13
Pathian In Babilon Dantat Tuk
1 Babilon tei thu cungcangah Pathian i thu a hengmi, Amoz i capa Isaiah i ngahmi thu cu hi bangin hi.
2 Mualhum lenkolhah ngaldonak alan tak un. A pualthaumi khuapi kongkate sim tukin, na ngalkap tei lakah nasezet au unna, do toh un tihnakin, na khut uh zak un.
3 Topa i mai phatnak a cotu ten, a tuangkhawng zetmi a ngalkapte cu ngal thiangtho do tukin le a thinuktik tute bawlsia tukin sam zo toh hi.
4 Mualhum pen a ngingmi thawmnging cu ngai hem un, mipi tei awn au thawmnging cu ngam tampi le miphun tampi tei tawhdunnak thawmnging pi cu! Topa in, a ngalkapte cu ngaldo tukin ngalling hamtik zo hi.
5 A ngalkapte cu ngam khawla pi vanmawk pen hung haw a, A thinukin, hi ngam pumpi cu Topa in siatsuah tuk hi.
6 Kap un hi, Topa i ni nai zo. Cungnungbelin siatsuahnak a hentik tuk ni heng awndiak toh hi.Ref 13:6 Joel 1:15;
7 Mi hempoh tei khut cu tha bo in, zawng dihdiah tuk a, lungkiam khawng haw tuk hi.
8 Launak le thinsuknak tuah dim haw tuk a, nauhing kuan numei nu i nat bangin thinhaknak le natnakin diatcih tuk hi. Launak tuah pa khat le pa khat zodun haw tuk a, zahcaknak tuah a mai haw cu san khawng tuk hi.
9 Topa i ni cu heng awndiak toh, Topa i thinuk ni le thin pulhang ni cu! Leihum buppi hi ngamkhingah cang khawng tuk a, misual hempoh cu pai khawng pial haw tuk hi.
10 Van aksi le aksi honpite vang vak haw tukma hi. Ni a suak hei ten thimin, hade hei vak tukma hi.Ref 13:10 Ezk 32:7; Mt 24:29; Mk 13:24-25; Lk 21:25; Mang 6:12-13; 8:12;
11 Topa in, leihum buppi humah siatnak hengtik tung a, misualte cu a phat ngawlnak haw i hangin bawlsia tung. Mi ultungte vatvawk tung a, mi pualthau le hehpihnak nei ngawlte cu dantat tung.
12 A nung calamte cu sui sangin sunglawi saw in, Ofir suang sangin man nei saw haw tuk hi.
13 Cungnungbel Keimah Topa in, ka thinuknak ka hentik ni ten, van cu hing tung a, leipi vang cu a umnak pen hing vawk tung hi.
14 “Babilon ah a ummi ngamdang mite cu amu khua le ngam tekah zuan tukin cingtu nei ngawl tuu bangin le savai tei mai pen sakhi tai bangin taimang khawng haw tuk hi.
15 Kua hei hihen mat ngahmi pawpoh cu ngalnam tuah dawhhup le sahhup hi haw tuk hi.
16 A mu mitmuh loli ah a canote cu hepnokin, vat hum haw tuk; a innsung a, vante la in, a zi haw cu sualpihsak haw tuk hi.”
17 Topa in, “Babilon do tukin Median mite so ing. Amuhte cu sui a deih ngawltu le ngun a simsial ngawlte haw hi.
18 A thal le a thalcang haw tuah khangnote kap hum haw tuk hi. Nauno tei humah hihen, tangval tei humah hihen, hehpihnak neuno hei nei haw tukma.
19 Babilon ngam cu ngam mawibel hi in; a ngam mipi tei polhtohbelmi ngam hi. Mahnaven Topa Keimah in, Sodom le Gomorrah ka siatsuah bangkekin siatsuah khawng tung.Ref 13:19 Pian 19:24;
20 Babilon ah kuamah um nuamleh haw tukma toh. Mun khat pen mundangah a thawn li lelengtu Arab miten a puanbukte sa nuam haw tukma toh, tuucingte hei in, tuucing nuam haw tukma hi.
21 Phillawn ngamsa tei umnak cang tuk a, simbu tei busaknak munin cang tuk hi. Mahlai ah sam akte um haw tuk a, sathakte dawk zezek haw tuk hi.Ref 13:21 Isa 34:14; Zef 2:14; Mang 18:2;
22 Innsang mawizette le kumpipa i innah cingne le ngam uicote ham leilui haw tuk hi. Babilon i hun le can bo awndiakin, ngeiphatleh tukma toh hi.”