22
Biakpiaknak Bawlmi Thianthohnak
1 Aaron le a capate hilh tukin,
2 Moses nelah Topa i thupiakmi cu hi bangin hi. “Ka min thiangtho cu a siat ngawlnak tukin Israel miten ka lakah a piak haw mi biakpiaknak thiangtho cu upat haw hen hi. Keimah cu Topa ing.
3 Na casuante pa kha khat mi thiangtho ngawl a hih hun ten Israel miten ka lakah a piak haw mi biakpiaknak thiangtho elah a hung tale, a nunsung cu ka mun thiangtho ah nadek thei tukma toh hi. Hi thu cu i tuk hun hei ten na zui tuk uhmi hi. Keimah cu Topa ing.
4 “Aaron casuan sung pen phaaknat, ahimata naitul nat nei in, mi thiangtho in, a umlaih ngawl sung cu a thiangthomi biakpiaknak ei ma hen. Miluang a tawngkha tu nate, ahimata ama behtui tulmi thiampi,
5 ahimata a thiangtho ngawlmi ngamsa le mihing a zentu thiampi cu mi thiangtho ngawl hi.
6 Mi thiangtho ngawl thiampi cu mah ni taklam tian mithiang ngawl hi tuk a, ti a bual laih ngawl sung cu a thiangtho biakpiaknak an ei thei tukma hi.
7 Ni tum nung bek ten mi thiangtho hi a, an eih tuk a thiangthomi biakpiaknak cu ei thei tuk hi.
8 Amahno a thi cawm mi ngamsa hihen, sahang tei matmi ngamsa hihen ei pahsuh hen, a ei ahi tale mi thiangtho ngawl hi tuk hi. Keimah cu Topa ing.
9 “Thiampi hempoh ten ka piakmi daan hi zui haw hen. Mahtin ahimata daan thiangtho a palcat haw hangin mikhial hi haw tuk a, thi haw tuk hi. Keimah cu Topa ing. Keima thianthohtik mi hi.
10 “Akua hei hihen, thiampi tuah a um ten hawvangin thiampi i thaman piakmi ahi vangin, thiampi innkuapih ahi ngawlmi hempohin, a thiangmi biakpiaknak cu ei haw pahsuh hen hi.
11 Mahnaven, ama sumpai cikcekin, a lei mi sila, ahimata a innsung suak sila ten thiampi i comi an cu ei thei haw tuk hi.
12 Thiampi ahi ngawlmi, a pasaltu thiampi i canu in, a thiangtho biakpiaknak an cu ei pahsuh hen.
13 Mahnaven thiampi canu a pasal i thihsanmi, ahimata a pasal i maakmi, ca nei ngawlin a pa i innah a kiklehtu cu cawmtu dang a neih ngawl hangin a pa thiampi i covo an ei thei tuk hi. Thiampi innkuapih bekin, biakpiaknak an cu ei thei haw tuk hi.
14 “Thiampi innkuapih ahi ngawlmi pa kha khatin, thu ngaisung ngawlin a thiangthomi biakpiaknak pa kha khat a ei sual tale, thiampi nelah a eihmi man kuan henna, mah i humah za ah sawm nih kuan bet tuk hi.
15 Ei thei tuk hi tih ngawlmi eitikin, a thiangthomi biakpiaknak cu thiampi ten nawngkaitik haw pahsuh hen.
16 Mahti bangin a ei tale mi khial a hih hangin, mahpa in nun hilh dantatnak thuak tuk hi. Keimah cu Topa ing. Biakpiaknak a thiangthotiktu cu keimah ing,” ti hi.
17 Topa in Moses nelah
18 Aaron le a capa ten Israel tei nelah a nuailam a daan hilh tukin thupia hi. Israel mi pa kha khatin, ahimata Israel tei lak a um, ngamdangmi pa kha khatin halkang biakpiaknak a bawl ten, thu a tepmi a cangkimnak tukin hihen, thatui zetin, a bawlmi biakpiaknak hihen, a piakmi ngan cu sonbang ngawlmi hi tuk hi.
19 Co takmi biakpiaknak a hih theihnak tukin sonbang ngawlmi ngan a cang hi tuk hi.
20 Sonbangmi ngan na pia uh tale Topa in sang tukma hi. Ref 22:20 Daan 17:1;
21 Mi pa kha khatin, Topa i nelah lemnak biakpiaknak a bawl ten a thutepmi a cangkim theihnak tukin hihen, thatui zetin, a piakmi biakpiaknakah hihen, a ngan cu sonbang hihim ma hen.
22 A mitcaw, a zengmi, a na mi, meima nei in, a nai a zung kukuih mi, a vun phaakmi le thakphelh nei ngante cu Topa i nelah pia pahsuh un.
23 Thin thiangno in piakmi biakpiaknak tukin ngan taksa him ngawl ahimata taksa kim deuh ngawlmi ngan vang cu pia thei uh ci. Mahnaven thutepmi kimtiknak tukin mahti bang cu co tak kha ma hi.
24 Topa i nelah ngantil sukkehmi, til balmi, til vun a kokmi le a lawngmi cu pia pahsuh un. Na ngamsung uhah hiti bang cu na kham un hi.
25 Ngamdang mitei lak pen na ngah uhmi ngan cu biakpiaknakin mang pahsuh un hi; mahtibang ngan cu son bangmi hi tin tihmi a hih hangin co tak mi hi ma hi.
26-27 Khui hihen, tuu hihen, keel hihen, ca ahin ten ni salih sung cu a pi tuah khenkhuai pahsun un. Mahnaven ni salih nungten biakpiaknakin san tak tuk hi.
28 Ni, ni khat sungin khuipi le ano, ahimata tuu pi le ano biakpiaknakin mang pahsuh un.
29 Na lungdamnak uh cu Topa i nelah biakpiaknak tuah na hentik uhten Topa i co mi na hihnak tukin, ka piakmi daan na zui un hi.
30 Biakpiaknak na bawl ni uhin, ei unna, a zingleh tian khambang zam pahsuh un.
31 Topa in, “Ka thupiak ngai un; keimah cu Topa ing.
32 Ka min thiangtho siatnak tukin bawl pahsuh un. Israel mi hempohin keimah hi a thiangtho hi, tin thei un. Keimah cu Topa ing hi, noh cu ka thianthohtik mite hi uh ci.
33 Nangmu Pathian ka hihnak tukin Izipt ngam pen tultik ing. Keimah cu Topa ing,” ti hi.