JOB
Laibu
(The Book of Job)
Thulamsial
Job laibu hi mipha pa, pa khat nase zetin haksatnak a thuaknak thu hi. A cano, a neih le siah, a sum le pai ten paihsan khawng haw in ningdelhhuai natnak a humah tung hi. Mahmi cu Job le a ngual ten hi thil um daan hi iti bangin mu bok haw hum tih hi laingantu in la cing thum (la cing a honpi in hon thum) tuah hilh hi. A dawlbel ten mihing tuah pawlkomnak a thupitiktu Amah Pathian vang Job lakah lang hi.
Job i ngualcam ten Job ih thuaknak cu a pu le pa tei updan bangin a sullam hilh haw hi. Amu tihdanin Pathian in mipha cu laksawng pia in mipha ngawl cu a bawlsiat mek hangin tu a Job i thuaknak hi a sual hang hi, tin ti haw hi. Mahnaven Job ca in hi ti bang ngaihsutnak cu dai leita hi. Itahim titale Job cu mipha ngangai hi in, amu tihdan bang ahi tale bawlsiatnak hi saw ngawlin laksawng co tuk hi saw hi. Mahnaven a co mi cu bawlsiatnak nasezet hi sih hi. Amah bang mihing humah Pathian in phatngawlnak hiti bang a hentik mi cu a sullam thei zo hihim ma hi. Mah hangin ngalpha zetin Pathian mawhsiat li bok hi. Job in, a upnak paitik hihim ma hi. Mahnaven Pathian mai ah thianco mi a hihnak langtik nuamin mipha hihnak hangin minphatnak ngahleh nuam hi.
Pathian in, Job i thudotnak cu don ma hi. Mahnaven ihempoh a bawl theitu a hihnak le ihempoh thei khawngtu a hihnak cu Job lakah theitikin mahmi in Job lungmuangtik hi. Niamkhiatnak tuah Job in Pathian i cihnak le a ngengnak cu phawklehin, a otlih le a thinuknak sikleh hi.
Job cu dawllam ten tumasuan a, a dinmun lengah heng kiklehin tumasuan sang hei in, a neihmi tam saw hi. Job i thuaknak cu a ngualcam ten a sullam a theih haw ngawl hangin Pathian in mawhsiat hi. A pu le pa tei biaknak cu a langtikmi sangin Pathian hi ngeng saw hi tih cu Job bekin tep ngah hi.
1
Satan In Job Khingkhai
1 Uz a tih haw ngamah mi pa khat na umin, a min cu Job hi. Job cu Pathian biatu le a muangzettu hi. Amah cu mi phazet hi in, na pha ngawl imah bawl nuam ma hi.
2 Capa salih le canu pa thum nei in,
3 Tuu thawng salih, kalauk thawng thum, khui thawng khat le laak za nga nei hi. Umlawh tampi nei in, nisuahnak lam hempoh pen mi haubel hi.
4 A capa ten a sasangin, an eih puai bawl mek haw; munkhatah an ei khawm mek haw hi; a celnute vang sam mek haw hi.
5 A puai haw a bo ceng a zing zingtungno in, Job a thawh toh ten a cano tei thianthohnak tukin biakpiaknak bawl mek hi. Tuptah himnak um ngawlin Pathian zawnsakin, sual kha haw tuk tih a lau hangin mahtih bangin bawl leleng hi.
6 Topa i mai ah vancungmite a hun ni haw a kim ten Satannote 1:6 Satan tih cu mihing dodaltu tihnak hi. vang a lak hawah tel bok hi.Ref 1:6 Pian 6:2;
7 Topa in, “Ilai lam pen hung nge cim?” tin, Satan cu dong hi.
Satan in, “Leihum buppi ah suk le to in, ka vah kawkawi nikneknak pen hung ing,” tin don hi.
8 Topa in, “Ka sila Job thei kha cim? Leihum buppi ah amah bang mipha le muantak kuamah um haw ma ven. Keimah bia in, a pha ngawl imah bawl ma hi,” ti hi.
9 Satan in, “Imah a nei ngawl ahin, nangmah cu bia nuam sap a ni maw?Ref 1:9-11 Mang 12:10;
10 Amah hihen, a innkua hihen, a neihmi hempoh tian hupin cingkhawi sisi. A bawlmi hempoh humah muicu pia ci a, nganhing na piakmite tam leita in, a ngam hawah dim khawng thong hi.
11 A neihmi hempoh na laksak bang ahin na mai loli pen tamsia tuk poh hi,” ti hi.
12 Topa in, Satan lakah, “Na tih bangin hihen. A neihmi hempoh na khut sungah um hi. Amah Job cu siatsuah pahsun,” ti hi. Satan cu tulta hi.
Satan In Job Bawlsia
13 Ni khat cu Job i cate a upabel pa i innah an eih puai a bawl haw laih takin
14 Kamtai pa khat cu Job lakah hung a, “Khui tuah leiletin, laakte cu ka elkim uhah hampa a peh lih laihtak haw in,
15 phawhkhak ngawlin, Sabean minote 1:15 Sabean mi hih hinnamte hi, mi vakvai, damiah le nguca phun hi haw a, hanglam ngam a, ummite haw hi. ten simin, ka ngan hempoh uh sut khawng haw hi. Keimah sial ngawl na umlawh hempoh that khawng haw hi. Keimah bek hi zualkotu in cangca suakca ing,” tin Job cu hilh hi.
16 Mahpa i awn a bo laihngawlin umlawh dang pa khat hengin, “Keek in, na tuuhon le na tuucingte khiakin, a venghawng thi khawng haw hi. Keimah bek hi zualkotu in cangca suakca ing,” tin Job cu hilh bok hi.
17 A awn hei bo laihngawlin umlawh dang pa khat heng leleu in, “Khaldean minote 1:17 Khaldean mi hih hinnamte hi mah hun laihin, mi vakvai, damiah le nguca phun hi haw a, saklam ngam a, ummite haw hi. damiah hon thum ten simin, kalauk hempoh la khawng haw a, keimah sialngawl na umlawh dang hempoh that khawng haw hi. Keimah bek hi zualkotu in cangca suakca ing,” ti hi.
18 A awn hei bo laihngawlin umlawh dang pa khat heng lehleu a, “Na canu le na capate cu na capa upabel innah an eih puai a bawl laihtak haw in,
19 phillawn pen huihsia theu in, a inn haw mut cimin, a sung ummi hempoh thi khawng haw hi. Keimah bek hi zualkotu in cangca suakca ing hi,” tin Job cu hilh hi.
20 Job cu tho in, khawngai in, a angki bot kek khawng hi. A sam metkolh khawng a, leihumah bokin,
21 “Thacangin suak ing, thacang lengin thi tung. Topa in pia in, atu-in laleh hi. A min thangphat hi tahen,” ti hi.
22 A lakah hiti bang thu heng naven, Job in Pathian a mawhsiat ngawl hangin Pathian mai ah sual ma hi.