66
Topa In Miphun Tei Thukhen
1 Topa in, “Vanhum cu ka khunnak hi a, leihum cu ka ke ngaknak hi. Mah hangin ka umnak tuk iti bang inn le mun kaw na sak theih tuk uh?Ref 66:1 Mt 5:34-35; 23:22;Ref 66:1-2 Nung 7:49-50;
2 Lei le vante cu keima semsuahmi haw hi. Lung nemmi, sihkiknak lungmu neimi le ka thu zui in, a kihca tei humah ka lungdam hi.
3 “Mihingin amu deihnak lam zui in, nadek haw hi. Zehsah ca in khuicang ngo haw, mihing vang biakpiaknakin pia haw, tuunote ngo in, uico ngawngte vang at haw; cangho vam biakpiaknakte pia in, vok thi vang pia haw hi. Namtui halin, milim mai ah thungen haw hi. Ningdelhhuai biaknak cu a lungdam zawng haw na hi ngi nge thong.
4 Mah hangin a humah haksatnak hengtik tung. A lauzet haw mi haksatnak hengtik tung hi. Itahim titale ka sam ten kuamah in donleh haw ma; ka ot ten kuamah in ngai haw ma. Ka thu el le thilpha ngawl bawl cu amu deih tenmi,” ti hi.
5 Topa i otmi hi ngai hem un, noh amah a lautu le a thu zuitute; “Keimah na muang uh hangin na phunpih uh mi khenkhat ten, hua in, imah simsial haw ma hi. Zotsaknak tuah ‘Lungdam thatui in, na khuasak uh cu mu nuam ung hi.’ Mah hangin Topa in, a ngilnak langtikin hup hen,” tin ti haw hi. Mahnaven amuhte saw zakca haw tuk hi.
6 Ngai hem un! Khuapi sung a, thawmvang le Biakinn pen aw a ngingmi cu Topa in, a ngalte a bawlsiatnak thawmvang hi.
7 “Ka khuapi thiangtho cu nausuak nat thuak ngawlno in thakhat thu in, capa a hingtu numei nu bang hi.Ref 66:7 Mang 12:5;
8 Mahti bang cu akua in kaw mu in thei awng? Miphun phun khat hi, ni khat sungin hin hi awng maw? Hi miphun phun khat a suah ten Zion cu ngeipi thuak kul tukma hi.
9 Ka miphun hin hun tiang pui tuk naveng hingtik tuk ngawlin maw na ngaihsut uh?” tin ti hi. Topa in hilh zo toh hi!
10 Jerusalem tuah na lungdam unna,
ama ca in thinnop un hi.
Hi khuapi a ittute!
Atu-in amah tuah lungdam un,
ama ca in khaw-ngaihnak
a neitute!
11 A nu i nawitui ngimta zetin,
a cawptu nauno bangin
a hauhnak humah
na lungnop tuk hi.
12 Topa in, “Neih le siah le khantohnak cu catngawlin pia tung hi; a kang awng ngawlmi lui bangin miphun tampi hauhnak cu nangmu lakah luang tuk hi. A itnak angsungah a nu i cawimi, phano in, a awhmi nauno bang hi tuk uh ci.
13 Nauno ca in nemtu phabel cu a nu a hih bangin Jerusalem khua sung pen nem tung hi.
14 Mahti bang thil a piangmi na muh uhten lungdam tuk uh ci; ngiltik tuk a, na damnak uh hei hi tuk hi. Topa keimah in ka thu a zuitu cu bawmin, ka ngal tei hum a, ka thinuknak ka langtik dan cu thei tuk uh ci,” ti hi.
15 Topa cu mei tuah hung tuk hi. Huihpi humah Topa cu khungin, a thinuktik tute cu bawlsia tuk hi.
16 Ama mai a, sualnak neitu leihum a mihingte cu mei le ngalnam tuah bawlsia tuk a, mi tampi thi haw tuk hi.
17 Topa in, “Milim biakpiaknak ca thiangtho duntikin, huan thiangtho sungah a hon, a honin, a hawhtute, vokcik, namcik le a dang tui le an nawngkai a eitu tei khan cu bo awndiak toh hi.
18 A lungmu ngaihsut haw le a nadeh haw cu thei khawng ing.
“Miphun tampi le hinnam tampi pumkhawmtik tukin hung tung hi. Mahti bangin a tawhdun khawm haw ten ka thil tihtheih dan mu haw tuk a,
19 amuhte bawlsiatu keimah ka hihlam thei haw tuk hi.
“Mahnaven mi khenkhatte cu khawih tung a, ka minthannak ka thawm ngengnak le ka huham neih dan a thei awng ngawltu miphunte le ngam khua lapi a ummi tei ngamah kuat tung hi. Spain ngam, Libia ngam, thalcang kap thiam tei umnak Lidia ngam, Tubal ngam le Grik ngamah kuat tung.
20 Hi ngamte pen na phunpih uh na unau uhte cu kihpihleh haw tuk a, keimah ca in laksawng bang hi haw tuk hi. Israel miten cangho vam biakpiaknak cu bawm thiangtho tuah Biakinn ah a cawi haw bangin na suahpih unaute cu Jerusalem a, ka mual thiangtho humah cipuh, laak, kalauk, cipuhleng le khuileng tuah hunpih haw tuk hi.
21 Amu sung pen mi khenkhatte cu thiampi le Levi mi in bawl tung hi.
22 “Van thak le lei thakte cu keima huham hangin a kho zetmi a hih haw bangin na casuan uh le na min uh cu a kho mi hi bok haw tuk hi.Ref 66:22 Isa 65:17; 2Pet 3:13; Mang 21:1;
23 Ha Thak Puai sial le Sabbath nisialin miphun tihkim cu hi Jerusalem ah Keimah bia tukin hung haw tuk,” tin, Topa in ti hi.
24 “A kihleh haw ten keimah a dotu le a ngaltu tei miluangte mu haw tuk hi. A luang haw eitu thanlungte thi awng haw tukma, amuh halnak mei vang mit awng tukma. Miphun hempoh tei mitmuhah ningdelh huaizet haw tuk,” ti hi.Ref 66:24 Mk 9:48;