46
Karkhemish Ah Izipt Ngal Sung
1 Topa in, hinnam tei thu le late ka lakah hilhin,
2 Izipt thu pepan hi. Jehoiakim in Judah kumpi a deh sawng kum linakin, Babilon kumpi Nebuchadnezzar in Izipt kumpi Neko cu nehin, Izipt ngam cungcangah Topa in hi bangin ti hi.Ref 46:2-6 Isa 19:1-25; Ezk 29:1-32:32;
3 Izipt ngalbawite cu au haw,
‘Na lumphaw uh
mansa in um unna,
ngaldonak munah
hawh un!
4 Na cipuh uhte tuangtim unna,
a humah khung un!
A zawndunin ding unna,
na thik lukhu uh khu un!
Na ceipi uh hiam zetin tat unna,
na thik angki uhte silh un,’
5 “Mahnaven ka muhmi hi i heng?
Thinsu in nunglam
a kih haw mu ing.
A ngalkapte haw nunglamah
a kik haw mu ing, lau leita in,
a tai keh khawng haw
mu ing.
Nunglam hek kikleh
haw ma hi.
6 Mahnaven taicakte tai suak
haw ma hi.
Ngalkapte cu luat cuang
haw ma hi.
Eufrates el Saklamah lum haw hi.
7 Nail ngunpi bangin a khangthuah lite
hi akua haw him?
Tuimawk let tianin, a luangmi
ngun bangin!
8 Izipt hi, Nail ngunpi bangin
a khangtu cu!
A mawk tiang a letmi
ngunpi bangin hi.
Izipt in, ‘khangto tung a,
leihum buppi
khuh khawng tung;
khuapi hempoh cu
a sung a um mihingte tuah!
9 Cipuhte hawh tukin thupia un,
cipuhlengte vang
tai zuzut tukin!
Ngalkapte kuat un,
Ethiopia le Libia ngam a,
thalkap thiamte,’ ”
10 Tuni hi Cungnungbel
Topa i ni hi.
Tuni in phu la tuk hi.
Tuni in, a ngalte
bawl sia tuk hi.
A ngalnam cu ei tuk a,
vonvahzet tuk hi.
A thisan intuk a,
khamzet tuk hi.
Tuni in Cungnungbelin
biakpiaknak bawl hi,
Saklam ngam
Eufrates ngun mawkah!
11 Izipt mite, Gilead ah
hawh unna,
damnak si zei un hi!
Na si uhte mantak ngawlin
suak khawng tuk a,
damtik thei haw tuk ma hi.
12 Minam hempohin,
na zahcaknak
thei zo haw hi.
Na kahnak cu
leihum buppi ah thang hi.
Ngalkap cu
a dang ngalkap humah
lum hi.
A pa nih haw in
leihumah lum haw hi.
Nebuchadnezzar Heng
13 Babilon kumpi Nebuchadnezzar cu Izipt do tukin a hen ten Topa i awnkam ka lakah heng hi:Ref 46:13 Jer 43:10-13;
14 Izipt khua tei lakah thanin;
Migdol, Memfis le
Tahpanhes lakah,
‘Tho unna, tha suah un,
Na neihmi uhte cu ngaldonakah,
siatsuah khawng
hi haw tuk hi!
15 Ita na pathian uh a maksanmi
Apis cu lum kaw?
Topa in, a vahvawk hang hi,’
ti in hi.
16 Na ngalkap uhte cu atu-in,
lum haw hi.
Pa khat le pa khat otpihdun haw in,
‘Nawhkhah un!
a inn uh le
a mihing tei lakah
kikleh nung,
A ngal tei
ngalnam lak pen tai nung,’
17 “Izipt kumpi lakah
min thak pia un,
‘Hunpha Pialtiktu Pontam Pa,’
ti un hi.
18 Cungnungbel Topa,
Keimah hi kumpi ing.
Keimah hi a nungmi Pathian ing.
Mual dangte sangin
Tabor mual a san bangin,
tuipi hum a,
Karmel mual a din bangin,
Nangmah a dotu i ngilnak cu
hi tuk hi.
19 Izipt mite, sila mat pui vawkmi
hi tukin mansa un.
Memfis khua cu phillawnin
suak tuk hi.
Kua ma um nuam ngawlnak
phillawn ngam hi tuk hi!
20 Izipt cu khui thauzet bang hi.
Mahnaven saklam pen
khuai-ngalin dep.
21 Ni lawh a piakmi ngalkapte hei in,
khuino bangin imah
nemcuam haw ma.
Thasuahin ngaldo kuamah
um haw ma hi.
A venghawng haw in
nunglamah heklehin
taivawk haw hi.
A lung-ap ni haw heng zo hi.
A siatlalnak hun heng zo.
22 Izipt cu thawmvang nei zetin
taivawk hi.
Ngul bangin mi phit thahin,
ngalte a hen haw ten!
Heipi tuah do in,
thingkungte
phuk khawng haw hi.
23 Tupi thingte a siatsuah khawng
haw bangin,
A mihing haw cu sialcelh haw ma.
A ngalte cu miksi sangin
tam saw haw hi.
24 Izipt mite cu zakca in um haw hi;
saklam miten neh haw hi.
Keimah, Topa in hilh zo ing.”
25 Cungnungbel Topa Israel i Pathian in, “Thebes khua a pathian Amon cu Izipt le a pathian le a kumpite tuah dantat tung hi. Izipt kumpi le amah a muangtute hempoh la tung a,
26 Amah a that nuamtu Babilon kumpi Nebuchadnezzar le a ngalkap tei khutah pia tung hi. Mahnaven hun dawllam ten Izipt ngam sungah a tanglaihmi a um zo haw bangin umleh haw tuk hi. Keimah, Topa in hilh zo ing hi,” ti hi.
Topa In A Mihingte Pan Tuk
27 “Ka mihingte lau pahsuh un;
Israel mite
na thinsu pahsuh un,
thang na tannak uh
ngam khawlapi pepan tung hi.
Kikleh tuk uh ci,
a lungmuang zetin
um tuk uh ci.
Himno umin, kuamah in
lautik haw tukma hi.Ref 46:27-28 Jer 30:10-11;
28 Na lak uhah hungin hup tung hi.
Ka khenkhekmi ngam le
hinnamte cu siatsuah tung.
Mahnaven nohte cu siatsuah
tuk mang hi.
Bawlsia ngawlin
hah thong tuk mang.
Mahnaven ka bawlsiat ten,
dik zetin bawl tung hi.
Keimah, Topa in
hilh zo ing.”