NAHUM
Laibu
(The Book of Nahum)
Thulamsial
Nahum laibu cu tanglaih pepanin Israel i ngal Assiria khuapi Nineveh a siat hangin a lungdamnak la hi. BC za salih bo kuan hawngin, Nineveh a siatnak cu a pualthau hang le a huatsuak hangin Pathian i thukhen tawk hi tin muh theih hi.
1
1 Nineveh khua thu tuah pehdunin, Elkosh khua mi Nahumin muhnak a neihmi cu hi bangin hi.
Nineveh Humah Topa i Thinuknak
2 Topa in amah dodaltute
zo thong ma hi.
Amah langpangtute cu dantatin,
a thinuknak tuah lulleh hi.
3 Topa cu baihno in,
a thinuk ma hi,
mahnaven a huham nasezet hi.
Misualte dantat ngawlin
Simpei le huihpi sungah
a lampi umin,
meingo cu a keciahnak pen
a khu tomi leivul khu hi.
4 Tuipi cu thupia in kangtik hi,
luitui hempoh vang ko khawng hi.
Bashan ngam le Karmel mualte
ko khawng haw hi.
Lebanon mualhum a,
paakte vang
thim khawng haw hi.
5 Mualsangzette a mai pen
hing haw in, mualniamte
cim khawng haw hi.
A mai pen leipi le
a hum a ummi
mihingte cu canin,
hing tawtok haw hi.
6 A thinuknak mai ah
akua kaw a ding thei tuk?
A thinuk pulhang laihtak cu
akua in thuak thei tuk him?
A thinuknak cu tuisa bangin buak hi.
A mai ah suangte hei
leivulah cang khawng haw hi.
7 Topa cu mipha hi.
Haksatnak hun ten
a mipi tei ca in himnak phabel hi.
A nelah humhimnak
a zeitu cu hehpihin
suahcaknak ngah haw hi.
8 A ngalte cu tuipi khang bangin
siatsuahin, a dodaltute cu
thihnak khuathim sungah
khesuk khawng hi.
9 Topa suam tukin
i bawl tum li uh cim?
Amah in nangmuh siatsuah
khawng tuk hi.
Kuamah in vei nih tian
do ngam haw tukma hi.
10 Ling le so a kang bangin
11 Nineveh khuapi aw, nangmu lakah misual pa khat, Topa dodaltu le thusia pawitu um hi.
12 Topa in Israel mi nelah, “Assiria mi ngil zetin le tamzet haw tuk naven siatsuah tawkin, bo khawng haw tuk hi. Ka mihingte aw, nangmuh bawlsia zo toh ing a, bawlsialeh tukma toh ing.
13 A nemsuktu kolhak cu ek tuah tung a, kenciptu thik taicin cu satcat khawng tung,” ti hi.
14 Assiria ca in Topa thupiakmi cu hi tin hi, “Na min dawntu tukin casuan neileh tukma toh ci. Na pathian biakinn a milim le zukte cu vatkeh khawng tung. Na khanmual tuk cu atu-in bawlsak ham tung, nungca tukin tak ma toh ci” tin ti hi.
15 Mualhumah thuthangpha le lemdaihnak a henpihtu i ke khi zo ten un! A nehnak tuk thuthan hi! Judah mipite na bawl tukmi puai cu bawlin, na thutiammi cu kimtikin hi. Mipha ngawl ten nehleh haw tukma toh hi. Amuhte cu siatsuah khawngmi hi zo haw hi.Ref 1:15 Isa 52:7;