8
Milim A Biak Haw Hangin Israel Liatco
1 Topa in, “Pengkul tum un! Ka ngam sungah ngalte cu muvanlai bangin leng haw hi. Ka miphun ten amuh tuah ka thutiam mi susia khawngin ka thuzilhte deih haw ma hi.
2 Ka Pathian uh hi. Ohte cu ama miphun hung a, amah cu thei hung ti haw hi.
3 Mahnaven thilpha nunghek san khawng zo haw hi. Mah hangin a ngal haw ten hilvawk haw tuk hi.
4 “Ka miphun ten amu thuno in kumpi teng haw hi. Ka lungkimnak um ngawlin lupi tuk vang ten haw hi. A sui le ngun haw suahin, amu siatnak tuk milim bawl haw hi.
5 Samaria khua tei sui tuah khuicang zuk a biak haw cu huazet ing. A hum hawah ka thinukzet ing. Milim cu itih hun tiang bia haw tuk nen tim? Ituk ten cawl haw tuk nen tim?
6 A milim haw cu Israel khutzung thiampa i bawlmi hi a, biak tukmi Pathian kha ma hi. Samaria ah a biak haw mi sui khuicang zuk cu sehkeh khawng tuk hi.
7 Huih ci a vawh haw ten huihsia pi cawm haw tuk a, ngui a nei ngawlmi an kungin, an suaktik tukma hi. An a suak thei hei in ngamdangmi ten ei haw tuk hi.
8 Israel cu thon tukmi miphun dang pa khat bangin cang zo haw a, beelkeh bangin man takleh haw ma toh.
9 Hampalak um laak bangin thinlian haw in, amu nuamnak lampi bek zui haw hi. Assiria bopnak ngen nuamin tai haw hi. Miphun dang lakah ngal khamsak tuk deihin nawhthuh pia haw hi.
10 Mahnaven atu-in munkhatah hulawm tung a, dantat tung hi. Assiria kumpipa nuainepnak hangin a ngei ngawlin, nasezet thuak haw tuk hi.
11 “Israel miten a sualthiannak haw tukin biaklan tam dedeuh a bawl haw hangin, sualnak tam sesem bawlnakin suak hi.
12 Mipi ca in sialcelh ngawl thuzilhnak ngan ing, mahnaven dangsazet si tin, zui nuam haw ma hi.
13 Biakpiaknak bawl cu nap zetin, biakpiaknak cik eih vang nuamzet haw hi. Mahnaven keimah a Topa haw in, amu humah ka lungkim mang hi. A sualnak haw cing leleng tung a, mah a sualnak haw hangin bawlsia tung a, Izipt ngamah kuat kikleh tung!
14 “Israel miten inn phazet sa haw naven amuh bawltu pa cu phawkngil haw hi. Judah ten khuapi kulhtian tampi tiang haw naven a khuapi haw le a inn phazette kang khawng tukin mei khiasuk tung tin,” ti hi.