10
Ahab Casuante That Haw
1 Kumpi Ahab i canaute cu Samaria khuapi sungah sawm salih um haw hi. Jehu in lai pa khat nganin, khuapi uktute, ngamsung upate le Ahab canau cingkhawitu upa tei lakah kuat hi. Mah a lai sungah
2 “Kumpi canau cingkhawitu le a hum haw a dehvo neitu hi uh ci. Ngal kulhtiante, hiamnamte, cipuh le cipuhlengte nei tiptep uh ci. Hih laikuat na ngah bek uhten,
3 kumpi canau tei lak pen a khawthubel tuk na tih uhmi teng unna, kumpi dektik un hi; mahten ama lamah tangin ngaldo un,” ti hi.
4 Samaria uktute cu a thinsuzet haw hi. Kumpi Joram le kumpi Ahaziah tei neh ngawlmi Jehu cu kohten itin kaw ka do thei tuk uh? tin ti haw hi.
5 Kumpi i inn uktu bawi, khuapi uktu, ngamsung upate le kumpi canau cingkhawitu upa ten Jehu lakah thucah haw in, “Kohte cu na sila ung, na hilhmi hempoh bawl khawng tuk ung hi. Mahnaven kuamah in, nang kumpi dekin, tin ti tukma ung. A phabel na tihmi cu bawl pohin,” ti haw hi.
6 Jehu in laikuat dang pa khat ngan lehin, “Ka lam tangtu le ka thupiakmi zui na tum uh tale, kumpi Ahab canau tei lu cu ka umnak Jezreel khua ah zingten tu hunin hunpih un,” ti hi.
Kumpi Ahab i canau sawm salihte cu Samaria khuapi sung a um upa hotu ten cingkhawi in zo haw hi.
7 Jehu i laikuat a ngah haw ten khuasung upa ten Ahab canau sawm salihte cu thatin, a lu haw cu bawm sungah koihin Jezreel khua Jehu lakah kuat haw hi.
8 Ahab canaute i lu heng hi tih thu Jehu a hilh haw ten amah in, mah lute cu khuapi kongkhah mun nihah tiangin, a zing tian mahlai ah zam tukin thupia hi.
9 A zingten Jehu cu khuapi kongkhahah hawhin mahlai a um mipi tei lakah, “Kumpi Joram a suamtu le a thattu cu keimah ing hi, mah thu ah nohtei humah mawhnak imah umma hi. Mahnaven hite hi a koi thahmi haw kaw?
10 Hihi cu Ahab canau tei hum a, Topa i awnkam kim hi tih langtiknak hi. Topa amah in, profet Elijah lakah a thutepmi cu bawl zo,” ti hi.
11 Jezreel khuasung a, um Ahab i unaupihte, a khutnuai bawite, a ngualcam phate le a thiampite cu a venghawng haw in, Jehu in that khawng hi; pa khat hei zam ngawlin that khawng hi.Ref 10:11 Hos 1:4;
Ahaziah Sangngamte That Haw
12 Jehu cu Jezreel pen tulin Samaria khua ah hawh hi. Lampi ah, “Tuucing Tei Ngiahbuk,” a tih haw mun a hen ten,
13 Judah kumpi Ahaziah i sangngamte tawk hi. “A kuate uh kam?” tin dong hi.
Amuh ten, “Ahaziah i sangngam ung hi! Jezreel ah kumpinu Jezebel i cate le kumpi sangngamte tawk tukin le upatnak pia tukin hawh tuk ung,” ti haw hi.
14 Jehu in, “A nungin man khawng un,” tin, a ngalkapte cu thupia hi. Man haw in, mahlai a khuk pa khat elah Jehu in, a venghawng haw in, that khawng hi; mihing sawm li le pa nih haw in, pa khat hei tang ngawlin that khawng hi.
A Tangmi Ahab Sangngamte That Haw
15 Jehu cu hawhlehin, lampi ah Rekhab i capa Jonadab in muak hi. Jehu in nuksatin, a lakah, “Nangmah ka tanpih bangin na lungmu ngangai tuah kei hi tanpih cim?” ti hi.
“Tanpih ing,” ti hi.
Jehu in, “Mahtin ahi tale na khut hu sanin,” ti hi. A khut cu sanin, Jehu in cipuhleng humah dokto hi.
16 Jehu in, “Ka lakah hawh bok inna, Topa i ca in iti zahin kaw teimak ka suah tih cu mu tuk ci,” ti hi. Samaria khuapi ah hawh haw hi.
17 A hen haw ten Ahab sangngamte cu Jehu in that khawngin; pa khat hei khawih ma hi. Topa in Elijah lak a hilhmi kim khawng hi.
Baal Biatute That Haw
18 Jehu in Samaria mite cu munkhatah samkhawmin, a lak hawah, “Kumpi Ahab in, Baal pathian i na cu demno bek dek hi. Kei in nase zetin dek tung.
19 Baal profet, amah biatute le a thiampite, a venghawng haw in, sam khawm un. Hung thei tuk mang titu kuamah um haw ma hen; itahim titale Baal pathian lakah biakpiaknak nase zetin bawl tuk ka hih ten a tel ngawlmi cu thah hi haw tuk,” ti hi. Baal biatute that khawng nuamin, Jehu in hi bangin zol hi.
20 Jehu in, “Baal upatnakah le amah biaknakah colh ni bawl un,” tin thupia hi. A tih bangin bawl haw a,
21 Jehu in Israel ngamsung khua tihkimah thuthan khawng hi. Baal biatu hempoh cu hung khawng haw in; a hung ngawl pa khat hei um haw ma. A venghawng haw in Baal biakinn sungah tumin, ke khiaknak tuk hei awng ngawl tianin dim ikek haw hi.
22 Jehu in angkicual cingtu thiampi lakah, “Angki cualte suahin hi,” tin thupia hi. Amah in suahin, Baal biatu tei lakah pia hi.
23 Mah nungten Jehu le Rekhab capa Jonadab cu biakinn sungah tum haw a, Jehu in, a lak hawah, “Ngalling un; hi biakinn sungah Topa a biatu kuamah tel thei tukma uh ci; Baal a biatute bek tel haw tuk hi,” ti hi.
24 Jehu le Jonadab cu biakpiaknak le halkang biakpiaknakte bawl tukin tum haw hi. Biakinn pualamah ngalkap sawm liat koih zo in, amuh tei lakah, “Hite cu that khawng unna, pa kha khat a luattiktu cu ama nunnakin kuan tuk hi,” tin thupia ham zo hi.
25 Jehu in biakpiaknak a bawl ceng bek ten, biakinn cingtu ngalkap le bawi tei lakah, “Tum unna, that khawng un; kuamah luat ma hen,” ti hi. A ngalnam haw dawksa tuah tumin, a venghawng that khawng haw hi; a luangte cu biakinn pualamah dok tul haw hi. Mah nungten a biakinn haw i sungta khanah tumin,
26 mahlai a ummi Baal milimte cu la in haal khawng haw hi.
27 Baal biakinn le Baal suangphutte siatsuah khawngin zun le ek sannak munah mang haw a, tusun tian mangta haw hi.
28 Jehu in Israel ngamsung a, Baal biaknak cu siatsuah khawng hi.
29 Mahnaven Israel a puisualtu kumpi Jeroboam i sualnak cu bawl leleng bok hi, Bethel le Dan ah sui khuicang zuk bia haw in, mah sualnak cu nungtik leleng hi.Ref 10:29 1Kum 12:28-30;
30 Topa in Jehu lakah, “Ahab casuan tei humah bawl tukin ka deih sakmi cu bawl khawng ci. Mah hangin na casuante cu khang linak tian Israel kumpi hi haw tuk hi tin thutiam ing,” ti hi.
31 Mahnaven Jehu in, Topa Israel Pathian daan cu a lungmu venghawngin zui ma hi; Israel a puisualtu Jeroboam i lampi cu taisan thei ma hi.
32 Mah hun ten Topa in Israel ngam cu cawngcik dedeuhtikta hi. Siria kumpi Hazael in Israel ngam,
33 Jordan nisuahnak lam hempoh, Arnon Ngun mawk a ummi Aroer khuapi tianin hanglam pen la khawng hi. Hi a lakmi sung pen Gad hinnam, Reuben hinnam le Manasseh hinnam tei umnak Gilead Bashan ngamte tel khawng hi.
Jehu Thihnak
34 Jehu in ngalpha zetin, a bawlmi dadang cu Israel Kumpi Tei Khang Tangthu Laibu sungah sialsiah khawng haw hi.
35 Jehu cu thi in, Samaria ah vui haw hi. A capa Jehoahaz in kumpi dek hi.
36 Jehu in Israel ngam cu Samaria pen kum sawm nih le kum liat sung uk hi.