MIKAH
Laibu
(The Book of Micah)
Thulamsial
Profet Mikah cu Isaiah tuah khuk khat hi haw in, hanglam ngam Judah peng sung pen suak haw hi. Saklam ngam haksatnak thuak tuk uh ci tin Amos i hilh bangin Judah ngam vangin thuak bok tuk hi. Saklam ngamte a dik haw ngawlnak hangin Pathian in haksatnak a piak bangin hanglam ngam vangin thuak bok haw tuk hi tin Mikah in thei hi. Mahnaven Mikah hilhmi thu sungah, mailamah muansannak umlaih hi tih thu ciang zetin hilh hi.
Himi sung pen tiamteh takmi cu Pathian hangin leihum hempoh ah lemnak um (4:1-4), David casuan sung pen lemdaihnak umtiktu kumpi a suahnak tuk thu (5:2-4) le cang khatno sungah, “A hum uhah Pathian i deihsakmi cu: a dikcangmi bawlin itnak langtik leleng inna, Pathian tuah na pawlkomnak uhah niamkhiatnak nei leleng un hi,” tihmi hi. (6:8).
1
1 Jotham, Ahaz le Hezekiah ten Judah kumpi a deh sung haw in, Moresheth khua mi Mikah nelah Topa i awn heng hi. Samaria le Jerusalem tei thu la tuah pehdunin Topa in Mikah nelah phuang hi.Ref 1:1 2Kum 15:32-16:20; 18:1-20:21; 2Khang 27:1-7; 2Khang 28:1-32:33;
2 Ngai hem un,
leihum miphun hempoh ten thei un!
Cungnungbel Topa in
nangmuh siat hi.
Ngai un!
Vancung a biakinn sung pen
thu hilh.
3 Topa cu a mun thiangtho pen
tolhsuk tuk hi.
Muallekte siksuk thahin tolh tuk hi.
4 Mualte cu meipi sung a,
khuainun bangin
zung haw tuk hi.
Munlawnte hei pokkeh
haw tuk a,
mualhum pen
tui a luang bangin,
hawkluam sungah
5 Hih thute cu kim tuk hi. Itahim titale Israel miphunte cu sualin, Pathian a langpang haw hang hi. Israel sualnak hi akua nawn tuk hung him? A khuapibel haw Samaria nawt hi tuk hi. Judah ngam sungah milim biaknak um a hih ten kua sual nawn tuk hung him? Amah Jerusalem hi toh hi.
6 Mah hangin Topa in, “Samaria cu phul lak a, buak vawknak le sabit kung cinnak munah cangtik tung. Khuapi kulhtiante cu hawkluam sungah caksuktik khawng tung a, khua tawphah suangphumte cu langtik khawng tung hi.
7 A tha ngaihzet haw mi milimte cu vatkeh khawng tung a, biakinn ah numei pha ngawl a piak haw mi na hempoh cu mei ah haltum khawng tung hi. A milim haw cu buaksehin cang khawng haw tuk hi. Samaria in, hi thil sualte hi numei pha ngawl a dehman tuah ngah naven atu-in, a ngal ten mahte cu numei pha ngawl dehmanin pia kikleh haw tuk,” ti hi.
8 Mikah in, “Hiti bang a hih hangin kei cu kapin tau tung hi. Ka khawngaih theihtiknakin, ka ke thacang le pumpi thacangin vak kawkawi tung hi. Cingne bangin ham tung a, kalauk vano bangin ham tung hi.
9 Samaria i meima cu damtikleh theih ma toh hi; Judah vang mahti bang bok kekin thuak tuk hi. Siatsuahnak cu ka mihing tei umnak Jerusalem i kongka ah heng zo,” ti hi.
Ngal Ten Jerusalem Zuan Haw
10 Ngal a sundan uh hi, Gath khua a, na ngal uhte hilh pahsuh un, a kah lih uh hi mu haw pahsuh hen. Beth Leaphrah khua mite, na thasiat uh cu leivulah bualin, langtik un.
11 Shafir khua mite, thacang le zahcakhuai zetin salah hawh un. Zaanan khua umte cu a khua haw pen vaktul ngam haw ma hi. Betherel khua mite a thasiatnak na theih uhten mahlai munah belhnak umma hi tih thei un.
12 Topa in haksatnak cu Jerusalem khua el tiang a hentik zo hangin Maroth khua mite cu bopnak ngah tukin ngakhelzet haw hi.
13 Noh Lakhish a umte na cipuhte cu a leng tuah kencih un. Noh ten Israel i sualnak cu cungin Jerusalem sualtik uh ci.
14 Judah miphunte Moresheth Gath khua cu mangpha tin zamsan un. Akzib khua in Israel kumpi tei nelah bopnak imah pia thei ma hi.
15 Mereshah miphunte, na ngal uhten na khua uh la haw tuk a, Topa in, na ngal tei khut sungah nangmah pia tuk hi. Israel puitute hawhin, Adullam suanghol sungah ngelh haw tuk hi.
16 Judah miphunte, na cano uhte na ngaih uh hangin thasia in, na sam uh met un. Itahim titale na cate uh cu salah kai in, ngamdangah a hawhpih haw tuk hangin na lu uh cu langta lu bangin metkolh khawng un.