngawlin a bawlsiatu hi bok ing hi, tin na tih bangin, maw Topa na huham le na ngilnak langtik inna, ka hum uh a, na tepsa mite cu pia zalin hi.’Ref 14:18 Suah 20:5-6; 34:6-7; Daan 5:9-10; 7:9-10;
19 Izipt ngam pen a tul phut haw pepan tuni tian, na ngaihdap bangin a thukmi le a thekdun awng ngawlmi na ihnak tuah hi na mihingte cu ngaidam zalin hi,” tin hehpih kun hi.
20 Topa in, “Na nget bangin ngaidam tung hi.
21 Mahnaven keimah cu a nungmi Pathian hi ing a, ka sunloihnak huhamin leipi cu a khuh khawng hangin ka minin thutiam ing.Ref 14:21-23 Heb 3:18;
22 Kanaan ngam a tum haw ten, hi mite cu kuamah a nung umleh haw tukma toh hi. Izipt ngamah hihen, ngamkhingah hihen, nalamdang ka bawlmi le ka sunloihnak vak a almi cu mu khawng haw naven, muang ngawlin le sang ngawlin um haw hi. Keimah saw hi vei a sawm, a zain thiatha zo haw hi.
23 A pu le a pa haw lak a, ka tepsa mi ngam cu heng hihim haw tukma hi.
24 Mahnaven ka silapa Kaleb cu ngaihsutnak dang nei in, a lungmu venghawng tuah keima thu zui hi.Ref 14:24 Josh 14:9-12;
25 Amalek mi le Kanaan mite a umnak haw ngamkhing cu amuta hi tuk hi. Zingten nunglamah hekkik unna, Tuipi Sannote 14:25 Tuipi San a hilh nuam mi cu tu laih khan a, “Aqaba Tuipi” tihmi hi. lam zui in ngamkhingah hawh kik un hi,” tin Moses cu ti hi.
Topa In Israel Mite Dantat
26 Topa in Moses le Aaron lakah,
27 Ituk tian kaw hi mipha ngawlte hi ka humah a phuk haw tuk laih? A phuknak haw ciat leita zo ing!
28 Atu-in, a lak hawah “A nungmi ka hih bok hangin tamsiatnak tuah thutiam ing hi; ka lak a na nget uhmi bang cikcekin, na hum uhah bawl tung. Topa keimah in awn zo ing.
29 Thi tuk uh ci a, hampa lakah na luang uhte cu khenkhek khawng hi tuk hi. Ka humah na phuk uh hangin, nangmu lak pen kum sawm nih hum mihing a kuamah in Kanaan ngam heng tukma uh ci.Ref 14:29 Heb 3:17;
30 Hi ngam co tukin thutiam ing. Mahnaven Kaleb le Joshua sialngawl pa khat hei heng tukma uh ci.
31 Ngal ten ka cate uh man khawng kha haw tuk na tih uhmi, na ca uhte lehlam na nuam uh ngawlmi ngamah henpih khawng tung a, amu ngamin suak tuk hi.
32 Nohte cu hi ngamkhingah thi khawng tuk uh ci.
33 Na ca uhten hi ngamkhing sungah muantak ngawl na hih man uh cu kum sawm li sung thuak haw tuk a, pa khat mah tang ngawlin na thih khawng laklawh uh tian vakvai haw tuk hi.Ref 14:33 Nung 7:36;
34 Kanaan ngam na zo uh, ni sawm li sung hi, ni khat ai-in, kum khatin, kum sawm li sung, na sualman thuak tuk uh ci. Kei na langpang uhnak hangin haksat dan thei tuk uh ci.
35 Keimah langpangtu mipha ngawl mipi ten na hum uhah, a hum a, bawlsiatnak cu hengtik hihim tung hi, tin tamsiatnak tuah thutiam ing. Hi ngamkhingah pa khat hei suakca ngawlin thi tuk uh ci. Topa keimah in hilh zo ing hi,” tin hilh un; tin ti hi.
36-37 Moses in Kanaan ngam zawldawt tukin a hahmi puitu ten zolthu a son haw hangin mipi Topa i humah a phuknak haw hi. Mah hangin Moses i hahmi puitu tei humah natsia hengin, thi haw hi.
38 Zawldawttu mihing sawm le pa nih sung pen Joshua le Kaleb bek nung haw hi.
Amasabel Kanaan Ngam Donak
(Daan 1:41-46)
39 Moses in Topa i thuhilhmi hempoh cu Israel tei lakah a hilh ten nase zetin kap haw hi.
40 A zingten mualhum ngamah hawhin, “Sual zo ngai ung hi. Atu-in Topa i tepmi ngamah hawh toh nung,” ti haw hi.
41 Mahnaven Moses in, “Ita atu hei in, Topa i thu cu na zui nuam uh ngawl? Imah hi cuang tukma uh ci!
42 Hawh pahsuh un. Topa cu na lak uhah, a um ngawl toh hangin, na ngal uhten neh haw tuk hi.
43 Amalek mi le Kanaan mite tuah na dodun ten thi khawng tuk uh ci. Topa i thu na zui nuam uh ngawl hangin Amah cu na lak uhah, umpih hihim tukma hi,” ti hi.
44 Mahnaven hawh tum lo leng haw hi. Topa i Thutiam Kuang hihen, amah Moses hihen, a ngiahbuk haw pen tul haw ma hi.
45 mah laih a, um Amalek mi, Kanaan miten simin, a neh haw ten Hormah khua tian Israel mite cu hil haw hi.