2
An Tuah Biakpiaknak
1 Mi pa khatin Topa i lakah an tuah biakpiaknak a bawl ten, amasa in, a an cang cu ngawi vamin, cangho vamin suah tuk hi. Mahnung ten olif situi le namtui leih tuk a,
2 Aaron casuan thiampi tei lakah hunpih tuk hi. Ngawi vam sasang vut cu thiampi in khut pham khat cu situi le namtui tuah la tuk a, Topa i nelah piakmi hi tih theihtupnak tukin biaklandawh humah haal tuk hi. Mahti bangin an cang a halmi ngim cu Topa i ca in namtui mi na hihi.
3 A tangmi cangho vam cu thiampi teita tuk hi. Topa i lak a, piakmi cangho vam sung pen lakmi a hih hangin a thiangmi hi.
4 Topa i lakah a piak haw mi cangho vam cu cangho emnakah em sami le naman cawhhel ngawlmi hi tuk hi. Olif situi tuah cawhhelmi le a sah zetmi cangho, ahimata olif situi noihmi, a pa zetmi cangho hi tuk hi.
5 A piak haw mi cangho cu suankang tuah phanmi cangho ahi tale, olif situi tuah cawhhelmi cangho vam hi tuk hi; naman tel ngawlmi leleng hi tuk hi.
6 Cangho cu nuai vam khawng unna, situi na leih uh tale an biakpiaknak hi.
7 A piak haw mi cu beel tuah phan mi cangho ahi tale cangho vam le olif situi tuah bawlmi hi tuk hi.
8 Topa i nelah hunpih unna, thiampi nelah na pia un; mahten thiampi in biaklandawhah hawhpih tuk hi.
9 A venghawngin Topa i nelah piakmi hi tih theih tupnak tukin thiampi in cangho demno cu la in, biaklandawh humah haal tuk hi. Mahti bangin halmi an ngim cu Topa i ca in namtui mi hi.
10 A tangmi cangho vam cu Aaron le a capa teita hi. Topa i lak a piakmi an sung pen lakmi a hih hangin a thiangzet mi hi.
11 Topa i lakah an tuah biakpiaknak hempoh cu naman hel ngawlmi hi khawng haw tuk hi. Topa i lakah halkang biakpiaknak cu naman hei hihen, khuaitui hei hihen cawhhel ngawlmi hi tuk hi.
12 Kumsialin an thak na piak uhten Topa i nelah hunpih un hi; mahnaven biaklandawh humah haal pahsuh un.
13 An tuah biakpiaknakin, na man uhmi ancang hempoh cu ci sawh khawng un hi; itahim titale ci cu Pathian le nangmuh tei lak lawhah thutepnak langtiktu hi. Biakpiaknak hempoh cu ci noih khawng un hi.
14 Anthak masabel an tuah biakpiaknak Topa i lakah na piak uhten na phan sa uhmi ahimata, na densa uhmi hi tuk hi.
15 Mah hum pen olif situi leih unna, namtui vang leih un hi.
16 Topa i lakah halkang biakpiaknak hi tih theihtupnak tukin na piak uhmi cangho vam khenkhat le situi le namtui hempoh cu thiampi in haal khawng tuk hi.