14
Nguahzu Ngawlnak Thu
1 Topa in, nguahzu ngawlnak thu ah hi bangin hilh hi;
2 “Judah cu thasia in um.
A khua haw tale ko cucung;
A mihingte thasia in lei ah bok haw hi.
Jerusalem vang bopnak
deihin au hi.
3 Mihau ten tuicawi tukin
a silate hah haw hi.
Tuikhukah hawh haw naven tui umma.
A tuibing haw tuah thacangin
kikleh haw hi.
Thasia amthongin um haw hi.
4 Nguahzu ngawlin
lei a ko leita hangin,
lobung mite amthong haw hi.
Thasia in, a mai haw cu
puan tuah hup thong haw hi.
5 Hamhing a um ngawl hangin
hampa lakah sazukin,
a cano zamsan.
6 Hampalak a laak cu
mualkulah a dingmi,
cingne bangin a hai hawh tuk
zei in hai zawzok hi.
An a ngah haw ngawl hangin
a mit haw in
khua mu thei ma zo.
7 Ka mite ka lakah au haw,
ka sualzet uh hei in,
na thutep bangin,
Topa bawm zazalin hi.
Na lak pen vei tampi tai zo ung a,
na humah sual leita zo ung.
8 Nangmah bek hi Israel i muansannak ci.
Nangmah bek hi
siatlalnak pen huptu ci.
Itakaw ka ngamsung uhah
ngamdangmi bangin le
zan khat bek a cam vutmi
mikhual bangin na um?
9 Itakaw lau nei pa bangin le
imah a bawm thei ngawl
ngalkap bangin na um?
Maw Topa aw, nang cu
keimu lakah um ci a,
nangma mihing ung hi;
zamsan hihim pahsun,
10 Topa in hi tei thu son a, “Hite hi ka lak pen tai nuamzet haw, amuh le muh ukdun zo haw ma. Mah hangin a hum hawah ka lungdam mang. Thilpha ngawl a bawl haw mi thei leng tung a, a, sualnak haw i hangin bawlsia tung,” ti hi.
11 Topa in ka lakah, “Hi mihingte bawm tukin ngen toh pahsun.
12 An cangin thu a ngen li haw hei in, za kha moh tuk mang. Halkang biakpiaknak pia in le cangho vam biakpiaknak a pia li haw hei in, ka lungdam cuang tuk mang hi. Ngaldonak, pamnak le natnak tuah that leleng tung,” ti hi.
13 Mahten keimah in, “Cungnungbel Topa, hi ngamah dodunnak le pamnak cu umleh tukma toh, itahim titale Topa in, lemdaihnak bek um tuk toh hi tin thutiam zo, tih cu profet ten mipi tei lakah a ot haw za zo ci.”
14 Mahnaven Topa in, “Profet ten ka minin zolthuson haw hi. Ka hahmi kha haw ma hi, thu ka piakmi hei hi kha haw ma, a lakah awn kam khat awn tuk hei ka hahmi kha haw ma. A son leilui lehcet haw mi a muhnak haw cu keima lak pen a hengmi kha ma hi. Mailam thu a sonham haw mite cu imah ngawl, amu lungmu sung ngaihsutnak ngeh thong hi.
15 Keimah, Topa in ka hah khak ngawl profet, ka min salin hi ngamah ngaldonak le pamnak heng tukma a titu tei humah i kaw ka bawl tuk tih hilh tung: ngaldonak le pamnak tuah siatsuah khawng tung.
16 A thu a ngaitute hei mah bang lelengin thah hi haw tuk! A luang haw cu Jerusalem khuapi lam lai ah vawk hi haw tuk a, kuamah in vui haw tukma. Amuh bek hi ngawlin a zi haw, a canu, a capate vang mahti bang lelengin bawl hi tuk hi. A sualman haw nase zetin thuak haw tuk tin,” ti hi.
17 Topa in, ka lungsiatnak hi, mipi tei lakah phuang tukin thupia a, hi bangin hilh ing;
“A sun le a zanin,
ka mit hitui luang leleng hen.
Ka hitui a hul ni umma hen:
Ka mihing ten
liamma nasezet thuakin,
a liamma haw
nase lawlawm hi.
18 Hampa lakah ka hawh ten,
ngal tei thahmi
miluang mu ing.
Khuapi sungah ka hawh ten,
an ei ngawlin
a thi mi mu ing.
Profet le thiampi ten
a nadek haw hi.
Mahnaven iheng
ka deh uh tih thei haw ma,”
ti hi.
Mipi Ten Topa Lakah Kun Haw
19 Topa aw, Judah cu lawl ngah loli cim?
Zion mite hi huazet zo cim?
Itakaw hi tih bang lawlawm
na liamsuah?
Ka meima uh damleh thei ma toh.
Lemdaihnak ngak ung.
Mahnaven phatnak imah heng ma hi.
Damnak tuk muansanzet ung,
Mahnaven launak ngihngeh
heng lamsang hi.
20 Topa aw, na humah
sualzet zo ung.
Na mai ah ka sualnak uh le,
ka pu le pa tei sualnakte
phuang ung hi.
21 Na thutiammi cu
phawkleng zal inna,
zawnsak zazal pahsun hi.
Na sunloihnak khunnak
Jerusalem humah mualphonak
hengtik zal pahsun,
Keimuh tuah na bawlmi
thutiamnak cu
siatsuah zal pahsun maw.
22 Ngamdang mitei bawlmi
milim ten nguahzutik
thei ma hi.
Van pen ama thu in nguahtui
mal khatno hei caktik thei ma hi.
Topa aw,
kohtei Pathian,
ka muansannak uh cu
na lakah koih zo toh ung.
Hi thil hempoh a bawltu cu
nangmah bek hi ci.