9
Lei le Van i Pathian Biaknak
1 A masabel thutiamnak hei ah biaknak daan nei in, mihing tei bawlmi biaknak mun vangin nei hi.
2 Biakinn cu puan tuah sa haw in, a pualam khan cu Mun Thiangtho tin sam haw hi. Mahlai ah mei-inn, cabuai le Pathian nelah piakmi cangho koih haw hi.Ref 9:2 Suah 26:1-30; 25:31-40; 25:23-30;
3 Puan zak pa nihnak i nunglamah Mun Thiangthobel tihmi khan um hi.Ref 9:3 Suah 26:31-33;
4 Mahlai ah pak namtui meihal biakpiaknak, sui biakpiaknak biaklandawh le sui tuah bawlmi Thukham Kuangte vang um hi. Mah Thukham Kuang sungah manna cangho koihnak sui beel, ceh dawnno tawtmi Aaron i thiangkhut le thukham ngatnak suangpeek vang um hi.Ref 9:4 Suah 30:1-6; 25:10-16; 16:33; Num 17:8-10; Pai 25:16; Daan 10:3-5;
5 Thukham Kuang humah Pathian sunloihnak langtiktu Cherub, tihmi ha neimi zuk koihin, sual ngaihthiamnak mun i humah a ha phalh haw hi. Tu cu hitih bang thu cangkim zetin hilhnak hun kha ma hi.Ref 9:5 Suah 25:18-22;
6 Puan biakinn sung a thil a bawldan haw cu hitih bangin hi. Thiampi cu a nadeh haw dek tukin nisialin, a pualam deuh khansungah tumin,Ref 9:6 Mipum 18:2-6;
7 Thiampi Sang bek, sungta khansungah kum khat, vei khat tum hi. Ama sualnak le mipi ten sualnak a hihlam thei ngawlin a bawl khak haw mi ca in nganhing thisan cawi in Pathian pia hi.Ref 9:7 Thiam 16:2-34;
8 Hitih bang a bawlnak sung haw pen Hawvang Thiang i cangcian zetin, a langtikmi cu; puanbuk pualam deuhah a umlaihin, Mun Thiangthobel hawhnak lampi hong ma laih, tihnak hi.
9 Hihi cu tehkipnak a hih bangin atu eimu khan hi a tihnuammi hi. A tihsan cu Pathian nelah piakmi laksawng le biakpiaknak nganhing ten Pathian a biatu tei lungmu cangkim zetin thiangtik thei ma tihnak hi.
10 Itahim titale mah biakpiaknakte cu an le tui le thianthohnak i bawlmi biakpiaknak tuah a pehdunmi haw hi. Mah mite cu a pualam daan bebek hi haw in, Pathian in ihempoh a thakin lep laihngawl sung bekin man mite hi haw hi.
11 Mahnaven Khrih cu thilpha a um sami humah Thiampi Sang hi tukin hung zo hi. A nadehnak puanbuk cu ngeng saw in cangkim sih hi. Mihing tei bawlmi puanbuk hi kha ngawlin, hi leihum i bawlmi sungah tel kha ma hi.
12 Mun Thiangthobel munah kumkhua phaat tukin vei khat bek Khrih a tum ten biakpiaknak tukin keel le khui thite cawi ngawlin ama thisan cawi in, eimu ca in kumkhua nunpatnak bawlsak hi.
13 A thiangtho ngawl mipi tei humah thiampi pa in keel thi, tuucang thi le halkangmi khuino tei vut cu mipi a theh ten a sualnak haw hempoh thiangtik hi.Ref 9:13 Thiam 16:15-16; Num 19:9,17-19;
14 Mahti bangin sualnak a thiang thei ahi tale Khrih i thisanin amah le mah biakpiaknakin pia hi. A nungmi Pathian na a deh theihnak tukin, imah nemcuam ngawlmi a zui nuamnak uh lungmu bawmngit khi a thisanin thiangtik tuk hi.
15 Mahti bang a hih hangin Pathian i sammi ten Pathian i tepsami kumkhua thupha co theihnak tuk thutiamnak thak a ngaisungtu cu Khrih amah hi. Mah bangin a hih theihnak cu ama thihnak hangin hi. A thihnakin thukham masa i nuai a um haw laihin, a sualnak haw sung pen luattik hi.
16 Lo le lam piak thu in, titale lo le lam piatu pa i thih nungten man tuk laihmi hi;
17 Itahim titale ama nunlaihin, a lo le lam piakmi cu man theih ma laih hi; a thih nung bek ten man theih tuk laih hi.
18 Mah hangin thutepnaka 9:18 Grik awnin ‘Thutepnak’ tih le ‘lo le lam thucah’ tih hi bangten hi. a masabel cu thisan tuah bekin sullam a neih hi!
19 Moses in masabelin Daan laibu sung a ummi thukham hempoh cu mipi than hi. Mahten khuicang thisan le keel thisan khi la in tui tuah a loih celh ten, tuumul san kencihmi hyssop tihmi thingkung mangin Daan laibu le mipi cu thehin, “Na zui tuk uh,Ref 9:19-20 Suah 24:6-8;
20 Pathian i thutiam piakmi a khotiktu cu hi thisan hi,” ti hi.
21 Mahti bangin Moses in thisan cu Thutep Deubuk le Pathian biaknakin manmi na tei humah theh khawng hi.Ref 9:21 Thiam 8:15;
22 Daan sung a bangin thisan bekin ihempoh thiangtikin, thisan luannak a um bek ten sual ngaihdamnak um thei hi.Ref 9:22 Thiam 17:11;
Khrih i Biakpiaknakin Sual Thiangtik
23 Vancung a ummi thil a cuncop haw mite cu mahtih bangin thiantik kul haw hi. Mahnaven vancung a um a tatak hei in biakpiaknakte pha sesem kul hi.
24 Mah a tatak a cuncop haw mi, mihing tei bawlmi Mun Thiangtho sungah Khrih cu tum ma hi. A tumnak cu vancungah hi a, atu-in eimu ai-awhin Pathian i mai ah um hi.
25 Judah mi Thiampi Sang cu kumsialin nganhing thisan kengin Mun Thiangthobel ah tum hi. Mahnaven Khrih cu amah le mah biakpiaknakah pia cop tukin vei tampi tum ma hi.
26 Mahti bangin leipi pianpat pepan vei tam leita thuak kul tuk hi! Mahti bang hi ngawlin atu hun dawlbelnak a bo kuanno ten amah le mah biakpiaknakah piadunin, sual a thiantik theihnak tukin kumkhua phaatin vei khat bek lang hi.
27 Mihing cu a kuakua hei hihen vei khat thih dan poh hi; mahnung ten Pathian in thukhen tuk hi.
28 Mahti bang bokin Khrih hei in mihing tei sualnak thiangtik tukin biakpiaknak vei khat bek pia hi. A vei nihnak hungleh tuk a, mahten sualnak thu ah hileh ngawltohin amah a ngaktu tei nunpan tukin hi tuk toh hi.Ref 9:28 Isa 53:12;