JOHAN
Laikuat Vei Thumnak
(The Third Letter of John)
Thulamsial
Johan laikuat vei thumnak hi, “Pawlpi upa,” in Gaius tihmi pawlpi lamhuaitu lakah a kuatmi hi. Laingantu pa in Gaius cu Khristian dangte a bop hangin a humah lungdam thu hilh hi. Mahten Diotrefes tihmi pa khi ngalling un tin thucah hi.
1
1 Pawlpi upa keimah in ka ih zetmi Gaius na lakah hi laikuat hi ngan ing.Ref 1:1 Nung 19:29; Rom 16:23; 1Kor 1:14;
2 Ka ihmi ka ngualcam, damno in, na um theihnak tukin le ihempoh tuah khawthu zetin, na um theihnak tukin, nangma ca thunget sak leng ing. Hawvang lamah damno in um ci tih thei ing.
3 Nang cu thutak sungah a um lelengmi na hih bang bokin thutak sungah teima zetin, na umnak thu Khristian unau tei hilh ten ka lungdamzet ing.
4 Ka cate thutak sungah nung uh ci tihmi thu ka zak sangin, keimah lungdamtiktu thudang umma toh hi.
Gaius Pahcoihnak
5 Ka ihmi ka ngualcam, na Khristian pih unau tei ca in, na nadeh ten na theih awng ngawlmi ahi hei in, muantak zetin dek ci.
6 Itnak na neihdan hi pawlpi tei lakah son zo haw toh hi. Mailam a, hawh tuk laihmi lampi ah vangin Pathian lungdam zawngin bawm hihin hi.
7 Itahim titale Khrih nadehnak lampi a pat haw ten umngawltu tei lak pen imah la ngawlin pan haw hi.
8 Mah hangin thutak sungah a nadehnak hawah, telbok tukin oh Khristian ten nase zetin bawm tuk hung hi.
Diotrefes le Demetrias
9 Pawlpi tei lakah lai comno ngan ing. Mahnaven hotu dek nuamtu Diotrefes in ka hilhmi cu imah simsial tukma hi.
10 Mah hangin ka henleh ten a bawlmi hempoh phuangleh tung. Eimu thu la sesuak zetin, a sonmi le zolthu a sonmite langlehtik khawng tung hi. Mahbek hei hi ngawlin, Khristian unaute a zin haw ten zintun tuk awi ngawlin tun inn, a hontute hei khi khamin le pawlpi pawleu ah hawlvawk tukin heh tin zuam hi.
11 Ka ihmi ngualcam pa aw, a pha ngawlmi cung pahsun, a phami cung saw in, a phami a bawltu hempoh cu Pathian ta hi. A pha ngawl a bawltu hempoh cu Pathian mu ma hi.
12 A kuakua hei hihen Demetrias phatson haw; thutak ngangai in son haw hi. Eimuh vangin mahmi cu a theihpih uhmi hi, ka hilh uhmi hi a manmi hi tih thei ci.
Thukhupnak le Nuksatnak
13 Thuhilh tuk tampi nei ing, mahnaven laikung le laitui tuah ngat tukin deihsap mang.
14 Zinleh paih tukin ngaisung ing, mahten cangcian zetin hilhleh tung hi.
15 Lemdaihnak thupha na humah um tahen. Na ngualcam ten nuksat haw hi. A ngualcam uhte bulpak tekin, nuksat sakin hi.