1 Ita nge van khi botkek vutin, na hunsuk ngawl? Mual sangpi ten mu haw tuk a, nangmah lau in can tawtok haw tuk ven! 2 Mei hum a, tui a so tawtok bangin hing li haw tuk hi. Hung inna, na ngal tei lakah, na ngilnak huham langtikin, na miphun hempoh ten amuh haw ten can li haw tahen. 3 Vei khat cu hung ci a, ka ngaihsut awng uh ngawlmi a lauhuai nate bawl zo ci. Mual ten amuh haw ten a lau in hing tetek thong haw hi. 4 Pathian a muan haw hangin amu ca in hitih bang a bawltu Pathian cu kuamah in mu awng haw ma, a theih hei in thei awng haw ma hi.Ref 64:4 1Kor 2:9; 5 Nangma deihnak bang nung tukin a phawkngil ngawltu le thildik bawlin a lungdamtute nangmah in pallawm mek ci. Keimu humah na thinuk ci, mahnaven sual leleng thong ung hi. Na thinukzet naven tanglaih pepan khial leleng ung ti hi. 6 Ka venghawng uhin, mi nawngkai ngeh hi khawng ung hi, ka nadeh uh phabel hei cu ningdelhhuai thong hi. Ka sualnak uh hangin huih i muhvawkmi thingceh ko bang poh ung. 7 Na min samin thungentu pa khatno hei umma poh ung; na bopnak a ngen tukin kuamah in, na lakah a hung umma ung hi. Ka muh ngawlnak tukah ngelh ci a, ka sual uh hangin nunghek ci.

8 Mahnaven Topa nang cu ka pa uh hi ci. Kohte cu tungman bang thong ung a, nang cu beel bawltu bang ci. Nangma semsuah mi poh ung a, 9 ka hum uhah na thinuk leita nuam pahsun; kumkhua in sual puatu hei in phal pahsun! Na mihing hi ung a, kohtei humah hehpihnak nei zazalin hi. 10 Na khua thiangthote cu phillawn ngamko in cang zo haw toh a, Jerusalem ngam cu buakvawk khawmnak mun le ngamin cang zo toh hi. 11 Ka pi le pu ten nangmah thangphatnak, a thiangthomi le a mawi zetmi ka Biakinn uh vang kangvamin cang khawng zo hi. Ka sunsak uhmi munte buak vawknakin cangta hi. 12  Topa aw, hitih bang thil na muh ten imah kinmawh ma cim maw? Daidenin umthong thei tuk cim? Ka thuakzawh uh ngawl tianin thuaktik tuk ci maw i kaw?