44
Topa Bek Pathian Hi
1 Topa in, maw Israel
ka salpa,
Ka tenmi Jakob casuante,
Ngai hem un!
2 Keimah cu nangmuh
a semsuahtu Topa ing.
Na nunnak a piang bek ten
bawm zo toh ing.
Imah lau pahsun, ka nadektu
ka sila ci.
Ka tenmi, ka ihmi ci.
3 Adangdum mi ngamah tui pia tung;
ngamkonakah tui luangtik tung;
Na ca tei humah ka hawvang
buak tung a;
Na casuan tei lakah muicu pia tung hi.
4 Phano in tui a ngahmi
hampa bangin khang haw tuk,
Tuimawk paaknem kung bangin
hing dimdem tuk hi.
5 “Kei hei hi Topa i mi bok ing tin
‘Pa khat nung pa khatin
ti haw tuk hi.’
Israel mite khawmdun pepel
haw tuk hi.
A baan hum hawah Topa i min
ngan tek haw tuk a,
Pathian i mihingin sialdun
haw tuk hi.”
6 Israel uktu le a huptu
Topa Cungnungbel
Topa in,
“Keimah cu masabel le
nungdawlbel ing hi;
Keimah sialngawl
Pathian dang umma.Ref 44:6 Isa 48:12; Mang 1:17; 22:13;
7 Ka bawlmi a bawl thei boktu
kuabek um haw a maw?
Hun a patnak pen a tawpnak tian,
thil a piang tukmi a hilhham theitu
um haw a maw?
8 Ka mihingte, imah lau pahsuh un;
Tanglaih pen atu khan tian
a piang tukmi hempoh
a laih ngawlin hilh ham zo ing;
Mah thu na zak uh hangin
keima thu theihpihtu uh ci.
Pathian dang kuabek um haw maw?
A ngilmi Pathian,
ka theih awng ngawlmi
um haw a maw?” tin ti hi.
Milim Biak Simsial Ngawlnak
9 Milim a bawltu mihingte cu imah haw ma; a sunsakzet haw mi le a uangzet haw mi a khuazingte cu nemcuam ngawl ngeh haw hi. Hi pathian a biatu le a upattu cu misil le mitcawte hi haw a, zahcaknak tawk haw tuk hi.
10 Biak tukin thik tuah bawlmi milim cu nemcuamnak imah umma hi.
11 Mah pathian a biatu hempoh cu zakcaleh haw tuk hi. Milim a bawltute cu mihing thong haw poh, imah haw ma hi. Hungin hi, thukhennak tuk munah ding teh haw hen. Lau in zahcak tawk haw tuk hi.
12 Pumsu pa in thik tan khat la in, meiling sungah dual hi. A ngilmi a baan tuah sobul la in, pian nei tian sek hi. Mahtin a deh hangin a ngilkial, dangdumin cawlzet hi.
13 Lettama pa khatin thing cu khau kai in, a tehnak tuah teh hi. Miphiu tuah zuk pungsan suai in; zibaw tuah nawtin, a hiamnam tuah dek hi. Inn sungah koih tukin mihing pian bangin mawi zetin bawl hi.
14 Mahmi bawlnak tukin sidar maw, sasua kung maw, cakthing maw tupi pen phukin mang hi. Mahma tale sidar thing phutin nguah in khangtik tukin ngak hi.
15 Mihingin thingkung khenkhat cu tuahthing tukin mangin, a khenkhat cu milim bawlnakin mang hi. Thing a khenkhatte cu mei ah tuah khualumnak tuk awi in, canghote emin adang khenkhatte tuah milim bawlin bia hi.
16 Thing khenkhat cu meilamin cikte em le ei in, tai mahtak hi. Mei awi lehleu in, “Lumzet nop em si! ka mei phat dan!” ti hi.
17 Thing a khenkhat tuah milim bawlin, a mai ah kunin bia hi. A lakah, “Nangmah hi ka pathian hi ci, kei pan zalin hi,” tin thungen lalaih hi.
18 Mahtibang mihingte cu sil leita haw; i heng ka bawl tih hei thei haw ma. Thutak le thuman lamah a mit haw singin, a lungmu haw bing bikbek.
19 Milim bawltu in, “Thing khenkhat cu mei ah haal khawng ing. Meiling humah cangho emin ei ing. Adang thing cu milimah bawl ing. Mahmi thingta khat i mai ah atu hi a kun li ing nge! tih ngaihsutnak neuno hei nei kha haw ma hi.”
20 Vut eitute bangin nemcuamnak hei nei ngawl phukthong haw hi. A lungmu silin lampialin, bop theih tukmi hileh haw ma toh. A khut tuah a cawimi milim cu pathian kha ma na hi pah, tih hei theileh haw ma toh hi.
Topa Cu Semsuahtu le Pantu
21 Topa in, “Maw Israel,
hi thute hi cinglengin,
ka nadektu na hihnak hi
phawklengin hi.
Ka nadektu tukin piangtik ing a,
Ituk mahten phawkngil
thong tuk mang.
22 Na sualnak cu meingo a tai bangin
taitik zo ing.
Ka lakah hung lehin hi;
A pantu cu keimah ing,” ti hi.
23 Maw vante, lungdamin au un!
Lei thukpite aw, au ten un!
Mual le tupi sung a,
thing hempoh hei in,
lungdam thatui in au ten un!
Topa in, a thawm ngengnak
langtikin, a mi Israel
pan zo toh hi.
24 Topa in,
“Keimah cu Topa ing hi,
a semsuahtu le pantu ing.
Keimah cu Topa ing hi;
na hempoh semsuahtu ing.
Van khi keimah bekin zalh ing.
Lei ka bawl ten a kuamah in
bawm haw ma.
25 Khutlam zothiam cu
misilah bawl ing.
Aksi zothiam tei awnkam cu
zolthu ah cangtik ing.
Micip tei ot cu khabak don ing.
A cihnak haw cu silhah
a hihlam langtik khawng ing.Ref 44:25 1Kor 1:20;
26 Mahnaven ka sila in,
a cang tukmi thil cu
hilh ham ing.
Ka tuptahmi phuang tukin
palai ka hah ten,
mah a phuanmi le
ka tuptahmi cu kimtik loli ing.
Jerusalem lakah
“Mihing umleh haw tuk hi,”
tin ti ing.
Judah khuapi lakah,
“A thakin sakleh hi tuk uh ci,”
tin ti ing.
Hi khuapi cu buak
seh khawm sung pen
dinleh haw tuk hi.
27 Thu pia ing a,
tuipi thuanthum kangkotik ing.
28 Sairas lakah, ‘Nangmah cu
keimah ai-in uktu tuk ci.
Dehtik ka nuammi cu dek tuk ci;
Jerusalem cu sakleh tukin
thupia ing,
Biakinn cu taw panleh tukin
thupia tuk ci ti ing! tin hilh hi.’ ”Ref 44:28 2Khang 36:23; Ezr 1:2;