31
Israel Kihlehnak Tuk
1 Topa in, “Israel miphun hempoh tei Pathian ka hih tuk hun heng tuk a, a muhte cu ka mihing hi haw tuk hi.
2 Phillawnah thihnak pen a luatmi tei lakah hehpihnak langtik ing. Israel miten colhdamnak a zei haw laih takin,
3 lam khawla pi pen amu lakah lang ing. Israel mite, ka ihzet sa mi hi uh ci, na hum uhah itnak cu a tawp ngawlin nei tung.
4 Tungdingleh tung a, na khuangnote tuah lungdamin lam zezeuh leh tuk uh ci.
5 Samaria mualah sabit huan bawlleh tuk uh ci. Huan sung pen a suakmi an ei tuk uh ci.
6 Mahzuh hi, ngalcingtu ten Efraim mualhum pen, ‘Zion ah hawh nung, Topa a Pathian uh i lakah, tin, a aunak haw tuk hun heng tuk,’ ” tin ti hi.
7 Topa in,
“Israel i ca lungdamnak tuah au un,
miphun lak pen
miphun ngengbel i canu tei ca in,
Topa in, a mihingte
pan zo toh,
a tang calamnote vang
hup zo hi,
tin lungdamnak la sa un.
8 Saklam pen pui khawm tung.
Vanmawk deng pen
cawm khawm tung.
Mitcaw le kebai thahin
hung haw tuk hi.
Numei naupai le,
nauhing kuante tuah
a kihleh haw ten
miphun ngengpi
hi haw tuk hi.
9 Ka mihingte cu a kapthahin
kikleh haw tuk hi.
Pui kikleh tung thungen thahin hi.
Tui luannak munah khol tung.
A bah haw ngawlnak tukin
lampi tuang pen,
Israel ca in, a pa haw bang tung a,
Efraim cu ka capa upabel,”
ti hi.
10 Topa in,
“Miphun hempoh, ngai unna,
ka thu cu tuipi mawk
khawlanak ah phuang un.
A mite khenkeh khawng ing.
Mahnaven cawmleh khawng tung.
Tuucing ten tuu
a khol bangin,
kholleh tung hi.
11 Israel mite cu luattik zo ing.
A ngilzet mi miphun tei
khut sung pen luan zo ing.
12 Zion mualah lungdam zetin
lasa thahin hung haw tuk a,
an, sabit, olif situi
ka laksawng hangin le
tuu le khui ka laksawng hangin
thatui haw tuk hi.
Tui tamzet leihmi huan
bang haw tuk a,
a kulmi haw hempoh
nei haw tuk hi.
13 Khanglaite lamin,
lungdamzet haw tuk hi.
Tangvalte le khangno,
upa ti ngawlin
lungdamzet haw tuk hi.
Hehnem tung a,
a mithi ngaihnak haw cu
lungdamnakin thek tung hi.
A thasiatnak haw cu
a thatuinakin bawl tung.
14 Thiampi tei pum cu
an ukbel tuah vonvahtik tung.
Ka mihing tei deihmi
kimtik khawng tung.
Keimah, Topa in,
hilh zo ing.”
Israel Humah Topa Hehpihnak
15 Topa in,
Ramah khua ah aw nging za haw,
taunak le kahnak aw hi.
Rachel cu a cate ngai in kap hi.
A hawhsan khawng haw hangin,
a lemin, ngimtik theih ma.Ref 31:15 Pian 35:16-19; Mt 2:18;
16 Kap ngawltohin, suup inna,
na hitui hu tohin hi.
Na ca tei ca na bawlmite cu
dehman laksawng
ngah ngawlin
um tukma ci.
Ngal tei ngam pen kikleh
haw tuk hi.
17 Na mailam ca in
muansan tuk um hi.
Na cate cu kikleh haw tuk hi.
Keimah, Topa in
18 “Israel mite thasia zetin,
a kah haw za ing.
‘ Topa, khem laih ngawlmi
nganhing bang kek ung.
Mahnaven nangmah in,
na thu zui dan tuk hilh ci.
Kiklehtik zazalin hi, na lakah
kikleh tukin mansa hial ung.
Kohtei Topa le Pathian!
19 Nangma lak pen
mundangah pial ung.
Mahnaven ngei can um ngawlin
kikleh nuam ung.
Na bawlsiat nungsang cu
thasia in lu kun thong ung hi.
Zakca le mualpho in umthong ung hi.
Ka khanno uh laihin
ka sual uh hangin,’ ti haw hi.”
20 “Israel, nang cu
ka capa deihbelmi ci.
Ka ihbelmi ka capa ci.
Na min ka lawh sial ten
itnak tuah ngaisung leleng ing.
Ka lungmu hi
nangmah ngawlin um thei ma hi.
Hehpihnak na lakah
nei leleng tung.
21 Lampi humah melciknak le
sialsiahnak bawl inna,
na hawhnak sa lampi lun khi
zei kiklehin hi.
Israel mite kikleh unna,
na zamsa uhmi
khuate ah zuanleh un hi.
22 Muantak ngawl mihingte,
Ituk tuk tian kaw
lungmu aicangin,
na um hih tuk uh?
Thil a thak le phundangin
piangtik zo toh sing.
Thil a thak le phundang
a hihdan cu,
Numei in pano humhim tuk
tih bang miau in
dangsazet hi.”
Pathian Mihing Tei Mailam Ca Tuk
23 Cungnungbel Topa, Israel i Pathian in, sal a tannak pen a ngam hawah ka pui kikleh ten Judah ngam le a khua hawah;
‘ Topa in,
Jerusalem mual thiang cu,
muicu pia zal tahen,
A ma umnak
mun thiangtho hi,
tin tileh haw tuk hi.’
24 Judah khua le ngamah, mi um haw tuk a, lobungte le tuucingte vang a tuu a honte tuah um haw tuk hi.
25 Tamsawl mite a tha haw henglehtik tung a, an ngawlin a tamsawl mite an khamtik tung.
26 Mah hangin mipi ten, ‘Hihbu ing a, lungvak seuhin tho ing,’ tin ti haw tuk hi.
27 “Keimah, Topa in, ti ing. Hun heng tuk a, Israel le Judah ngam cu mihing le nganhing tuah dim lehtik khawng tung.’
28 Botvawk ing a, bal khawng ing, vawk mangin, siatsuah ing a, ka paih mangtik bangin atu hei in ngalling zetin phut tung a, dinglehtik tung hi.
29 Mah hunin mipi ten;
‘A nu le pa ten sabit thuk ei haw,
Mahnaven a ca tei ha di,’
ti haw tukma toh.Ref 31:29 Ezk 18:2;
30 Akua hei hihen sabit thuk a eitu cu ama ha di tuk hi. Akua hei hihen ama sualnak hangin thihnak tawk tuk,” ti hi.
31 Topa in, “Israel le Judah mite tuah thutepnak a thak ka bawlnak tuk hun heng tuk hi.Ref 31:31 Mt 26:28; Mk 14:24; Lk 22:20; 1Kor 11:25; 2Kor 3:6;Ref 31:31-34 Heb 8:8-12;
32 A pu le pate Izipt ngam pen a khut haw pen ka puitul laihin, amuh tuah thutiamnak ka bawlmi, thutepnak a lun bang kha tukma hi. A pa haw bang naveng amuh ten mah ka thutepnak cu zui haw ma.
33 Israel tuah thutepnak ka bawlleh tukmi cu hitih bangin hituk hi. Ka daan cu a sungmu ngil hawah koih tung a, a lungmu sungah ngan tung. Kei hi, a Pathian haw hi tung a, amuhte cu ka mihing hi haw tuk hi.Ref 31:33 Heb 10:16;
34 Kua ma mah Topa thei tukin zilhdun kulleh haw tukma toh. Itakaw titale a ngeng le neu tih um ngawl, a venghawng haw in thei khawng haw tuk hi. A sualnak haw ngaidam tung, a mawhnak haw cing leng tuk mang. Keimah, Topa in hilh zo ing,” tin ti.Ref 31:34 Heb 10:17;
35 Topa in,
sun khuavaktiktu tukin
ni bawl, zanlam vaktiktu tukin
Hade le aksite bawl hi.
Tuipi cawktikin thum dudumtik hi.
A min cu
Cungnungbel Topa hi.
36 Lei le van, ni le ha a um sungin,
Israel miphun vang
um bok tuk tin Topa in t
hutiam zo hi.
37 Ni kha khat ten humlam van khi,
suum teh theih bang a hin,
leipi i bul khi kan theih
ahi bang ahin,
Mah bek ten Israel miphun hi
lawl tuk laih,
A thil tih sualnak haw i hangin,
Topa in hilh zo tin ti hi.
38 Topa in, “Jerusalem cu a pumpi in keima khuapi in tundinleh a hihnak hun heng tuk hi. Hananel inn dot sang pen a upnak ni tumnak lam kongbiang kil tian lemleh khawng tuk hi.
39 Khuapi ngam ngi cu mahlai pen ni tumnak lamah Gareb mual tian, mahten a kimsuakin Goab tian hi tuk hi.
40 Mithi vuinak le buak a vawknak haw munlawn buppi le Kidron luimawk kuam hum a, ngam hempoh, nisuahnak lam pen cipuh kongka tian, a venghawngin keima ca in mun thiangtho hi tuk hi. Khuapi cu ituk mahten phiat le siatsuah hileh tukma toh,” tin ti hi.