35
Thianthohnak Lampi
1 Phillawn cu a lungdam tuk;
ngamkhing lakah
pak kungte pak haw tuk hi.
2 Phillawn cu lasa in;
lungdamin au tuk;
Lebanon mual bangin mawi tuk,
Karmel le Sharon lo bangin
a ngampha tuk hi.
Pathian i sunloihnak cu
akua na bangin
mu haw tuk hi.
A nase zia le a huham
neihzia mu haw tuk hi.
3 Khut cak ngawlte caktik unna,
A va ngawlin a hing tetekmi
khukte khohtik un.Ref 35:3 Heb 12:12;
4 Thasia mi le lungbingmi lakah
“Ngil unna,
imah lau pahsuh un;
Pathian cu nangmuh pan tukin
hung li hi,
Na ngal tei humah phu la tukin
hung hi,” tin hilh un.
5 Mitcaw ten khua mu thei in,
Bengbul ten thu za haw tuk hi.Ref 35:5-6 Mt 11:5; Lk 7:22;
6 Ke bai miten dawkin lam haw tuk a,
A awn thei ngawlte vang
lungdamin au haw tuk a,
phillawn pen ciktui luangin,
7 A kang li zomi philte cu
tuinimah cang tuk hi.
Lei a ko mi cu ciktui in dimleh tuk hi.
Cingne tei um lihnak munah,
Phuk le phaiphengte po haw tuk hi.
8 Mahlai ah mipi ca in
lampi ngengpi um tuk a,
“Thianthohnak lampi” tin sam hi tuk hi.
Misualte cu mahmi lampi
zui thei haw tukma.
Mahlai ah a hawhtute cu
misil tei lamhoih sualnak
tawk haw tukma hi.
9 Mahlai ah pawpite um tukma;
Sahang dangte hei in
cil haw tukma hi.
Topa i patsuah mite cu,
Hi lampi zui in, a inn hawah
pin haw tuk hi.
10 Lungdam thatuino in,
Jerusalem heng haw tuk,
nunnopzet lasa in, au haw tuk hi.
Khaw-ngaih lungsiatnak pen
luat haw tuk toh a,
Kumkhua in nunnop
leleng tuk hi.