MATTHAI
Ngatmi Lungdamnak Thuthangpha
(The Gospel according to Matthew)
Thulamsial
Matthai ngatmi Lungdamnak Thuthangpha sungah Jesuh cu tanglaih Thukham Lun laibu sung a tepsami Nunpantu Topa hi tihmi langtiknakin ngatmi hi. Pathian in Jesuh i sung pen a mihing tei lakah a thutepnak kimtik hi, tihte vang lang hi. Jesuh cu Judah mi sung pen hingin, a khantohnak le thuthangpha cu Judah mitei ca bek hi ngawlin, leihum buppi ca in hi.
Matthai laibu hi ngallingzet le a sasangin ngatmi hi. Jesuh i hinnak pen panto in, a tuiphumnak, sualsoh a thuaknak, le a thuhilhnak, a thuzilhnak le Galilee pen mi a damtiknakte um hi. Hi thute a ngat celh ten Jesuh cu Galilee pen Jerusalem lamah a khualzinnak le a nun sung a, nipi dawlbel thu le late, thinglamteh humah a khetnak haw le a thawhlehnak thute hi.
Matthai Thuthangpha in Jesuh cu zilhtu thiamzet hi tihmi langtikin Pathian piakmi Daan thute hilhciang theitu le Pathian Uknak thute vang hilhtu hi, tihmi langtik bok hi. A thuzilhmi hempoh hi khen nga suahin khen theihmi hi.
(1) Mualhum thu zilhmi sung a, Vancung Uknak sungah sungtel ahi mitei ziaza, dehphu, covo le deh tuk mite hilh hi (a ngeng 5-7).
(2) Nungzui sawm le pa nih tei theih kulmi (a ngeng 10).
(3) Vancung Uknak thu santehnak (a ngeng 13).
(4) Nungzuitu hihnak i sullam i hum tih zilhnak le, (a ngeng 18).
(5) Hih khang a bonak le a heng tuk laihmi Vancung Uknak thute (a ngeng 24-25).
1
Jesuh Khrih i Puzung
(Luk 3:23-38)
1 Abraham le David casuan Jesuh Khrih i puzung tangthu cu hi bangin hi.
2 Abraham i ca Isaak, Isaak i ca Jakob, Jakob i ca Judah le a suahpih unau panote haw hi.
3 Judah i ca Perez le Zerah (a nu haw Tamar hi), Perez i ca Hezron, Hezron i ca Ram hi.
4 Ram i ca Amminadab, Amminadab i ca Nahshon, Nahshon i ca Salmon,
5 Salmon i ca Boaz (a nu cu Rahab hi), Boaz i ca Obed (a nu Ruth hi), Obed i ca cu Jesse hi. Jesse i ca cu David Kumpipa hi.
6 David khan pen Israel mite Babilon ngamah sal a tan haw tian a pu le pate cu a nuailam bangin hi.
David i ca Solomon (a nu cu Uriah zi hi),
7 Solomon i ca Rehoboam, Rehoboam i ca Abijah, Abijah i ca Asa,
8 Asa i ca Jehoshafat, Jehoshafat i ca Joram, Joram i ca Uzziah,
9 Uzziah i ca Jotham, Jotham i ca Ahaz, Ahaz i ca Hezekiah,
10 Hezekiah i ca Manasseh, Manasseh i ca Amon, Amon i ca Josiah hi.
11 Josiah i ca Jeconiah le a unaupihte hi.Ref 1:11 2Kum 24:14-15; 2Khang 36:10; Jer 27:20
12 Babilon saltannak pen Jesuh hin tian a pu le pate cu a nuailam bangin hi. Jeconiah i ca Shealtial, Shealtial i ca Zerubbabel,
13 Zerubbabel i ca Abiud, Abiud i ca Eliakim, Eliakim i ca Azor,
14 Azor i ca Zadok, Zadok i ca Akhim, Akhim i ca Eliud,
15 Eliud i ca Eleazar, Eleazar i ca Matthan, Matthan i ca Jakob,
16 Jakob i ca Jesuh hingtu Mary i pasal Josef hi.
17 Mah hangin Abraham khan pen David khan tian, khang sawm le khang li hi. David khan pen Babilon tei sal a tan haw tian khang sawm le khang li, Babilon tei sal a tan haw pepan Khrih i hin tian khang sawm le khang li hi.
Jesuh Khrih Hinnak
(Lk 2:1-7)
18 Jesuh Khrih i hinnak cu hi bangin hi. A nu Mary cu Josef in hamin, a huaidun haw deuh laih ngawlin Hawvang Thiangtho ca nei tung tih thei hi.Ref 1:18 Lk 1:27
19 Josef cu midik le mipha a hih ten Mary i zahcak tuk deih ngawlin kuamah i theih ngawlno in zamsan tukin ngaisung hi.
20 Mahnaven hi bangin a ngaihsut laihtakin, Topa i vancungmi pa khat cu a mangah langin hitih hin hilh hi. “David casuan Josef aw, Mary sung a ummi nau cu Hawvang Thiangtho i neihtikmi a hih hangin zi tukin lau pahsun.
21 Amah in capa hing tuk a, a min Jesuh tin sa tuk ci, itahim titale a miphun tei sualnak pen a nun haw pan tuk hi,” tin ti hi.Ref 1:21 Lk 1:31;
22 Topa in profet hum tawnin, a hilh hamsa bangin a kim theihnak tukin na hi. Mah thute cu;
23 “Khanglai himin ca pai tuk a, capa hing tuk hi, a min cu Immanuel tin sam haw tuk hi,” tin a hilhsami a kimnak tukin hi bangin a piangmi hi. Immanuel tihmi cu, “Pathian eimu lakah um,” tihnak hi.Ref 1:23 Isa 7:14;
24 Josef cu a khatlawh ten Topa i vancungmi tei hilhnak bangin Mary cu huai hi.
25 Mahnaven capa a hin tian zaupih ma hi. Capa hingin, a min cu Jesuh ti in sa haw hi.Ref 1:25 Lk 2:21;