46
1 Babilon a milimte cu bo zo haw!
Tanglaihin Bel le
Nebo cu a biak haw mi hi;
mahnaven atu cu
laakhumah suanin, ngan cawltiktu
vanngit pi in cang zo hi.
2 Mahti bangin a milim hawte cu
tham khawng haw hi.
Milimte cu amuh le muh
pandun thei haw ma.
Manin pinpih hawta hi.
3 Maw Jakob casuante,
ngai hem un;
Ka mihing lak pen a tang calamte,
na hinsuk bek uhten
ka cannkhawimi hi uh ci.
4 Na Pathian uh ka hih hangin
cingkhawi leleng tung.
Na puakpakin, na tekkun tian
cangcawi tung hi.
Ka bawl bangin,
cingkhawi leleng tung hi.
Bopnak pia tung a,
nangmuh hup tung.
5 “Akua tuah kaw na tehkip tuk uh?”
Keimah bangtu um haw a maw?
6 Miten a sumbawm hongin,
a sui bung haw,
A ngun cu a cuai in teh haw hi.
Sui sektute sapin,
milim bawltik haw;
Mah milim mai ah kunin
bia haw!
7 A ko hawah khaihin, pua haw;
Mun pa khatah koihin
mahlai ah ding leleng hi.
A umnak pen mundangah
thawn thei ma.
A lakah thu a nget haw ten
don thei ma hi.
Haksatnak sung hei pen
hup thei ma hi.
8 Maw misualte phano in ngai hem un!
Ka thil bawlsa mi hi
ngaisung pha hem un!
9 Thil a piangsa mite phawkleh hem un;
Keimah bek Pathian
ka hihlam thei un;
Keimah bang kuamah
um haw ma.
10 A pattungin i piang tuk hum tih
hilh ham zo ing;
Tanglaih pepan a cang tukte hilh ham
khawng zo ing.
Ka tuptahmi cu pelh awng tukma,
ti ing.
Bawl ka tummi hempoh cu
bawl tung hi.
11 Nisuahnak lam pen
mi pa khat sam li laih ing;
Muno bangin leng tuk a,
Ka khua khan sa hempoh cu
bawlsuak khawngin,
ka hilhsa bangin deh suak
hi tuk hi.
12 “Ngai hem un,
noh mi lungliante,
nehnak cu khawlazet laih tin,
a ngaisungtute,
13 nehnak ni cu cawi ing a,
heng awndiak toh;
Khawlalehma toh hi.
Ka mi nehnak cu kuamah in
cumtik thei haw tukma.
Jerusalem cu pan tung a,
Israel tei nelah minthannak
pia tung,” ti hi.