21
Babilon Ngam Sia Tuk
1 Babilon ngam ca in, a hengmi thu cu hi bangin hi.
Phillawn ngam pen simpei bangin thihnak cu a lauhuai ngam pen heng tuk hi.
2 Lauhuai thu hengmi ah muhnak nei ing a, sonsiatnak le siatsuahnak nguak cang hi. Elam ngalkap bu, do un! Midian ngalkapte khua umcip khawng un! Babilon tei hentikmi haksatnak le thuaknakte cu Pathian in botik tuk toh hi.
3 Muhnak sung pen ka sungah launak le natnak a piangtik, numei naunei tuk nat bangkek hi.
4 Ka lungdawk tawtokin, launak le thinsuknakin tuam. Zan hun a hen tuk cu ngakhelzet ing; mahnaven a hen ngai ten launak tuah dim leleng ing.
5 Ka muhnakah an eih puai a tuangtim lih haw mu ing. A micial tei khunnak tukin puan a sahzet phah li haw hi. Ei in, in haw, mahten ngaihsut khak ngawlin thupiak heng hi. “Ngal bawite, tho unna, na ngal lumphaw la un!”
6 Topa in, ka lakah, “Hawh inna, ngalviltu koihin; a muhmi cu hilh hen.
7 Cipuh humah khungin mi pa nih a hung li mi, laak le kalauk hum khungin, a hungmi amu tale phano in zo cangcian tukin hilhin hi.”
8 Ngalviltu in, “ Topa a sun a zan ngalvilin ding ing.”
9 Thakhat thu in, heng haw! Cipuh hum khungin, akop akopin, hung haw hi. Ngalviltu pa in thuthanin, “Babilon cu sia zo! A biak lih haw mi milimte cu keh khawngin leihumah lum pelpul zo haw!”Ref 21:9 Mang 14:8; 18:2;
10 Maw Israel ka mihingte sangvut bangin cil niknek sa hi uh ci, mahnaven atu-in Israel i Pathian Cungnungbel Topa i lak pen ka theihmi thuthangpha cu nangmu lakah than zo ing.
Edom Humah Thu Heng
11 Edom ngam ca in, a hengmi thu cu hi bangin hi.
Edom pen mi pa khatin keimah samin, “Ngalviltu aw, zan khuathim cu ituk ten kaw a bo tuk? Bo pal ni maw? hilh hemin,” ti hi.
12 Keimah in, “Zinglam heng awndiak toh; mahnaven zan khuathim hengleh paih tuk hi. Thu na dong nuam laih tale, hungleh inna, dongin ti ing.”
Arabia Humah Thu Heng
13 Arabia ngam ca in, a hengmi thu cu hi bangin hi.
Noh Dedan mi, phul ngamko a, khualzin honte le Arabia ngam a, ngante tuah ngiak langkhatte,
14 Dangdumin nangmuh lakah a hengte tui pia un. Tema ngamah a umte ngaltaite an pia un.
15 Mi tampi cu ngalnam tuah thah lau in tai haw, thalcang i kap tuk lau in le ngal lauhuainak hempoh pen tai haw hi.
16 Topa in, “Kum khat cikcek sungin Kedar miphun tei ngilnak le sunloihnak cu bo tuk hi.
17 Kedar ngam sungmi lak pen thal mangtute cu mi ngalphabelte hi haw naven mi demno bek tang haw tuk hi. Keimah Israel Pathian, Topa in hilh zo ing,” ti hi.