10
Nadab le Abihu Sualnak
1 Aaron i capa Nadab le Abihu in meiling laknak thik kuang la veve haw a, meiling koihin namtui a hah nung haw ten, Topa i nelah pia haw hi. Mahnaven hi mei cu a thiang ngawl mi hi. Itahim titale amu bawl tukin, Topa i thupiak ngawlmi hi.
2 Phawhkhak ngawlin, Topa i mai pen mei alh tulin, mah mei in kangin thi haw hi.
3 Moses in Aaron nelah, Topa in, “Ka nadektu hempohin ka thianthohnak upat haw hen; ka hinnam tei nelah ka huham langtik tung hi; a tih ten a son nuammi cu hihi,” ti hi. Mahnaven Aaron cu imah awn ma hi.
4 Moses in Aaron pa i suahpih Uzziel i capa Mishael le Elzafan samin, “Hung unna, na unau tei luang hi Puanbuk thiangtho mun pen la in, ngiahnak pua leu lamah koih un,” ti hi.
5 A tih bangin hawh haw in, a luang haw cu a puan haw tuah dangin Moses i thupiak bangin ngiahnak pualeu lamah koih haw hi.
6 Moses in Aaron le Aaron capa Eleazar le Ithamar tei nelah, “Mithi ngai in, na puan uh na botkek uh tale thi tuk uh ci. Topa cu Israel hinnam venghawng humah a thinuk tuk hi. Mahnaven Topa i hentikmi mei i kanghupmi mithi hi, na nampih uh Israel midang ten ngai thei haw tuk hi.
7 Puanbuk kongka pen tul pahsuh un, na tul uh tale thi tatak tuk uh ci. Itahim titale Topa i sathau thihmi situi tuah thianthohtikmi hi zo uh ci,” ti hi. Moses i hilh bangin bawl haw hi.
Thiampi Tei Ca Daan
8 Topa in Aaron nelah,
9 “Nangmah le na casuante ka umnak Puanbuk sungah na tum uhten sabittui le beer inviang pahsuh un. Na tum uh tale thi tuk uh ci. Hi daan cu na casuan uh hempoh ten zui haw hen.
10 Topa ta ahi mi le mipi tei man ten tukmi na cu na deidat thiam uh kul tuk hi; thil thiang le thiang ngawl vang na theihthiam uh kul hi.
11 Moses lak pen ka piakmi daan hempoh cu Israel mite zilh khawng un,” ti hi.
12 Moses in Aaron le a nunglaihmi a capa pa nih, Eleazar le Ithamar nelah, “ Topa i lak piakmi an sung pen a tangmi an tuah biakpiaknak cu la unna, mahmi tuah naman hel ngawl cangho bawlin, biaklandawh el pen ei un, itahim titale hi cu a thiangthomi biakpiaknak hi.Ref 10:12-13 Thiam 6:14-18;
13 Mun thiangtho sung pen ei un hi. Topa i lakah piakmi an sung pen nangmuh le na capa tei covo hi. Hi cu Topa in ka nelah thu a piakmi hi.
14 Mahnaven nangmuh le na innkuapih uhten thiampi teita tukin, Topa i lakah a cuampengin piakmi laksawng, a kawng le a awm cu ei thei tuk uh ci. Mahmi cu a thiangtho mun pen ei un hi. Israel miten pawlkom biakpiaknak a piak haw sung pen nangmuh le na canau tei covo tukin hi cu piak hi zo hi.Ref 10:14-15 Thiam 7:30-34;
15 Topa i nelah biakpiaknak bawlin, a thau a piak haw ten a kawng le a awm cu a cuampeng laksawngin hunpih haw tuk hi. Topa i thupiakmi bangin hi na covo uhte cu nangmuh le na ca uhten a kumkhua in co tuk uh ci,” ti hi.
16 Moses in, sualhah biakpiaknak tuk na tih uhmi keel i cungcang a dot ten, mei tuah haal zo haw tih cu thei hi. Aaron i capa pa nih Eleazar le Ithamar humah Moses cu a thinuk ngangai in,
17 “Ita sualhah biakpiaknak cik cu mun thiangtho pen na eih tukin a piak zo mi si, ita ei ma uh cim? Israel hinnam a sualhahnak tukin Topa in, na eih tuk uh a piak zo mi hi a, a thiangthomi hi.Ref 10:17 Thiam 6:24-26;
18 A thi cu Puanbuk thiangtho sungah hunpih mi a hih ngawl hangin ka hilhsa bangin hi biakpiaknak cik cu mun thiangtho pen na eih tuk uh hihim hi,” tin liatnek hi.
19 Aaron in, “Israel miten tuni in, Topa i nelah a sualhah biakpiaknak le a halkang biakpiaknak haw bawl zo haw hi. Ka humah hi ti bang thusia a hen laih takin sualhah biakpiaknak cik cu ka ei a hin, Topa cu a lungdam cuang ni maw?” tin ti hi.
20 Mahmi Moses in, a theih ten a lungkimleh hi.