JONAH
Laibu
(The Book of Jonah)
Thulamsial
Jonah laibu cu a dang profet tei laibu tuah bangve ma hi. Itahim titale hi laibu hin a hilhmi cu Pathian i thupiak ngai nuam ngawlin a taikuhtu profet pai thu hilh hi. Israel i ngal Assiria khuapi Nineveh ah hawhtik hi. Mahnaven Jonah cu hawh nuam ma hi. Pathian in mah khua cu siatsuah tung a tihmi ngaisung hi. Ama pumpi humah theihtiknak thu lam dang a hen ceng ten nuam ngawl thah zetin hawh lehin Nineveh khuapi sia tuk hi tin, a hilh mi cu a sia ngangai ngawl ten a thinukzet hi.
Hi laibu sungah Pathian cu a bawlmi hempoh uktu hi tihmi thuhilh hi. A hilh mi lakah a thupibel cu Pathian cu itnak le hehpihnak neitu Pathian hi in ngal hei hehpihnak tuah bawlsia ngawlin a sual haw ngaidamin, a suakcatiktu pa hi tih thu langtik hi.
1
Jonah In Pathian Thu Ngai Ma
1 Topa in Amittai capa Jonah nelah hi bangin hilh hi.Ref 1:1 2Kum 14:25;
2 “Tho inna, a nasezetmi Nineveh khuapi ah hawh in, a sualdan haw phuangin hi. A phat haw ngawl dan cu mu khawng zo ing.”
3 Mahnaven Jonah cu Pathian nel pen tai in, Tarshish khua ah hawh tum hi. Joppa khua a hen ten Tarshish khua hawh tuk timbaw mu hi. Topa i muh bat ngawlnak Tarshish khua lamah hawh tukin timbaw khun man tuk pia in, hawhta hi.
4 Mahnaven Topa in huih nasezet theutikin, tuipi humah huihsia theu in, a timbaw haw cu keh khawng awndiak hi.
5 Timbaw mawngtute vang a thinsu haw a, amu pathian nel tekah he le heh tin thungen tawtok haw hi. A timbaw haw cu zangdeuh na hen ti in, tui sungah van tampi vawklawh haw hi. Mahlai takin Jonah cu nuaita khan lamah na hihbu hi.
6 Timbaw neitu pa cu hungin, “Ita hihbu leng thong nge cim? Tho inna, na Pathian nelah thungen bokin hi. Na Pathian in paih thong phal ngawlin suakcatik hei hi thei si,” ti hi.
7 A dawlbelin timbaw mawngtu ten, “Hung hih teh un. Hiti bang lawlawm bawngsiatnak a tawh uh hi akua hang kaw tih aisan tuk hung,” tin ti haw hi. Aisannak a bawl haw ten Jonah humah cuu hi.
8 Mah hangin a nelah, “Hiti bang lawlawm bawngsiatnak a tawh uh hi akua hang kaw? Hilai ah idek kha seuh nge cim? I lai ngam pen hung nge cim? I miphun kam,” tin dong cuculh haw hi.
9 Jonah in, “Hebru miphun ing. Tuipi le lei ngam a bawltu vanhum a um Pathian Topa a biatu ing,” tin hilh hi.
10 Jonah in Pathian nel pen a tainak thu a son ten lau dedeuh haw hi.
Ita hiti bang um nge cim, tin liat cuculh haw hi.
11 Amuh ten, “Huihsia cawl tukin itin kaw ka bawl tuk uh? tin dong haw hi?”
12 Jonah in, “Tui sungah keimah vawk unna, huihsia dai tuk hi. Hiti bangin huihsia nasezet a theu cu keimah i hangin hi, tih thei ing,” ti hi.
13 Timbaw mawngtute cu tuimawk zuan tukin zuam li haw naven tuicawk nase dedeuh hangin imah tithei haw ma hi.
14 A dawltabel ten Topa nelah au in, “Maw, Topa hi mihing pa khat hangin ka thih khawng tuk uh phal pahsun. Sualnak nei ngawl kohtei humah thisan luang tuk ngawlin hehpih zazalin hi. Maw, Topa nangmah in, na deih babangin ihempoh piangtik ci,” tin thungen haw hi.
15 Mahceng ten Jonah cu manin, tuipi sungah a vawk haw ten tuicawkpi cu cawl lup hi.
16 Mah hangin timbaw mawngtu ten Topa cu kihcazet haw a, biakpiaknak bawlin, ama nadek tukin thutiam haw hi.
17 Topa in, Jonah thontu tukin ngasa pi thupia hamsa zo a hih taktohin, mah ngasa pi i pum sungah Jonah cu sun thum le zan thum um hi.Ref 1:17 Mt 12:40;