14
Phaaknat Dam Ten Biakpiaknak
1 Topa in Moses nelah,
2 phaaknat thuak pa damin biakpiaknak tukin, hi daan pia hi. Thiampi lakah hawhpih haw tuk a,Ref 14:2 Mt 8:4; Mk 1:44; Lk 5:14; 17:14;
3 thiampi in pualeu lamah hawhpihin zo tuk hi. A phaaknat a dam ngangai tale,
4 thiampi in, a, thupia tuk a, sonbang ngawl vano pa nih, sidar thing, puansan le hyssop kung a kakte tuah hunpih tuk hi.
5 Thiampi in thupia tuk a, vano pa khat cu tui thiang koihnak leibeel humah ngo hi.
6 Thiampi in adang vano pa khat la tuk a, ngawhsa mi vano i thi sungah sidar thing, puansan le hyssop kung tuah nim tuk hi.
7 A phaaknat pen thianthohtik tukmi pa cu thiampi in vano thi tuah vei salih tian theh tuk a, mahnung ten thiangtho hi, tin tituk hi. A nungmi vano cu ngam lakah hah tuk hi.
8 Mahpa in, a puan sawp khawng tuk hi; a sam met khawng tuk a, ti bual tuk hi; mahten mi thiangtho hi tuk hi. Khua sungah tum tuk a, mahnaven a inn pualeu ah ni salih sung um tuk hi.
9 Ni salihnak ten a sam met lehleu tuk a, khamul, mitmul le a taksa hum a, mul hempoh met khawng tuk hi; a puan sawp tuk a, tuibual tuk hi, mahten mi thiangtho hi tuk hi.
10 A ni liatnak ni ten kum khat kim sonbang ngawl tuucang pa nih le tuulano pa khat hunpih tuk a, olif situi tuah cawhhelmi cangho vam vawh khat le olif situi khuat khat hunpih bok tuk hi.
11 Mahpa le a thianthoh sak tuk mipa cu thiampi in Thukham koihnak Puanbukah hawhpih tuk hi.
12 thiampi in tuucang pa khat cu la in, olif situi khuat khat tuah mawhnak biakpiaknakin mang tuk hi. Topa i nelah thiampi ca tukin a cuangin piakmi laksawng hi.
13 Sualhah biakpiaknak tuk le halkang biakpiaknak tukin ngan a ngawhnak mun hawah mah tuucang cu thiampi in ngo tuk hi. Hihi cu a bawl hihim tukmi hi, itahim titale mawhnak biakpiaknak cu sualhah biakpiaknak bangin thiampi i covo cu a thiangtho zetmi hi.
14 Thiampi in tuucang i thi a khenkhat cu la in, thianthohtik tukmi pa i taklam beng nuai mawk, a taklam khutpi le a taklam kepi ah noih tuk hi.
15 Thiampi in olif situi khenkhat cu la in, ama veilam khut phalh sungah leih tuk hi;
16 Mah situi sungah a taklam mikawk nim tuk a, Topa i mitmuhin vei salih tian theh tuk hi.
17 A khut phalh sung a, ummi situi khenkhat le tuucang thi khenkhat cu la in, thianthohtik tukmi pa i taklam beng nuailam mawk, a taklam khutpi le a taklam kepi ah noih tuk hi.
18 A khut phalh sungah a tanglaih mi situi cu mahpa i lu ah noih tuk hi. Thianthohtiknak cu thiampi in bawl tuk hi.
19 Thiampi in sualhah biakpiaknak bawl tuk a, thianthohnak bawl tuk hi. Halkang biakpiaknak tuk ngan cu ngo in,
20 biaklandawhah biakpiaknak bawl tuk hi. An tuah biakpiaknak vang bawl tuk hi. Thiampi in thianthohnak bawl tuk a, mahpa cu mi thiangtho in suak tuk hi.
21 Mahpa cu zawngkhalin, imah a lei thei ma tale, a thianthohnak tukin tuucang pa khat bek hunpih henna, mawhnak biakpiaknak tukin pia tuk hi. Hihi cu Topa i nelah a cuangin, a piakmi laksawng hi. Olif situi tuah cawhhelmi sangvut leel tan bek an biakpiaknak tukin cawi tuk a, mawhnak biakpiaknakin mang tuk hi.
22 Khulo pa nih ahimata laileng pa nih cu a piak theih babangin pia tuk a, pa khat cu mawhnak biakpiaknak ca hi tuk a, a pa khat saw cu halkang biakpiaknak ca hi tuk hi.
23 A ni liatnak a thianthohnak ni-in puanbuk kongka a thiampi lakah pia tuk hi.
24 Thiampi in tuucang le olif situi la tuk a, amah cuangce laksawngin thiampi pai tuk hi.
25 Tuu cu ngo tuk a, a thisan khenkhat a lak ceng ten mahpa i taklam bengcep le a taklam khutpi le a taklam kepi ah noih tuk hi.
26 Thiampi in situi khenkhat cu ama vei lam khut pa nih phalh sungah leih tuk a,
27 a taklam mikawk tuah Topa i mitmuhin situi khenkhat cu vei salih tian theh tuk hi.
28 Tuucang thi a noihmi, a taklam bengcep, a taklam khutpi le a taklam kepi ah situi noih tuk hi.
29 A khut phalh sung a tanglaihmi situi cu mahpa i lu ah noih tukin, thianthohnak cu bawl hen hi.
30 khulo pa khat ahimata laileng pa khat cu,
31 sualhah biakpiaknakin mang tuk a, adang pa khat cu halkang biakpiaknak le an tuah biakpiaknak tuah pia tuk hi. Thiampi in thianthohnak cu bawl tuk hi.
32 Hihi cu mi lawh thei phaaknat nei in, midang bangin biakpiaknak a bawl thei ngawlmi tei ca in piakmi daan hi.
Inn Baalbu
33 Topa in Moses le Aaron nelah,
34 Kanaan ngam Israel tei co tukin a piak tukmi ngamah a tum haw ten, a innsung hawah baalbu umin, mah baalbu cu a zalh pepel tale, a nuailam a, daan hi a zui haw tukin piakmi hi.
35 Mi pa khatin, a inn baalbu hi tih amuh ten thiampi nelah hawhin hilh tuk hi.
36 Thiampi in inn zo tukin a hawh laih ngawlin innsung a, ummi na hempoh na thiangtho ngawlin sialcih a hih ngawlnak tukin, thawn khawng tukin thupia tuk hi. Mah nungten hawh tuk a,
37 Inn baalbu cu zo tuk hi. A baalbu pianzia cu tangphaw thim ahimata a santhah canin, a pang a ei tale
38 Mah inn cu zam tuk a, ni salih sung tawh kalh tuk hi.
39 A ni salihnakah inn cu zoleh tuk hi. A baalbu a zalh tale,
40 a baalbu umnak suangte cu la in, khuapi pualeu mun thiangtho ngawl munah vawk tukin thupia tuk hi.
41 Mah nungten kulhtian sunglam hempoh ziah khawng tukin le kulhtian hum a mat haw mi lei cu la khawngin, khuapi pualeu mun thiangtho ngawl munah vawk tukin thupia tuk hi.
42 a vawk haw mi suang ai-in adang suangte mang haw tuk a, kulhtian cu tak lei manleh haw tuk hi.
43 Suangte vawkin, a kulhtian haw ziahin, a matleh khawng ceng haw ten inn cu a baalbu leleng tale,
44 thiampi in zoleh tuk hi. A baalbu a zalh ngangai tale, inn cu inn thiangtho ngawl hi.
45 Mah inn cu phiatlet tuk hi a, suang, thing le a mat haw mi taklei hempoh cu pua in, khuapi pualeu mun thiangtho ngawl munah vawk haw tuk hi.
46 Hi inn tawh a kalh sung haw in, a sung a tumtu pawpoh cu mah ni taklam tian, mi thiangtho ngawl hi tuk hi.
47 Hi inn sung a zau mi le an a ei atu-in, a puan sawp khawng tuk hi.
48 Thiampi hungin, a zoh ten, inn pangte a matleh nung haw ten a baalbu a suak lehmi ahi tale, a baalbu cu phaleh toh a hih tak thiampi in, mah inn cu inn thiangtho hi tituk hi.
49 Inn thianthohnak tukin thiampi in vano pa nih, sidar thing, nim san le hyssop kung pa khat hunpih tuk hi.
50 Vano pa khat cu tui thiangtho koihnak tuk a, bawlmi leibeel humah ngo tuk hi.
51 sidar thing, hyssop kung, nim san le vano a nungmite cu la in, a ngawh mi vano thi sungah le tui thiangtho koihmi sungah nim tuk hi. Mah nungten inn cu vei salih tian theh tuk hi.
52 vano thisan, tui thiangtho, vano nung, sidar thing, hyssop kung le nim san tuah inn cu thianthohtik hi tuk hi.
53 vano nung cu khuapi pualeu ham lakah hah tuk hi. Mah bangin thianthohnak cu inn ca tukin bawlin, inn cu inn thiangtho suak tuk hi.
54 Hite cu mi lawh thei phaaknat;
55 puan hihen, inn hihen, a baalbu mi,
56 meima, uilut ahimata meima siate,
57 a thiangtho le thiangtho ngawl tih langtiknakin piakmi daan hi.