8
Bildad in:
1-2 Huih bangin imah nge ngawl na otlih cu ceng toh cim?
3 Pathian in thudik cu
melh awng ma hi;
A dik ngawlmi vang
bawl awng ma.
4 Na canote Pathian humah
a sual haw hangin,
a sualnak haw bangin dantat ci.
5 Mahnaven atu-in,
Ihempoh tithei Pathian ngenin hi.
6 Thiangtho in, na dikcang
ngangai ahi tale,
Pathian in bawm tuk a,
Na innkua tungdingleh tuk a,
laksawng vang pia tuk hi.
7 Pathian i piak tukmi tuah tehkip ten,
na neihsa na sun mite cu
imah hi haw tukma hi.
8 Tanglaih a cihnakte zoleh hemin,
a pu le pa tei theihmi thutakte
ngaisung lehin hi.
9 A nunnak uh hi com leita in,
a theih uhmi imah umma hi.
Leihum a nunnak uhte cu
lim bang hi.
10 Mahnaven tanglaih micip ten
na zilh haw henna,
a hilh mek haw mi hi ngai hemin;
11 “Phaikung cu a kawt ngawlnak munah
um awng ma hi.
Cikdup pualamah um awng ma hi.
12 A neuno laihin man tak
a hih haw laih ngawl hei in,
tui a kang tale thim masabel haw hi.
13 Pathian thei ngawltute cu
mah bang haw hi.
A muansannak haw bo hi.
Pathian tel ngawlin a nun haw ten
a muansannak haw bo hi.
14 Nimzang khat, maimomzang khat
muang haw hi.
15 Maimomzang, zang khat
a ngaingam haw tale hen ni maw?
Nimzang khat tuah a len haw hei in
ding thei ngai haw ni maw?”
16 Mipha ngawlte cu sun ni al a,
hampa bangin po haw hi,
Huan sungah a dim khawngmi
hampa bangin po hi.
17 A zung haw tuah suangte vialin,
suang ummi hempoh
vial khawng haw hi.
18 Mahnaven bot inna,
bo thal tuk hi;
mahlai mun a umlam haw
kuamah in thei haw tukma toh hi.
19 Mahzuh hi, mipha ngawl tei
lungdamnak cu mahti bang
lelengin bo hi,
midangte hungin, a umnak
luahtum khawng haw hi.
20 Mahnaven Pathian in mifel cu
lawl tukma hi,
mipha ngawl tei baan vang
ngiltik cuang tukma hi.
21 Na mitmai ah lungdamnak
lang tuk a, na kam cu
nuihnak tuah dim tuk hi.
22 Mahnaven nangmah a huatute cu
a zakcatik tuk hi,
mipha ngawl tei innkua cu
pailal tahaw tuk hi.