2
Thesalon Khua Ah Paul i Nadehnak
1 U le naute, nangmu lakah ka hen uh khi thawnthong ma hi tih cu nangmuh loli in thei uh ci.
2 Thesalon khua ka hen uh laih ngawlin Filipi khua ah bawlsiatnak le zotsaknak tawk zo ung tihte vang thei uh ci. Mahti bangin dodalnak tampi um naven Pathian in ngalhannak pia in, ama Thuthangpha cu nangmuh tei lakah phuang ung hi.Ref 2:2 Nung 16:19-24, 17:1-9;
3 Ka hilh uhmi thu ah khelhnak imah umma hi, lungmu thiangtho ngawl sung pen a tulmi hei kha ma, mizol ka tumnak uh i hang hei kha ma hi.
4 Pathian i hilhtik a nuammi hilh ung hi. Itahim titale Thuthangpha phuangtu tukin khingkhai in muantakin mu hi. Mihing lungdamtik tum ma ung, mahnaven ka lungmu uh a mutu Pathian lungdamtik tum ung hi.
5 Nangmuh ten na theih uh bangin nangmu lakah ka hen uh laihin, nangmuh pahcoihnak thu awnkam mang ma ung hi. Na hampumnak uhte lang tuk ngawlin awnkam khat hei mang ma ung. Pathian in thei leng hi.
6 Nangmu lak pen hihen, midang tei lak hei pen hihen, pahcoihnak ngah nuam kha ma ung hi.
7 Khrih i palai ka hih bangin nangmu lak pen mahti bang a kun ngam tukmi hei hi nave ung, mahmi cu ka tuptah uhmi kha ma hi. Nu ten a cate cawmin, a cinkhawi bangin nangmu lakah ka umlaih uh khin thinnemnak tuah um ung hi.
8 Nangmuh ka ihzet uh hangin, Pathian Thuthangpha bek hei hi ngawlin ka nunnak loli uh vang pia nuam ung hi.
9 Ka ihzet uhmi hi zo uh ci. U le naute aw, cawl le haksa zetin, na ka deh uh cu thei leng poh uh ci. Pathian Thuthangpha nangmuh tei lakah ka phuan uhten nangmu ca in vanngit a hih ngawlnak tukin sun le zan na ka dehnak uh hi.
10 Thu umtu nangmuh tei lakah ka ngamtat dan uh cu a thiang le a dikmi, khelhnak um ngawlmi hi. Hi thu ah nangmuh loli hi a theihpihtu na hih uh bangin Pathian vang cu a theitu hi bok hi.
11 Pa ten a cate a cingkhawi bangin nangmuh vang ka cinkhawi uh khi thei uh ci.
12 A Uknak le a sunloihnak kawm tukin a samtu Pathian lungdamtik tukin le nung thei tukin, catngawlin sosuah ung hi, nangmuh hehnemin thapia ung hi.
13 Mahten Pathian nelah lungdamnak ka piak nuam uhmi thudang umlaih hi. Pathian i thu nangmu lakah ka henpih uhten mihing thu hi ngawlin Pathian i thu hi tih cu thei uh ci; mahtin na theih uhmi cu Pathian i thu tatak hi a, pom ngah zo uh ci. Itahim titale a sangtu nangmu sungah Pathian in nadek hi.
14 U le naute aw, Judea ngamsung a Pathian i pawlpi le Khrih Jesuh i mihing tei tawhmi thil cu nangmuh vangin tawk bok uh ci. Judah miten a bawlsiat haw bangin nangmuh vang nangmu ngamsung mi lala ten bawlsia haw hi.Ref 2:14 Nung 17:15;
15 Judah mite cu Topa Jesuh le profet a thattu le keimuh a bawlsiatu vang hi haw hi. Itih zahin Pathian khaw-ngaitiktu hi haw him? Mi hempoh a langpang haw hi.Ref 2:15 Nung 9:23, 29; 13:45, 50; 14:2, 5, 19; 17:5; 18:12
16 Gentail mitei lakah nunpatnak Thuthangpha ka hilh tuk uh khi kham haw. Mahti bangin a bawl leleng haw mi sualnak cu a tawpkhawk tian hengtikin Pathian thinuknak a hum hawah heng hi.
Paul In Thesalon Zin Leh Nuam
17 U le naute aw, a lungmu uh cu khendun ma nave hung, taksa in hun comno sung nangmuh tuah a khendun uh hangin nangmuh ngai zetin tawhleh tuk bek zuam li ung hi.
18 Nangmu lakah zinleh nuam ung. Keimah hei cu vei tampi nangmu lakah a zin tukin ngaisung li naveng Satan in kham mek hi.
19 Thu ngangai in ti ahin midang niamtik cuang ngawlin, nangmuh hi, a Topa uh Jesuh heng lehin, nehnak tuah a mai ah na din uhten keimuh tei muansannak, lungdamnak le mitmai ngahnak hi tuk uh ci.
20 Nangmuhte cu kohtei mitmai ngahnak le lungdamnak tatak hi uh ci.